Read idege IJobu 9 Bible Online

IJobu 9 - idege bible

IJobu 9

¹Ụka ọọwa, iJobu wẹ yẹkẹẹ:

²“Ee, ẹla nya ịlẹhị ā ya wẹ lẹ. Tị lẹ̄ẹ, ọngịnyị ehe ka jẹ-ẹ̀ ri Ohe Oluhye oku e-eje myị-ị̄ị́?

³Ọ dọmwụ ri ká ọngịnyị-ị́ tịtọ nyọka bá ẹla tọọ, ọ ka tọ iru nya ịtọ-ẹla ịlẹ ká[6] ọngọọwa-á ka wẹ ookpokpo lẹpwụ nyaa myị ka.

⁴Ẹla ọjẹjẹ nya Ohe Oluhye la kpori-kpori, ọngịrị nyamwụ lụmẹ-ụmẹ. Ọngọngọhẹ chị ògbìló tọọ, kụrwọọ myị ẹnẹhẹ lẹ-ẹ́?

⁵Ọwa ọngọ gu ịgbọdọ cheji la ọ-da ọna-eji ene ka, ọ kaa kpa agbama yaa ahị kụrụ eji birikiti.

⁶Ohe Oluhye kaa họ ọpyị ọ-hụ jigi-jigi kaa ji, la itiwe nya odehe hụ́ kpuka-kpuka.

⁷Ọ́ da ehile, ẹnụ ka bà la o-kpehe kpụ, ịdịchụ-ụ́ ka hụ́ lodu ka.

⁸Ọ pyẹ uhye-ọgba maa da gbamgbam lịlọmwụ, bala ọ-jẹdịyẹ u-uhye nya Ihu o-gu ágbụ.

⁹Ọwa-à họ ebwo nya ịdịchụ ịlẹtẹ[7] bala ebwo nya ịdịchụ ịlẹpwayịrẹtẹ[8] tụ ịdịchụ iledii lẹ.

¹⁰Ọ họ ang ịtụka ịlẹ kahị jẹ ọdawụlẹ nyaa kpá ka. Ụkụrwọ ẹbyẹbyị ịlẹ kọ họ ju iru kịla ọwawa kịla.

¹¹Yẹ wẹẹ! Ohe Oluhye wẹẹ chịpwụrụ kám, ḿ tị jẹ yọọ ka, Ọ juwa jẹ kịnyaa, ḿ tị jẹ ka.

¹²Ọ kaa nu ang pwáàrịị, oowo tị́ ka woo kpa myị-ị̀? Oowo à tị́ ka dọọ o-taáá myị-ị̀?

¹³Ohe Oluhye-ē pwuru agbama nyamwụ ka, alákpa nya iRehabụ ugbiriyo ọlẹpwụ nya ihu hị nọnọ bẹẹbẹẹ i-ijata nya Ohe Oluhye.

¹⁴“Ee lẹ, am onyeriye ọlẹ tị́ ka bwu anyị kam ka bá ẹla tọọ? Ẹla-ịyẹ m̄ tị́ ka ye ya tọọ?

¹⁵Ḿ ri oku ri, ḿ ka wọọ ẹla ka, ọkẹnẹ-kẹnẹ ri ọ-ka bịlẹ Ohe Oluhye Ọngọleje nyam kọ ka yẹm ahyẹẹrwẹrwa mẹ ịnyị.

¹⁶Ḿ wụrwọọ wụrụ eje, kọ warị, ḿ dahịhile ọ ka myị-ị̀ dọnụ wẹm ka.

¹⁷Ọ du igbachịwụ kaka dum abwọ yịgẹ-yịgẹ, bala ọ-chịm abẹ myị ịnyịrọ-ịnyịrọ tu ododu.

¹⁸Ọ́ myị ham m̄ da ọhụ rwẹẹ kaka, ọ ya ang ịjụjụ myị ọhịhị nyam pwẹẹpwẹẹ.

¹⁹Ó-ri ẹla nya ọngịrị, oowo tị́ ka mọọ yẹ myị? Ó-ri ẹla nya eje, oowo tị́ ka wụrwọọ eje myị?

²⁰Ḿ ri oku ri, ẹla ọlọnụ nyam ka ya eje wum. Ḿ la abyị la ka, ọnụ nyam ka ya ẹla wum.

²¹“Ịnọ ḿ la abyị ọhẹ-lọhẹ koo, ḿ tị wa ịlọm nya ịngịhyẹ kaka, ọhịhị nya ịlọm chịm aga pwẹ́ẹ̀pwẹẹ.

²²Ọọwa-à du kam ya, ang ọdatị ọhẹ-ẹ́ ji ẹga nya Ohe Oluhye ka lẹ, alabwẹla ọnyịịla tụ alabwẹla onyobyi, ọ taa kpilo wuu lawụlẹ-awụlẹ.

²³Ọlabwẹla ọnyịịla-á gbu lọmwaa, Ohe Oluhye kaa hụlọ ẹhụ jwọọ.

²⁴Ọwa-à pẹhi odehe ju alabwẹla onyobyi ụ-ụbwọ, bala ọ-kpụ angịleje idu chwiichwii lẹ. Ó-ri ọwa kọ họ ịnyị ka, oowo tị́ tị̀ tị̄?

²⁵“Ẹnụtụrụ nya ọhịhị nyam à dụnyẹ pyii lẹẹ-ẹ́! ahyẹẹnụ ọhẹ lẹpwụ nyaa-á tị ju nya ọkẹkẹnị chẹẹ ka.

²⁶Ị chị agaga kám lala ụgbọ nya enyi, bala jaabwọ ká ogbe kaa chabwọ ju ọnyị-ụnụ.

²⁷Ḿ yaya m̀ ka bà la eru ọchịchị, kam ka chị ụmwẹhụ chẹẹ wẹẹ,

²⁸akama nyam wuu mwọọgịlẹ chị uhi jum, chajị m̀ jẹ ká Ohe Oluhye-é ya eje rụm ka.

²⁹Ọlẹ ká eje wum lẹẹ lẹlẹ, ọ-ma uya ju ịlọm tị́ tụtụm baba nya ịyẹ-ẹ̀?

³⁰Ḿ hụ́ ịlọm lenyi o-pwo keri-keri, kam tọ abwọ lụcha cheri-cheri wẹwẹ,

³¹ahụ Ohe Oluhye tị ka hum ju ka ẹpwụ nya ịtọpyị, ang ịkụrụ-kụrụ nyam ka pwam-m̀ pwa lẹẹ wẹẹ.

³²“Ohe Oluhye-é ri ọngịnyị ehe lala am, kpụ m̄ ka godayị wọọ ẹla lee ọ-bá ẹla ta awụlẹ u-ube oleje ka.

³³Ang pyii ká ọngọ ká ẹla ọhẹ ka ji kọ ka nyiri ẹla nyam bala Ohe Oluhye,

³⁴ká Ohe Oluhye ā hịnyọ la enyiri o-nyim nyi chẹẹ, kọ hịnyọ la uhi ọ-chị jum la akama ịwẹ kọ wẹẹ yẹm mẹ.

³⁵Aalẹ, m̀ ka jẹ-ẹ̀ ya ẹla la o-ju uhi nyamwụ kaka lẹ. Ọlẹẹlẹẹ lẹ, uhi ọlẹ kọ chị jum-ḿ myị m̄ ka ya ịnyị myị lẹka.