Read idege EJE ỌNYỊỊLA 10 Bible Online

EJE ỌNYỊỊLA 10 - idege bible

EJE ỌNYỊỊLA 10

¹Amkpaa ee, ịyẹ tị́ du ká godayị hwẹẹ him ịnyị-ị̄ị̀? Ịịyẹ tị́ du kaa nyẹẹkpẹ dam lụka nya akama-āà?

²Ọbọọchẹ ohihi du ká angịnyị inyibyi juwa tụ ọlẹbyahị pyịpyị. Aa họ ka obyi onyobyi ọlẹ kị me ā yẹ kịlẹlẹ kụrwaa ịwa ayịdang.

³Ọngọ onyobyi chị ọgọm ju ang inyibyi ị-mọọ ma, ọlịpyọnụ do Amkpaa do bala o-pwa ẹla nyamwụ.

⁴Ọngịnyị onyobyi hi ahị gbee, ọ́ tịtọ nya Ohe Oluhye ka, Ọ ya i-irya nyamwụ ya ịyẹ nyaa tị́ ri Ohe Oluhye ri-īì.

⁵Tị yẹ mẹ, ọ kaa kịlahị ẹ-ẹpwụ nya ang myị ang ọlẹ kọọ họ. Ọ́ ka jẹ-ẹ jẹ eje ọlala nya Ohe Oluhye ka. Ọ kaa da aluji nyamwụ ịkwẹ churumm.

⁶Ọ kaa byi ịlọmwụ yẹkẹẹ, “Ọngọngọhẹ-ẹ́ ka byim ya myị ka. Ḿ ka jẹ-ẹ̀ yẹ akama lodehe ọlẹ kaka.”

⁷Ẹla ọlọnụ nyamwụ ri ido ododo bala ọnọọkịla omeme bala ọ-hwàhwa jahị da angịnyị, ẹla nya akama bala ẹla onyobyi ọ kaa kpa ọ-nụ ụka wuu lẹ.

⁸Ọ ka kụ ị̀nya e-epweji gbe angịnyị, wu angị dọọ ẹlẹlẹhẹ ka nwụ timajẹ. Ọ kaa kụ nya ịbaje gbe ọngọ la ọngọdụbwọ ka.

⁹Ọọ kụ ị̀nya ịbaa-ịbaa lala ugẹbẹ, ọọ kpịbaa gbe okpehika. Ọọ waa pyẹẹẹ lụnya nyamwụ, gbilaa kpa rụ.

¹⁰Ọ gá okpehika ọlụrụrụ-ọbyịbyị beji kpàlị-kpalị. Ọngịrị nya ọlabwẹla onyobyi kụrwọọ kpọọ ju ka eji.

¹¹Ọlabwẹla onyobyi tị byi ịlọmụ yẹkẹẹ, “Ohe Oluhye deeri la ẹlẹwẹ lẹ, ọ gu ahị nyamwụ gbooo. Lẹẹlẹ, ọ́ ka yẹ ang-ang ọlẹ kam họ kaka.”

¹²Amkpaa ee, wuleji mẹ! Ohe Oluhye ee, yẹ alabwẹla onyobyi ịwẹ akama. Kpịtịya nya angịlẹ kị wẹẹ yẹ akama.

¹³Ịyẹ tị du ká ọlabwẹla onyobyi nyẹẹkpẹ da Ohe Oluhye ịnyị-ị̀? Ịyẹ tị́ du kọ byi ịlọmwụ ọ-ọkịlẹtụ ya, Ohe Oluhye nyị́ ka yẹ ọwa akama ka-à?

¹⁴Ahụ Ohe Oluhye tị yẹ ang wuu. À jẹ akama bala ụ̄hị ọyẹyẹ nya ikpehika wuu, chajị ká ka yẹ aluji nyaa akama. Ọngọ la ọngọdụbwọ-ka ya ịlọmwụ kpụ nịrọng, ahụ à ri ọngọdụbwọ nya ọngọ la ịngịngịhyẹ-ka lẹ.

¹⁵Ta ọngịrị nya ọlọkwọ bala ọlabwẹla onyobyi ayịreji. Yaa akama chajị nya ang onyobyi ịlẹ kị họ wuu gbee ká ọhẹ-lọhẹ á ka hi deeji ka.

¹⁶Amkpaa ri adịrahụ gbe oyi myị oyi. Angị gbịgba ha ihye ịkịla ka rụ hi ọpyị nyamwụ

¹⁷Amkpaa ee, à kaa ke ụrụ la ọbịlẹ-bịlẹ nya angị ji ẹpwụ nya akama. À kaa wo ida nyaa bala o-jwaa ọhụ.

¹⁸À ka chẹkpẹ ju anyị-egu bala angị ji ẹpwụ nya ọtụpyịpyị, chajị ká angịnyị ehe-é tụtụm ka ri ododo nya angịnyị aanaa ịkịla kaka. Eje Ọnyịịla nya iDevidi ọlẹ kọ da ha olegbeju nya aleje