Read idege EJE ỌNYỊỊLA 103 Bible Online

EJE ỌNYỊỊLA 103 - idege bible

EJE ỌNYỊỊLA 103

¹M̀ ya ẹla ta ịlọm yẹkẹẹ, “Gwogbo ha Amkpaa! Am lịlọm wuu ā gwogbo ha ẹnyị ọlịgọgọ nyamwụ!”

²Gwogbo ha Amkpaa! ā deeri nya ọnahị ọhọhọ nyamwụ ka.

³Ọwa-à hịnyọhi ịhọbịrị nyang wuu, bala ọ-họ ẹdụrụ ọnyị myị ọnyị nyang uda lẹ.

⁴Ọ chị ọhịhị nyang da hi igu, ọ wahị kụrụng la ọháha o-gbu enyi-ka bala ahyẹẹrwẹrwa.

⁵Ọ ya ang ịnyịịla myị̀ ọhịhị nyang du ká hi onjwo-onjwo-ò wẹ kpịra-kpịra lala ọchịnụ idu.

⁶Amkpaa kaa ya eje rụ angị ji ẹpwụ nya ọtụpyịpyị, ọọ ya ẹga da haa jaabwọ kọ chịla.

⁷Ọ mẹ ụgbẹyị nyamwụ jẹ iMosisi, ọ mẹ ụkụrwọ ịtụka nyamwụ jẹ ala Isirẹlụ.

⁸Amkpaa ri ọlahyẹẹrwẹrwa bala ọlọnahị, ọọ ju agbama hyaa ka, ọ myị̀ lọháha o-gbu enyi-ka.

⁹Ọ́ ka kịnyaa juwa yalibyi-alibyi pyịyọọ ka, ọ́ ka ju agbama ịịwẹ gbe oyi myị oyi ka.

¹⁰Ọ́ọ yẹhị akama ta ọ-họ tịpyọ nyahị meme ka, lee o-wuhi uri jaabwọ ká ang inyibyi ịlẹ kahị họ lụmẹ ka ba ka.

¹¹Jaabwọ ká uhye-ọgba la uhye gidogboo hi eji wẹẹ, ịnyịnyị-ịnyịnyị ọháha o-gbu enyi-ka nyamwụ à lụmẹ ẹ-ẹga nya angị kaa jwọọ ihi lẹ.

¹²Jaabwọ ká ọmwẹnụ-ụtụrụ ji hwẹẹẹ hi ọmwẹnụ-obyi-ì wẹẹ, ịnyịnyị-ịnyịnyị ọ tụ ịhọbịrị nyahị rụ hwẹẹẹ hiihi lẹ.

¹³Jaabwọ ká adịda kaa họ ọnahị ẹ-ẹga nya anyị nyamwụ, ịnyịnyị-ịnyịnyị Amkpaa-à kaa họ ọnahị ẹ-ẹga nya angịlẹ kịị jwọọ ihi lẹ.

¹⁴Ọwa ayịdang jẹ jaabwọ kị bwu họhị, ọ jẹ ká ọpyị-ọpyị ahị ri.

¹⁵Ahị lẹ, ọhịhị nyahị lala amẹ, ahị nwà gbọ̀dọ́-gbọdọ, pyẹ pyọọ lala àpwụ̀ nya ekeji.

¹⁶Igbachịwụ-ụ́ da pileleele, i wo hụrụ gbada-gbada hi eji-eji deeji, ọngọngọhẹ-ẹ́ tụtụm yaa kaka.

¹⁷Ọháha o-gbu enyi-ka nya Amkpaa tị lẹ, ọ juwa gbe oyi myị oyi ha angịlẹ kịị ju ihi nyamwụ.

¹⁸Ọ juwa ịnyịnyị ha angịlẹ kịị ba iro ọnwanwa nyamwụ jẹ, juwa kpa ehile nyamwụ jịra kpẹẹkpẹẹ.

¹⁹Amkpaa ya ẹchị nyamwụ da e-epwoohe, ọ ri adịrahụ nya ang myị ang wuu.

²⁰Anụ alegu-ẹrụ nya Amkpaa ee, anụ gwogbo họọ, anụ angịtụka ilepwoohe ịlẹ kanụ wẹẹ kpa ehile nyamwụ, juwa họ ang ọlẹ kọ byinu, anụ gwogbo họọ!

²¹Alepwoohe wuu, anụ gwogbo ha Amkpaa, anụ anchẹ ị-họ irya nyamwụ, anụ gwogbo họọ!

²²Ang ịlẹ ká Amkpaa họ wuu, anụ gwogbo họọ ju ka ẹga myị ẹga kọ ri adịrahụ pwụ. Am ịlọm lẹẹlẹ, m̀ ka gwogbo ha Amkpaa ịnyịnyị.