Read idege IJobu 7 Bible Online

IJobu 7 - idege bible

IJobu 7

¹“Tupyẹẹẹ! Ọhịhị nya ọngịnyị à ri ákàńgkanyà lẹẹ-ẹ́! Ọ kpụ okiró lala ụkụrwọ ọnyọọngịrị ọlẹ ká ọngọlẹ kị diro nya ụkụrwọ kaa họ,

²lala ọnyọhị ọlẹ kọ juwa họ ụkụrwọ ádẹnụ à tịtọ nya ụrụrụ, bala ọlụkụrwọ ọlẹ kọ juwa yẹhị nọ gbe uri ọ-ka yeye.

³Bwu ọya ka ọya, m̀ jam hịhị ju ang ododu, bwu odu ka odu, m̀ nọ am̀ ẹ-ẹpwụ nya akama.

⁴Ḿ hị nọ une, ahị ọpyẹyẹ tam-m̀ tà, Odu ohihi gbileji, m̀ gu áchwọ, yẹ kpáta-kpàta-kpáta gbee ká ahị pyẹ.

⁵Ịnyịrọ nyam myị la ekpunjuju yịngọọọ, bala ọ-ba ego kụrwọ-kụrwọ. Ọ be kọ̀ọ́kọọ juwa gba ịwụ kpehe.

⁶Ẹnụtụrụ nya ọhịhị nyam dụnyẹ gụ ugbẹnggbịlẹ owu wẹẹ, ị juwa ka myị ẹ-ẹpwụ nya ododu.

⁷Ohe Oluhye wee, ọhịhị nyam lala ọhụ ọ-da pweee, ọkẹkẹnị ọchịchị nyam cheju lẹ.

⁸Ọlẹẹlẹẹ ā wẹẹ yẹm lẹ, á ka yẹm gụ ọwẹ kaka. Á tịtọ nyam tọ, ḿ ka jam kaka.

⁹Jaabwọ ká egbamwụ kaa jẹ gbee kọ ka myị yịra-yịra, ịnyịnyị ọngọlẹ kọ rụ ka ejegu à la lẹ.

¹⁰Ọọ nyà tịrẹkpẹ ka ẹpwa nyamwụ kaka, angị jọọ jẹ ene-ene deri nyamwụ gbanggbang.

¹¹“Lẹẹlẹ, ḿ ka ya ọnụ bawụlẹ koo, m̀ ka ya ọjụjụ ọlẹpwụ nyam dodehe, bala ujujwo ọlẹ kọ wum ọyị a-alegu.

¹²M̀ meng ugbiriyo[5] ọlẹpwụ nya enyi-í, ká chụ angịnyị jam gbem lẹ?

¹³M̀ me ká ọnọnọ ka ya ịnyọ ọmwụmwụ ham, ká ịbẹẹdị nyam ka chụ ọjụjụ nyam hi.

¹⁴À tị kpa alaa ịtịpyọ chị uhi jum, bala ọ-kpa ọyị ọ-yẹ a-arụrụ jum uhi-uhi,

¹⁵gbee kọ ham há ó-ri kị pyịm imyi pyị, gụ ọ-ka hịhị uhila nya akama ọkẹ lẹ.

¹⁶Ọhịhị ọlẹ chịm aga pwẹẹpwẹẹ lẹ, ọ-hị kịlahị á baba ham kaka. Ba him mẹ, ọhịhị nyam ri ọhụ ọ-da pweepwee kem lẹ.

¹⁷“Ịyẹ ọngịnyị ehe à tị́ ri ká ẹla nyamwụ ji irya nyang ịnyị-ịị̀? Ịyẹ tị́ du kaa me irya jwoo ịịwẹ-ẹ̀?

¹⁸À kaa wụlọọ yẹ lụtụrụ ẹnụ myị ẹnụ juwa mọọ yẹ ụka myị ụka.

¹⁹Á la tụ ẹhị nyang kịnyaa him ụka ọhẹ chẹẹ lee ọ ka ba m̄ ka ka chị ugbayịgo da mile chẹẹ kaa?

²⁰Ḿ họ ang ọtịpyọ họ, ọọwa-á tị ka jụng họ ịngịhyẹ ka. Ọngọ yẹhị rịrị angịnyị ehe ee, Ahyu! Ịyẹ tị́ du kam ri ang ọ-da ịcha chị nyang ịnyịnyịịnyị-ị̀? M̀ ri olo ọnyẹẹnyẹẹ hang-ńg?

²¹Ányị tị́ du ká myị hịnyọ ịhọbịrị nyam bala abyị ịlẹ kam họ wuu ham ka-à? Ọ nọ chẹẹ m̀ ka ya angịrị chị ịpyị? Á tịtọ nyam to, á ka yẹm ụka ọọwa kaka.”