Read idege EJE ỌNYỊỊLA 104 Bible Online

EJE ỌNYỊỊLA 104 - idege bible

EJE ỌNYỊỊLA 104

¹M̀ ya ẹla ta ịlọm yẹkẹẹ, “Gwogbo ha Amkpaa! Amkpaa Ohe oluhye nyam ee, à chakpa lụmẹ! À la ụmụmẹ, à kpụ ẹhị dagaga ju ịlọng bwu uhye weji”.

²À ya ahịgboo kụrụ ịlọng jaabwọ kịị kụrụ ụwụrụ, à pyẹ uhye-ọgba maaa da gbamgbam lala ọdụ.

³À nwụ ẹpwa nyang u-uhye nya enyi ịtụka, egbamwụ ri ang ọrụnyẹ ọlẹ kaa kụ, tụ ọhụ nya igbachịwụ-igbachịwụ da.

⁴À kaa du igbachịwụ ẹrụ, apya bala ila ri angị myị ẹrụ hang ịnyịnyị.

⁵Ahụ à ya itiwe nya odehe yeji lẹ, ọngọngọhẹ-ẹ́ ka jẹ-ẹ̀ pyị hiii kaka.

⁶À ya ihu ịtụka ji uhye nyamwụ lala awụrụ, enyi myị̀ gbee kị dọmwụ biri ịgbọdọ.

⁷À kpụ enyi ịkata, ị rụ gụrẹ-gụrẹ, à kpụ ịkpala, ị yá gụrẹ yẹta ká ụnyẹ.

⁸Ị jẹ kaka wule ịgbọdọ, mwụ hireji ju ka ọkpọọ kele ka ẹga ká hunọ kị ka ji.

⁹À hu oyi nọ kị ka jẹ-ẹ̀ kpoye nya ụwa ẹnẹnẹhẹ nyọka myịmyị-ị̀ pyẹ kụrụ odehe wuu kaka.

¹⁰À họ ká agbụ nya enyi bene kpehe u-ugbileji, ịị mwụ bwu apewa nya ikiti.

¹¹Ị ya enyi ha iyo ịlẹpwamẹ nwà, imyi-enyi nya ibyiyó ịlẹpwamẹ myị.

¹²Ịchịnụ nọ awụ e-ekeji ba enyi ba, juwa mwu eje nyaa ịnyịnyịịnyị.

¹³À do enyi wẹ uhye nya ịgbọdọ bwu ẹpwa olepwoohe nyang, à do ahị ọwawa nya myị̀ odehe pwẹẹpwẹẹ.

¹⁴À họ amẹ ji ha ịna kị ka ri, à họ ang-ẹrụ ji ha angịnyị, chajị kị ka jẹ-ẹ̀ ye ang oriri bwu ọpyị,

¹⁵bala ere nyọka họ kị ka chị ọkẹkẹnị, bala ida ọwụwụ chajị kị ka há ẹhị, bala ịkaa nyọka ya ọkpịra-kpịra haa.

¹⁶Enyi do ju ekeji nya Amkpaa yẹẹyẹẹ, ee, ekeji nya isida ịla iLibanọn ịlẹ kọ ju lịlọmwụ ịnyị.

¹⁷Ịchịnụ nọ awụ u-uhye nyaa, ịgbangkịrọ nọ ẹpwa a-achinege nyaa.

¹⁸Ịgbọdọ ịlẹ kị la uhye ri ẹga ká ịmwụ ịlẹpwamẹ kaa kụ, ajwọ tị ri ẹga ọkpịbaa ha iyo-ịlejwọ.

¹⁹Ọya ọhụhụ ri ang ọ-kpa ju ụka ọya ọnyọnyọọnyị ẹjẹẹ, ẹnụ jẹ ụka kọ ka ya ẹtẹ dụrụ ugba.

²⁰À du ukpowu warị, ọ ri odu ohihi, iyo ịlẹpwamẹ wuu kpehe kaka ga ri.

²¹Ágba nya egabẹ wọ arụ durwe nya ang oriri, juwa dahịhile ọ-ka ye ang oriri bwu ẹga nya Ohe Oluhye.

²²Ẹnụ-ụ́ be eji, ị wa wii, ị nyà kaka mwụ nọnọ ẹ-ẹpwụ nya uku nyaa.

²³Angịnyị-ị̀ kpehe ka ọlụkụrwọ nyaa, ị kịnyaa la ụkụrwọ ọhọhọ gbee da ka ewu-obyi.

²⁴Amkpaa ee, ang ịlẹ ka họ wuu chakpa ju iru! À haa bwula ẹla ọjẹjẹ, odehe myị̀ la ang ịlẹ ká họ kpọrịkọọ.

²⁵Ihu juwa, ọ ri ọtụka ri ọ ju ẹpwụ gbamgbam ju, ang ịhịhị ịlẹpwụ nyamwụ kịla ọwawa kịla, ang ịtụka bala ichiche ịlụwa.

²⁶Agbọ nya enyi juwa ga kele ga warị, ẹ-ẹpwụ ẹpwụ nya enyi ọọwa, ugbiriyo ọlẹpwụ enyi à chandụwa lẹ.

²⁷Ang ịwẹ wuu da kụng, nyọka ya ang oriri haa ụka kọ baba haa.

²⁸Ụka ká ya haa, ị ye ri, á ya ang oriri haa, ị wu ẹpwụ kpọngkpọng.

²⁹Á ya ahị chọka hyaa, ị ju uhi, á naa ịhụ ọdada, ị gbu nmẹẹnmẹẹ, wọwọ ta ịpyị ọlẹ kị kpa haa.

³⁰À du olegu[9] nyang ẹrụ chaa ọgụ, bwula ọọwa du ká ang wuu ji, nyọka ya ọhịhị onyeewe ha ang ịhịhị ilodehe wuu.

³¹Ụmụmẹ nya Amkpaa ā juwa gbe oyi myị oyi, ká ọkịlẹtụ ā kpụ Amkpaa nyii chajị nya ang ịlẹ kọ họ wuu mẹ!

³²Ụka ká chẹhị yẹ odehe, odehe hụ́ kpakpaakpa, à ya ịnyịrọ kịla ịgbọdọ, ịgbọdọ chị ịmwụ kpuru-kpuru.

³³M̀ ka mwu eje ha Amkpaa ẹ-ẹpwụ nya ọhịhị nyam wuu, jaabwọ kam hịhị tata ka ba, m̀ ka mwu eje nya ogbo ha Ohe Oluhye nyam.

³⁴Amkpaa-ā myị ká irya ịlẹ kam me chajị nyamwụ ā kpọọ ugbodu nyii, chajị ẹga nyamwụ m̄ kaa ye ọkẹkẹnị lẹ.

³⁵Alọhọbịrị ā ta ayịreji gbanggbang hi odehe, ká angị inyibyi ā hi ji odehe kaka mẹ. M̀ ya ẹla ta ịlọm yẹkẹẹ, “Gwogbo ha Amkpaa! Gwogbo ha Amkpaa!”