Read idege IJobu 8 Bible Online

IJobu 8 - idege bible

IJobu 8

¹Ụka ọọwa, iBilidadị ọla iChuha-à dọmwụ nyọka ya ẹla ta iJobu yẹkẹẹ,

²“Anyị ā tị́ ka juwa ya ụma nya ala ihideeji ịlịịwẹ tata ka ba-à? ẹla ọlọnụ nyang la pwúkù-pwuku lala igbachịwụ.

³Ohe Oluhye kaa la eje bíri-bìri-í? Agụgụ kaa pyị ẹla ọkpakpa anyoko-ó?

⁴Anyị nyang ka họ ang onyobyi ba Ohe Oluhye pyií, ịnyị à du kọ yaa akama jaabwọ kọ chịla wẹ lẹ.

⁵Ọ́ tị ri ká jahị kpata ka ẹga nya Ohe Oluhye Agụgụ, ká juwa bịlọọ,

⁶ká họ kpakpa bala ọ-la charị-charị, ọ ka wẹ kaka dang ụbwọ, kọ ka kpa ẹpwa nyang nyà tịrẹkpẹ wẹ iwe-ahụrụ ọnyịịla.

⁷Ụka ọọwa, ang ịlẹ ká la wuu ene, ka byẹhị a-ahị nya ịlẹ wuu ká wẹẹ ka la ị-ịlahị.

⁸“Towo kị ya jeng jaabwọ ká alene jẹ ang ka ba wẹẹ, ká tịtị jẹ jaabwọ ká adaa igogo anyị jẹ ang wẹẹ.

⁹Àhị angịlẹ kị ma ịnịyẹ oleeri ọlẹ tị́ jẹ ịyẹ jẹ? Ọhịhị nyahị olodehe chịpwụrụ kam lala ụrụ̄rụ.

¹⁰Ẹla ịlẹ ká alene ya ā mẹ ang jẹng mẹ, kị ya ẹla jeng bwu ẹpwụ nya ẹla ọjẹjẹ nyaa.

¹¹“Etungkohyo kaa bwu ẹ-ẹgẹhẹ dala ẹga ká enyi ji-í? Ẹ-ẹpwụ nya ụ̄wa kẹnẹ-kẹnẹ ị kaa bwu lẹ-ẹ̀!

¹²Enyi-í nwụ hyaa, kị kpụ ọchịchị kpụ lẹka, ị tịị gbu womboo jene nya amẹ ịkịla.

¹³Ịịwẹ odehe nya angị nyẹẹkpẹ da Ohe Oluhye à la lẹ, ẹhị ọrịrịị-rịrị nyaa kaa ri ododu.

¹⁴Ang ịlẹ kị kpụnịrọ ri ang ịdẹwụ-dẹwụ. Ị dahịhile owu—ukoowu nya ụbakpa amamadiroko.

¹⁵Ị kpụnịrọ ukoowu nya ụbakpa lala ẹpwa nyaa, ẹpwa ọlịịwẹ-ẹ́ tịị godayị myị ka. Ị yụbwọ chọọ giri-giri kpá, ọ tị wo pịla-pịla i-ijata.

¹⁶Alabwẹla onyobyi kaa nwa lala amẹ ẹ-ẹpwụ nya ẹnụ, ị pyẹ lala ụkọ à pyẹ yịrị ẹrụ yịrị.

¹⁷Atẹ nyaa jẹ kaka dabarị ajwọ, juwa jẹ tụ ajwọ da tịtọ nya ẹga kị ka ye yẹta yeji giri-giri.

¹⁸Ị́ hu amẹ ịịwa hi ẹga kị bwu rịrị kpá, ọngọhẹ-ẹ́ẹ̀ kpịtịya nyaa kaka.

¹⁹Ee, ịịwẹ ọkẹkẹnị nya alabwẹla onyobyi à kaa ba kpiniki lẹ. Angịkịla-à ka wẹ kaka ye iwe nyaa ku lẹlẹ.

²⁰“Yẹ mẹẹ, Ohe Oluhye-éè pwa ọlabwẹla ọnyịịla koo, ọ́ tịị da alabwẹla onyobyi ụbwo ka.

²¹Ọ ka chụ ẹhụ jung ọ-ọnụ wẹẹ-ẹ̄, ọ ka họ ā ka hụlọ ẹhụ chama-chama wẹẹ-ẹ̄.

²²Ọ ka chị oyoyi ju aluji nyang. Ọ ka ta ẹpwa nya alabwẹla onyobyi ayịreji gbanggbang.”