Read idege EJE ỌNYỊỊLA 101 Bible Online

EJE ỌNYỊỊLA 101 - idege bible

EJE ỌNYỊỊLA 101

¹M̀ ka mwu eje chajị nya ọkpẹẹkpẹẹ bala eje ọkpakpa, Amkpaa ee, m̀ jam mwu eje hang.

²M̀ ka la ọhịhị o-ju abyị-ka, ụka oyina ā tị́ ka wẹ kaka chịm ẹwụ lẹẹ mẹ? M̀ ka hịhị lọkịlẹtụ onyoowuru ẹ-ẹpwa nyam,

³ḿ ka ya ẹga da ha ịngịngịhyẹ ọlẹ kọ ri ang onyobyi ka, ọhọhọ nya angịlẹ kị hwahị hi Ohe Oluhye wụm ẹjẹ, Ụbwọ-lẹta nyam-ḿ juwa ẹ-ẹpwụ nya ẹla nyaa ka.

⁴Ḿ ka họ ẹla obíri-bìri ka, ḿ ka yụbwọ ju ang onyobyi ọhẹ-lọhẹ ọhọhọ ka.

⁵Ọngọngọhẹ kọọ kpa ọngịnyị ọọnamwụ kụ́ nya ẹla onyobyi, m̀ ka tụ́ angị ịlịnyị kịnyaa hi ịlọm. Ọngọngọhẹ kọọ hu ịlọmwụ gẹdẹẹ juwa hi ọbọọchẹ aalẹ, ḿ ka ya ẹga da ha ọngọ ọlịnyị ka.

⁶M̀ ka myị ẹla ju angị la kpẹẹkpẹẹ ọ-ọpyị ọlẹ, m̀ ka myị haa kị ka kụ ẹ-ẹpwa nyam. Angịlẹ ká ọhịhị nyaa-á ju abyị ka à ka ri angị myị ẹrụ ham lẹ.

⁷Ọlịbịrịbwọ á ka kụ ẹ-ẹpwa nyam ka, ọlọnọọkịla-á ka la iwe-ahụrụ ẹ-ẹpwa nyam ka.

⁸Ẹnụ myị ẹnụ wuu m̀ ka ta alọkwọ ịlọpyị ọlẹ ayịreji. Angị kaa họ ang onyobyi wuu, m̀ ka kwaa rụ hi epweji nya Amkpaa. Abwọ ọrịrị nya ọngọ ji ẹpwụ nya akama kọ juwa gbana nya akama nyamwụ je Amkpaa.