Read idege IJobu 6 Bible Online

IJobu 6 - idege bible

IJobu 6

¹Ọọwa, iJobu à wẹ yẹkẹẹ,

²“Ang pyii kị ka jẹ-ẹ̀ me akama nyam yẹ, kị jẹ-ẹ̀ hu ọjụjụ nyam hi eji nyọka jẹ ilo nyamwụ!

³Ị ka la ilo gu ugburuja ịlẹpwụ nya ihu. Ịnyị à du ká ẹla ọlọnụ nyam la pwáàpwaa lẹ.

⁴Ohe Oluhye Agụgụ chịm ịcha, Ẹhwa nyaa wụm ọyị o-olegu, Ohe Oluhye kpa uhi nya nyamwụ yẹm dada.

⁵Obyiyó ye amẹ ri lẹ, ọ́ọ̀ kpụ ịkata byịịị kaka, Ẹna-aa kpa amẹ ri, kpa ẹkọ nya imyi be ka.

⁶Ang oriri-í la ịpyọ ka, ị́ tị ya ịma jwoo ka— Oowo tị́ ka kpọọ ka ọnụ myị-ị̀? Onyoowuru nya ejụnụ kaa lịpyọ-ọ́?

⁷Ang oriri ịlịịwẹ-ẹ́ lam koó ka, ị mem ang oriri ịlẹ kị ka jụm ẹdụrụ.

⁸“Ang pyii ká Ohe Oluhye ka wẹ ọbịlẹ-bịlẹ nyam, kọ ka họ ọbaba nyam ham.

⁹Ang pyii kọ ka myị-ị̀ nwụm kpẹẹ, kọ ka tam ayịreji.

¹⁰Ọ́ ka myị-ị̀ họ ịnyị ịnọ, ịnyịrọ ka pwọm kpuru lẹ. Chajị ẹ-ẹpwụ nya ọjụjụ nyam wuu, Ḿ pwa ẹla ọhẹ-lọhẹ nya Ohe Oluhye Ọngọ Ọlịgọgọ kpong-kpong ka.

¹¹Ḿ la ọngịrị jam nyọka kpam hị kịlahị kokoo? Ẹhị ọrịrịị-rịrị ọlẹ kam dakụ ẹ-ẹpwụ nya ọhịhị à tị́ lee?

¹²Ọngịrị nyam lala ịnya ẹjwọ-ọ́? Ịnyịrọ nyam ri oje-é? Eheehe!

¹³Ḿ la ūkuru kpụ m̄ ka taabwọ wu ịlọm myị kaka, Ḿ tị ye ụbwọ ọdada bwu ẹgẹgẹhẹ kaka.

¹⁴“Ọlakama ọlala am la ọbaba nya aligu, ó-riri kam deeri la Ohe Oluhye Agụgụ wẹwẹ.

¹⁵Anụ aligu nyam-ḿ tị ju ọdahịhile ka lala ọ̀bá ọ-myị̀ ụka ọhẹ, chị eku ụka ọkịla.

¹⁶Enyi ọlụwa nyiri lala orírì, amwụ kpụ koo tuúú.

¹⁷Lụka nya ẹnụ nya inehe, ị nwụ kịra-kịra hi eji-eji deeji.

¹⁸Alẹdịyẹ pẹhi ụgbẹyị deeji juwa ga kele-warị tịtọ nya enyi u-ugbileji. Ị́ ye nwa ka, ị gbu ụ-ụwa.

¹⁹Alẹdịyẹ i-bwu ịTẹma teleko nya enyi. Alọhị i-bwu ịChẹba nwahị gbọọọ.

²⁰Ị dahịhile ọ-ka ye enyi ụ-ụwa ịnọ, ị hu ang kaka ju kele, olujwo tị taa lahị haa bwuuu.

²¹Ịịwẹ anụ ju ọdahịhile ka ẹ-ẹga nyam lẹ. Anụ nịra ẹhị kaka yẹ akama nyam lẹ, anụ tị dachichi hi jájaaja him.

²²Yẹ mẹẹ, m̀ byi ọngọhẹ nyanụ wẹ yẹkẹẹ, ‘Ya ịngịhyẹ gam ahị mẹ, ẹnẹhẹ lẹ-ẹ́ lee ọ-wẹ kaka yubwọ nyam bwu ẹgẹhẹ

²³lee ọ-gbam kpehe bwu ụbwọ nya oluji nyam lee ọ-chịm da bwu ẹga nya angị tụm pyịpyị ẹnẹhẹ lẹ-ẹ́?’

²⁴“Ale m̄ tị́ họ pyị-ị̀? Mọọ jẹm kam tụ́ ọnụ pịrị mẹ. Mẹjẹm mẹ, m̀ ka ya ọnụ bawụlẹ.

²⁵Ẹla nya ịlẹhị kaa la ujujwo, Á tị ye ẹla ọhẹ-lọhẹ bwuru dodehe ka.

²⁶À me ká uhwo nya ẹla m̄ wẹẹ ya-á? Ká eru ọchịchị nyam-ḿ ring ẹla ka lẹ.

²⁷À ka da ẹ̀chị chajị nyọka ri ọnyị-ogu myị ká-à wẹ̄. À dọmwụ ka ya oligu nyang dịnya myị.

²⁸“Yẹm ẹ-ẹhị myị̀myịịmyị̀ mẹ, Ọnụ m̄ tị́ ka me jeng lee?

²⁹Aa bà mẹ, ā bịrịm kịlahị kokoo. Ẹnyị ọnyịịla nyam ā wẹẹ hu rọọnụ lẹ!

³⁰M̀ ya uguru ẹla-á? Eheehe! M̀ jẹ ẹla ọnyịịla datị hi ọtịpyọ.