Read idege EJE ỌNYỊỊLA 105 Bible Online

EJE ỌNYỊỊLA 105 - idege bible

EJE ỌNYỊỊLA 105

¹Anụ ji Amkpaa obe, kanụ ya ụmụmẹ nyamwụ pyẹ! Anụ ya je alẹpwụma wuu ang ịlẹ kọ họ!

²Anụ mwu eje họọ, anụ mwu eje gwogbo họọ. Anụ ya ụkụrwọ ẹbyẹbyị ịlẹ kọ họ dodehe.

³Anụ chị ọkẹkẹnị nyori ahị ri ịnyamwụ, angị kaa gbịgba ha Amkpaa wuu ā chị ọkẹkẹnị!

⁴Anụ teleko nya Amkpaa bala ọngịrị nyamwụ, anụ kịnyaa juwa gbịgba họọ ụka wuu.

⁵Anụ kpịtịya nya ụkụrwọ ẹbyẹbyị ịlẹ kọ họ, ụkụrwọ ẹbyẹbyị bala eje ịlẹ kọ chị.

⁶Anụ anyị ịtụma nya Ebiraham ọnchẹ nya Ohe Oluhye ee, anụ anyị ịtụma nya iJekọbụ ọngọlẹ kọ chụ ee.

⁷Ọwa-à ri Amkpaa Ohe Oluhye nyahị lẹ, ehile nya ọpyị ọkpakpa nyamwụ ri inya alodehe wuu.

⁸Ọọ kpịtịya nya iro o-gbe oyi myị oyi ọlẹ kọ nwa, iro nyamwụ ọlẹ kọ juwa ha alụka nya oyi ọnyị myị ọnyị.

⁹Iro ọọwa-à ri ọlẹ kọ nwa ta Ebiraham bala ọnụ ọlẹ kọ myị ha Ayịsiki lẹ.

¹⁰Ọ yụbwọ ju ọnụ ọmyịmyị ọọwa ẹ-ẹpwụ ha iJekọbụ lala ehile, ọlẹ kọ ri iro o-gbe oyi myị oyi ha Isirẹlụ

¹¹bwula o-ya ọwa nyị ka ya ọpyị nya iKenan ọwẹ haa kịị nyị ka ri ang ọlala nyaa gbe oyi myị oyi.

¹²Angịnyị nya Ohe Oluhye ayịdang la wure-wure ịnọ, ị ri angga riri ọ-ọpyị nya iKenan.

¹³Ị juwa ga bwu ẹpwụma ọhẹ ka ọkịla, bwu ọpyị ọhẹ ka ọkịla.

¹⁴Ohe Oluhye-é tị myị ọngọngọhẹ taa pyịpyị ka, ọọ-lajị nyaa, ọ gbile ịdịrịhụ ụbwọ ụ-ụrụ yẹkẹẹ,

¹⁵“Ānụ họ anchẹ nyam ịlẹ kam chụ ịngịngịhyẹ koo, anụ yụbwọ gu alọmwụ nyam kwẹnggẹ kpong-kpong koo.”

¹⁶Amkpaa du ūhī wẹ ọpyị nyaa. gbee ká ang oriri nyaa wuu go ata gu o-omyi.

¹⁷Ọ tị lẹẹ du ọlẹng ọhẹ ji ịlahị nyaa ene— iJosẹfụ ọlẹ kị wu ra nya ọnyọhị ịnyị.

¹⁸Ị ya agba jwọọ a-ata, ị ya ogbilo nya oje dọọ ụ-ụkpụrọkọ,

¹⁹gbee ká ẹla ọlọnụ nyamwụ họ jịra, ụka ká ẹla ọlọnụ nya Amkpaa rwọọ ịgba.

²⁰Adịrahụ nya ala Ijipiti du kaka gbọọ kpẹhẹ bwu agba, adịrahụ nya alẹpwụma wuu pẹhyọọ kaka la ịlọmwụ.

²¹Ọ hwọọ ri ayịbaba nya ẹpwa nya adịrahụ, ri olegbeju ọkpẹhị rịrị ang myị ang ịlọpyị nyamwụ wuu

²²Ọ ri olegbeju nya alegbeju ịtụkụ yi adịrahụ, ọ la ọngịrị nyọka mẹ ang jẹ angị kaa ju adịrahụ irya.

²³Ọọwa, Isirẹlụ à tị wẹ Ijipiti lẹlẹ. iJekọbụ kụ ọ-ọpyị ọwẹ kọ ri ọpyị nya ala ịHam.

²⁴Amkpaa họ pyebile, gbee kị lụmẹ kịla aluji nyaa kịla.

²⁵Ọ họ ala Ijipiti ba angịnyị nyamwụ ẹtẹ, ị kpa ijẹẹhị họ ju anchẹ nya Amkpaa.

²⁶Ọ du iMosisi ọnchẹ nyamwụ ẹrụ, bala Erọn ọlẹ kọ chụ.

²⁷Ị họ iru nya ụkụrwọ ịlẹbyẹbyị ẹ-ẹpwarịrị nya ala Ijipit, ọ-ọpyị nya ịHam.

²⁸Ohe Oluhye du ukpowu wẹ ọpyị nya Ijipiti, ẹga wuu chowu kpịlẹẹ, alụwa-á tị ju ihi nya ehile nyamwụ ka.

²⁹Ọ họ enyi ịlịnyaa wuu yẹ la ịwọ, iyenyi ịlụwa wuu gbu.

³⁰Arwa ye ọpyị nyaa la, ị ji ẹga myị ẹga tụ ẹpwa nya adịrahụ.

³¹Amkpaa da ehile, iru nya ịjị hu kám-m Ijipiti, bala ịlahịkpuu yịrị ọpyị nyaa yịrị wuu.

³²Ọkọkọ nya enyi, ọ do ekpawẹ haa, apya chị kpowu-kpowu ẹ-ẹga myị ẹga nya ọpyị nyaa.

³³Ọ bịrị ẹrụ nya alakọnụ bala ikiledu nyaa, ọ hụla ekeji ịlụwa wuu hwẹẹhwẹẹ.

³⁴Ọ ya ẹla, ịyịrị wẹ gbiririiri, iru nya ịyịrị ịlẹ kị ka jụ wa myị ka.

³⁵Ị nẹ apwụ bala amẹ ịlụwa kịrẹm-m, ta ang-ẹrụ nyaa ayịreji wuu.

³⁶Ọ nwụ anyị alẹng ịgbahị ịlụwa wuu, ọnyị ọlẹng nya ọgbanyẹ nya ugbiyegu ọnyị myị ọnyị Ijipiti.

³⁷Ọọwa, ọ gba ala Isirẹlụ kpehe bwu Ijipiti lolo nya okpoko onyoowuru bala okpoko ịgọm lẹlẹ. Ọngọngọhẹ lẹpwụ nyaa-á jụ ẹdụrụ lee ọ-họ rume-rume ka.

³⁸Ala Ijipiti chị ọkẹkẹnị ụka ká angịnyị nya Ohe Oluhye yegiri rụ, ala Ijipiti ju uhi nyaa lụmẹ ene.

³⁹Ọ pyẹ egbamwụ maaa ke angịnyị nyamwụ, ọ ya ila haa lodu nyọka ya ahịgboo haa.

⁴⁰Ị tịtọ nya ang oriri, ọ ya ikpekpile-ẹwa haa nya iyo, ọ ya ịkaa haa bwu epwoohe nya ang oriri.

⁴¹Ọ pyẹ ẹjwọ maa, enyi bene kpehe bwu ụwa kuuu, juwa mwụ gbịlọ-gbịlọ lala ihu u-ugbileji.

⁴²Ọ kpịtịya nya ọnụ ọmyịmyị ịlịgọgọ ịlẹ kọ myị ha Ebiraham ọnchẹ nyamwụ.

⁴³Ọ kpa angịnyị nyamwụ rụ bwu Ijipiti lọkẹkẹnị, juwa mwu eje bala ọ-da iwuru nya ọkẹkẹnị.

⁴⁴Ọ ye ịpyị nya alẹpwụma ịkịla haa la, ị ye ang-ẹrụ ịlẹ ká angịkịla yẹ akama ju wuu la.

⁴⁵Ọ họ ịnyị, chajị ká angịnyị nyamwụ ka ba ọmẹjẹ nyamwụ jẹ, bala ọ-ka ju ihi nya ehile nyamwụ. Anụ gwogbo ha Amkpaa!