Read idege EJE ỌNYỊỊLA 102 Bible Online

EJE ỌNYỊỊLA 102 - idege bible

EJE ỌNYỊỊLA 102

¹Amkpaa ee, wo abwọ ọrịrị nyam, ká ke ụrụ lida ọlẹ kam wẹẹ je bịlẹ ụbwọ ọdada.

²Ụka kam ji ẹpwụ nya akama, ā yahị chị ọka him ka! Ke ụrụ wo abwọ ọrịrị nyam, ká wẹm páaa ụka kam wụrụng mẹ!

³Ẹnụtụrụ nya ọhịhị nyam jam myị yịra-yịra lala ịmwụ, ekpinegu nyam wuru pwuuu lala ila nya utiyo.

⁴M̀ gbu wombooo lala amẹ ịnwọnwụ, ang oriri-í chịm oru ka.

⁵M̀ mwu eru gboo, ịnyịrọ nyam kpụ egba-egba, m̀ hi ekpinegu-ekpinegu kwonchoo.

⁶M̀ lala ọchịnụ olugbileji, lala upwii ọ-ga tụ egwawụ-egwawụ da.

⁷M̀ nọnọ kụ lahị jogo-jogo, hụ nweee lala ọchịnụ ọlẹ kọ la ụbwọọmwụ a-achinege nya ịnawụ.

⁸Ẹnụ myị ẹnụ aluji nyam kpam do, angị wẹẹ kpam họ juwa kpa ẹnyị nyam gọlọ.

⁹M̀ go agbụ ri lala ang oriri, egbejida nyam nyà ju ka ẹpwụ nya enyi ọnwanwa nyam

¹⁰ọọ-lajị nya agbama bala ikẹjẹ-awụrụ ọtụka nyang. À hum hwaa yam daarụ.

¹¹Ọhịhị nyam chịpwụrụ kam lala ụrụrụ ọlụka nya obyi, m̀ gbu womboo lala amẹ.

¹²Amkpaa ee, ahụ à tị ri adịrahụ gbe oyi myị oyi lẹ, à ka lehe pyịyọọ.

¹³À ka wuleji, ká ka yẹ ahyẹẹrwẹrwa nya ịSayọn, ụka nyọka yẹ ahyẹẹrwẹrwa nyamwụ pwụ eji lẹ, ụka ọọwa kpangga à lẹẹ lẹlẹ.

¹⁴Ajwọ ịlẹ kị kpa me egwalọ nyamwụ há anchẹ nyang, ọlẹ kọ ta ayịreji kpọrụ pwụrẹ-pwụrẹ lẹ, ọ ta anchẹ nyang olujwo.

¹⁵Alẹpwụma ọnyị myị ọnyị ka ju uhi nya Amkpaa, ịdịrịhụ ilodehe wuu ka ju uhi nya ụmụmẹ nyamwụ.

¹⁶Amkpaa ka ma ịSayọn nwụ wẹẹ, ọ ka chị ụmụmẹ nyamwụ ehe.

¹⁷Ọ ka ke ụrụ wo abwọ ọrịrị nya angị ye edawụ ka, ọ́ ka nyẹẹkpẹ da ọbịlẹ-bịlẹ nyaa ka.

¹⁸Anụ da ẹlẹwẹ ju nọ gbe aloyi olijuju mẹ, chajị ká angịlẹ kị mama lẹka ka wẹ kaka gwogbo ha Amkpaa.

¹⁹Anụ byaa mẹ, Amkpaa hiri ẹhị nyamwụ kpẹẹ warị weji bwu ẹga ọlịgọgọ nyamwụ u-uhye-ọgba, ọ yẹ ọyị bwu epwooohe wẹ odehe.

²⁰Ọ wo eru omwumwu nya alagba, ọ gba angịlẹ kị ya eje nya igu wu kpehe kaka la ịlaa.

²¹Lẹẹlẹ, ị ka ya ẹnyị nya Amkpaa dodehe ị-ịSayọn, ị ka gwogbo họọ i-iJerusalẹm

²²ụka ká alẹpwụma datị-datị bala alọpyị datị-datị á yẹju lawụlẹ nyọka gbịgba họọ.

²³Amkpaa chịm ọhịhị eku nwẹẹrịị hi ẹnụ ta uhye, ọhịhị nyam hi kpii lẹ.

²⁴Ohe Oluhye nyam ọlẹ ká juwa hịhị gbe oyi myị oyi ee, ā num ọhịhị lenjwo ẹ-ẹpwụ ịnyịrọ ka.

²⁵Lụka ọlụrụ kam kẹkpẹ ā ya itiwe nya odehe yeji lẹ, ahụ à kpa ụbwọ nya ịlọng họ uhye-ọgba lẹ.

²⁶Ịwa wuu ka ta ayịreji, ahụ tị ka juwa pyịyọọ. Ị ka bịrị chị pwẹẹpwẹẹ lala awụrụ, à ka nyaa nyẹ lala ang ịkụrụ-kụrụ, lẹ, ị ka chịpwụrụ lẹlẹ.

²⁷Ahụ tị lẹ, à la jaabwọ ká la, ọhịhị nyang-ńg tị ka jẹ-ẹ̀ la ọbaba kaka.

²⁸Anyị nyahị ahị anchẹ nyang ka hụ lokpunyi, anyị ịtụma nyaa tịtị ka hụ lokpunyi ị-ịlahị nyang. Eje Ọnyịịla nya iDevidi