Read idege EJE ỌNYỊỊLA 106 Bible Online

EJE ỌNYỊỊLA 106 - idege bible

EJE ỌNYỊỊLA 106

¹Anụ gwogbo ha Amkpaa! Anụ ji Amkpaa obe, chajị ọ ri ọngọ ọnyịịla! Ọháha o-gbu enyi-ka nyamwụ juwa ogbe oyi myị oyi.

²Oowo tị́ ka gbitịrẹ-gbitịrẹ nya iru nya ang ịtụka ịlẹ ká Amkpaa họ kpá myị-ị̀? Oowo tị́ ka jẹ-ẹ̀ gwogbo họọ nwà ụga myị lẹẹ-ẹ̀?

³Ịnya angịlẹ kịị họ ẹla ọkpakpa há haa ịwa lẹ, bala angị kaa họ ang ọlẹ kọ pwoku ụka wuu.

⁴Amkpaa ee, aa kpịtịya nyam ụka ká juwa da angịnyị nyang ụbwọ, chịm da ịnyịnyị ụka ká ka chaa da.

⁵Myị kam yẹ ịlahị ọkaka nya angịnyị nyang, kam tịtị chị ọkẹkẹnị ta alẹpwụma nyang ẹ-ẹpwụ nya ọkẹkẹnị ọchịchị nyaa jaabwọ kị ka juwa mịla oja hang juwa chị ịyọnggọ-yọnggọ chajị nyọlẹ kị ri nyang lụbwọ-lẹta.

⁶Ahị họ ọhọbịrị lala adahị igogo anyị, ahị họ ang onyobyi, ahị gu ọkwọ.

⁷Ụka ká adahị igogo anyị juwa Ijipiti lẹ, ụkụrwọ ẹbyẹbyị nyang-ńg myaa lẹhị ka, ị deeri nya ọháha o-gbu enyi-ka nyang ọlẹga nyaa, ị la egbeju-ọngịrị tang ahụ Agụgụ ụ-ụwa Ihu Oletungkohyo.

⁸À tị chaa da jaabwọ ka myị ọnụ, chajị nyọka chị ọngịrị ọtụka nyang ehe.

⁹À da Ihu Oletungkohyo ehile, ọ nwụ kịrẹ-kịrẹ, à kpa angịnyị nyang kpoye bwu ọpyị ọchọrụ ọlụwa.

¹⁰A chaa da bwu ẹpwụtụbwọ nya angịlẹ kị wẹẹ baa ẹtẹ, a gbaa kpehe bwu ụbwọ nya aluji nyaa.

¹¹Enyi nyà kaka biri aluji nyaa hyẹkẹm, ị byi enyi wuu gbanggbang.

¹²Angịnyị nyang myị la ẹla nyang ụka ohyẹẹkpẹ, ị mwu eje gwogbo hang.

¹³Ị tị deeri nya ụkụrwọ ọlẹ ka họ ahyaahị, ị pẹ ọgụ nya ịlaa la o-wo lang ene ka.

¹⁴Ang máa ma okwookwee u-ugbileji, ị mang ahụ Ohe Oluhye yẹ ụ-ụwa.

¹⁵À ya ang ọlẹ kị tịtọ haa, à tị du ẹdụrụ onyobyi kaka jwaa ịnyịnyị.

¹⁶Alịkampụ nya angịnyị nyang yẹ ijiiji nya iMosisi bala Erọn ọnchẹ ọlịgọgọ nyang ahụ Amkpaa.

¹⁷Ọpyị gu ene kpoo, ye ịDatan mile, ọ ju Abiram bala alakpa nyamwụ ịkịla eji pyịyọọ.

¹⁸Ila bene wawu ẹ-ẹpwarịrị nyaa ịnyịnyị, ọ rụ angịnyị inyibyi ịwẹ wuu.

¹⁹Ị họ ẹna nya okpoko ịgọm ị-ịSayịnayị, ị kpụ eteji ha ukpeku ọlẹ kị họ lokpoko ịgọm.

²⁰Ị ya ụmụmẹ nyang ahụ Ohe Oluhye nyẹ ukpeku nya ẹna o-ri amẹ amamadiroko.

²¹Ị deeri nyang ahụ Ohe Oluhye ọlẹ ka chaa da bwula ọ-họ iru nya ụkụrwọ ịtụka Ijipiti.

²²Ụkụrwọ ẹbyẹbyị ịlẹ ká họ ọ-ọpyị ọwẹ lụmẹ! Aang i-wu ejiri ịlẹ ká họ ụ-ụwa Ihu Oletungkohyo ị ka kpa ọnụ kà kaka!

²³À wụ ẹjẹ du ká nwụlanọ nyọka taa ayịreji, iMosisi ọnchẹ ọlẹ ká chụ tị pyẹ abwọ ku du ká taa ayịreji ka.

²⁴Ị pwa ọpyị ọnyịịla ọọwa, ị dahịhile ọnụ ọmyịmyị nyang ka.

²⁵Ị dachichi nụwa ẹ-ẹpwang nyaa juwa mwala ya ju ịlaa, ị́ myị ju ihi nyang ahụ Amkpaa ka.

²⁶Ọọwa, ā hụrụ jahị daa, byaa ya ọwa nyị ka taa ayịreji u-ugbileji

²⁷bala ọ-ka nyi anyị ịtụma nyaa epepe yịrị ẹpwụma ị-jẹng ka yịrị, kwaa rụ chị ka ẹpwụma ịkịla wuu.

²⁸Ụka ká adahị igogo anyị jẹ pwụ ịPẹyọ, ị ya ịlaa ju ka ẹpwụ nya eteji ọkpụkpụ ha ojiga ịBaalụ, ị ri ang ịlẹ kị ya kịla iya ha ijiga ịlẹ kị tị la ọhịhị kpong-kpong ka.

²⁹Ị du agbama jung ahụ Amkpaa bwula ang ịtịpyọ ịwẹ wuu kị họ, ẹdụrụ onyobyi bene ẹ-ẹpwarịrị nyaa.

³⁰Ụka ọọwa, iFinẹhasị wuleji, yẹ angị ju ọmwụ nya ẹla akama, ene ká ẹdụrụ onyobyi-ì kpụba.

³¹Ọhọhọ nyamwụ du kị wọọ nya ọngọ họ ang ọnyịịla, ị ka mịla oja ọnyịịla họọ gbe oyi myị oyi.

³²Ẹẹga nya agbụ nya enyi ịla iMeriba, angịnyị du agbama ju Amkpaa, ẹla nyaa ọọwa hu iMosisi ju ka ẹpwụ nya akama.

³³Ị du agbama ju iMosisi du ká ọnụ nyamwụ chákpilokoo.

³⁴Ị́ ta alọpyị ịlụwa ayịreji jaabwọ ká Amkpaa daa ehile ya nyị họ ka.

³⁵Ị mwọọgịlẹ yẹjula angị kpụ ijiga ịwẹ, juwa ba ụgbẹyị nya ọhọhọ ịtịpyọ jẹ.

³⁶Ị kpụ eteji ha ekpeku, ọọwa kpaa kaka weri.

³⁷Ị go anyị alẹng nyaa kịla iya, ị ya anyị anyang nyaa ha ijiga nya ala iKenan.

³⁸Ị nwụ anyị ị-da ẹlẹlẹhẹ ka ịwẹ ododu, chị ịwọ nya anyị alẹng bala anyị anyang nyaa cheji. Ajị nyọlẹ kị yaa kịla iya ha ijiga nya ala iKenan lẹ, ị kpa ibyi wẹ ọpyị ọlẹ.

³⁹Ang ịlẹ kị họ-ọ̀ wẹ du kị la charị-charị ka, ị́ dịrẹng ahụ Ohe Oluhye kpẹẹkpẹẹ ka.

⁴⁰Ịnyị à du ká wụ ẹjẹ ta angịnyị nyang lẹ, ị tụng ànyị.

⁴¹À tụụbwọ hyaa ju ka ẹpwụtụbwọ nya alụma ịlẹ kịị baa ẹtẹ, ị mwọọgịlẹ ji ekpeleji nya aluji nyaa.

⁴²Aluji nyaa taa pyịpyị, ị ji ekpeleji nya ọngịrị nya aluji nyaa.

⁴³Ụka lụmẹ-lụmẹ à chị angịnyị nyang da, ị tị kịnyaa juwa la egbeju-ọngịrị tang, gbee ká ang onyobyi ọhọhọ nyaa kpaa ka ta ayịreji.

⁴⁴Ụka kị tị chị eko wụrụng, à yẹ ahyẹẹrwẹrwa nyaa, à wo eko ọchịchị nyaa.

⁴⁵Ọọ-lajị nyaa lẹ, à kpịtịya nya iro ọlẹ ká nwa, à pwuru irya nyang ajị nya ọháha o-gbu enyi-ka nyang.

⁴⁶À dọmwụ họ angị waa kpa rụ nya anyịhị yẹ ahyẹẹrwẹrwa nyaa.

⁴⁷Amkpaa Ohe Oluhye nyahị ee, chịhị da ká kpahị nyà bwu ẹpwụma datị-datị, chajị kahị ka jẹ-ẹ̀ jing obe, bala o-gwogbo ha ẹnyị ọlịgọgọ nyang.

⁴⁸Anụ gwogbo ha Amkpaa Ohe Oluhye nya ala Isirẹlụ, anụ gwogbo họọ gbe oyi myị oyi! Angịnyị wuu ā ya “Amẹn.” Anụ gwogbo ha Amkpaa!