Read idege EJE ỌNYỊỊLA 107 Bible Online

EJE ỌNYỊỊLA 107 - idege bible

EJE ỌNYỊỊLA 107

¹Anụ ji Ohe Oluhye obe, chajị ọ ri ọngọ ọnyịịla, ọháha o-gbu enyi-ka nyamwụ juwa gbe oyi myị oyi.

²Angịlẹ ká Amkpaa chịda wuu ā ya ogbo nyamwụ pyẹ, anụ angịlẹ wuu kọ chịda bwu ẹpwụtụbwọ nya aluji nyanụ ịnyị.

³Ọ kpanụ nyà bwu ịpyị ịlụrụ-lụrụ ẹga kanụ ri alagba, angịhyẹ nyanụ nyà bwu ọmwẹnụ-ụtụrụ bala ọmwẹnụ-obyi, angịkịla nyà bwu ẹtẹ bala edii.

⁴Angịhyẹ ga tụ ugbileji-ugbileji da, jẹ ụgbẹyị o-bwu ka epweji ọhẹ-lọhẹ ọlẹ kọ ka ri edawụ nyaa ka.

⁵Imyi bala imyi-enyi kpaa nwụ, ị nọ apịlada.

⁶Ị chị eko wụrụ Amkpaa ụka kị wẹẹ yẹ akama, ọ chaa da bwu ẹpwụ nya ajụjụ nyaa.

⁷Ọ kpaa bwu ụgbẹyị ọkpụrụrụ gbee kaka pwụ ẹga kị ye edawụ ka kpụba.

⁸Ị ji Amkpaa obe chajị nya ọháha o-gbu enyi-ka nyamwụ, bala ụkụrwọ ẹbyẹbị ịlẹ kọ họ haa-à wẹ mẹ.

⁹Ọọ ya enyi ha alimyi-enyi nwa wu ẹpwụ, angịlẹ ká imyi nwụ, ọ kaa ya ang haa ri wu ẹpwụ.

¹⁰Angịhyẹ ji ẹpwụ nya ukpowu bala ọkịlẹtụ ọ-kpụ enyi jùm-m, ị ri alagba ịlẹ kị juwa yẹ ụhị a-agba,

¹¹chajị ị la egbeju-ọngịrị tụ ẹla nya Ohe Oluhye pyịpyị, ị nyẹẹkpẹ da ọmẹjẹ nya Agụgụ.

¹²Ị kpaa ẹkpa ri eji lụkụrwọ ọnyọọngịrị ọhọhọ, ị́ chị ụchụụ mịla eji wẹwẹ, olewe nyaa-á tị ji kaka.

¹³Ị chị eko wụrụ Amkpaa ụka kị wẹẹ yẹ akama, ọ chaa da bwu ẹpwụ nya ajụjụ nyaa.

¹⁴Ọ gbaa kpehe bwu ẹpwụ nya ọkịlẹtụ ọ-kpụ enyi bala ukpowụ, chị agba nyaa eku pịla-pịla hyaa.

¹⁵Ị ji Amkpaa obe chajị nya ọháha o-gbu enyi-ka nyamwụ, bala ụkụrwọ ẹbyẹbị ịlẹ kọ họ haa-à wẹ mẹ.

¹⁶Ọ hụla ekpileku nya oje ọnyọmịla hwẹẹhwẹẹ, chị igbilo nya ije ị-kpa daa chị eku kpiki-kpiki.

¹⁷Angịhyẹ nyaa jụ ẹdụrụ ọọ-lajị nya ịhọbịrị nyaa, ajị nya ang onyobyi ịlẹ kị họ.

¹⁸Ang oriri-í chaa oru ka, hi ụkụchụ ookpokpo kị ka gbu.

¹⁹Ị chị eko wụrụ Amkpaa ụka kị wẹẹ yẹ akama, ọ chaa da bwu ẹpwụ nya ajụjụ nyaa.

²⁰Ọ ya ẹla ọlọnụ, ị la gogo, ọ chaa da bwu ọnụ nya igu.

²¹Ị ji Amkpaa obe chajị nya ọháha o-gbu enyi-ka nyamwụ, bala ụkụrwọ ẹbyẹbị ịlẹ kọ họ haa-à wẹ mẹ.

²²Ị kịla iya ji Ohe Oluhye obe, kị mwu eje nya ọkẹkẹnị rụ ụkụrwọ ịlẹ kọ họ.

²³Angịhyẹ ju agbọ nya enyi tụ ihu ọtụka da, juwa ọhị nyaa tụ ihu-ihu da.

²⁴Ị yẹ ang ịlẹ ká Amkpaa họ, ụkụrwọ ẹbyẹbyị nyamwụ ịlẹ kọọ họ ihu.

²⁵Bwula ẹla ọlọnụ nyamwụ, igbachịwụ ọtụka da, juwa gu ihu agbụ.

²⁶Enyi hu agbọ nya enyi nyaa hwaa ka uhye-ọgba, pẹ hyaa weji kaka ju ka ụjẹ-ẹmwụ wurum. Angị ju agbọ ịịwa-á tụtụm la ịlaa kaka.

²⁷Ị dọrị juwa yata lala angị nwa ere, ị́ jẹ ọlẹ kị ka hu họ datị kaka.

²⁸Ị chị eko wụrụ Amkpaa ụka kị wẹẹ yẹ akama, ọ chaa da bwu ẹpwụ nya ajụjụ nyaa.

²⁹Ọ kpụ igbachịwụ ọtụka ba, enyi o-gu agbụ kpụba kem-m.

³⁰Ugbodu kpaa nyii ọọ-lajị nya okpunyi ọwẹ, ọ kpaa lọkpunyi kele kaka pwụ ẹga o-wu ụgbọ godayị.

³¹Ị ji Amkpaa obe chajị nya ọháha o-gbu enyi-ka nyamwụ, bala ụkụrwọ ẹbyẹbị ịlẹ kọ họ haa-à wẹ mẹ.

³²Ị ka ya ụmụmẹ nyamwụ dodehe ẹ-ẹpwụ nya aluche, bala o-gwogbo họọ o-otume nya alegbeju.

³³Ọ họ ihu yẹ la ugbileji ọchọrụ, ẹmwụ-enyi kaa yẹ ri ọpyị ọchọrụ.

³⁴Ọọ họ ọpyị o-ju eyo ang ka yẹ ri ọpyị ọ-da adẹnụ, ọọ-lajị nya ang onyobyi ọhọhọ nya alụwa.

³⁵Ọọ yẹ ugbileji ka ri ẹmwụ-enyi, bala ọ-yẹ ọpyị ọkwangga la ụgbụ nya enyi.

³⁶Ọ kpa alimyi kaka kụ ụ-ụwa, lẹ, ị nwụ epweji ẹga kị ka kụ ụ-ụwa lẹlẹ.

³⁷Ị wu ọpyị nyaa ẹrụ, ya alakọnụ tọ, ị ye ang-ẹrụ wụ pwụụpwụụ.

³⁸Ọ wahị kụrụ angịnyị nyamwụ, ị pyebile, ọ họ ịna nyaa juwa pyẹ kịlahị-ịlahị.

³⁹Ụka ká aluji-í kụrwaa, chị oyoyi jwaa, juwa yaa ụhị, tụ akama bala ọjụjụ rịraa,

⁴⁰Amkpaa kaa hu ẹpẹpẹ ju angị wẹẹ taa pyịpyị, họ kị ka ga tụ ugbileji-ugbileji ịlẹ ká ụgbẹyị-ị́ da bwu ka da.

⁴¹Ọ chị alẹbyahị da bwu ẹpwụ nya ọjụjụ nyaa, ọ họ ká ugbiyegu nyaa gu anyị ju ịlaa lala ịkpịlọ.

⁴²Angị kaa họ ang ọnyịịla-á yẹ ẹlẹwẹ, ịị chị ọkẹkẹnị, alabwẹla onyobyi-í tụtụm ka họ pyịm kaka.

⁴³Angị jẹ ẹla ā kpịtịya nya ala ịwẹ, kị juwa me irya ju ọháha o-gbu enyi-ka nya Amkpaa ọlẹga nyahị mẹ. Eje Ọnyịịla nya iDevidi