Read idege EJE ỌNYỊỊLA 108 Bible Online

EJE ỌNYỊỊLA 108 - idege bible

EJE ỌNYỊỊLA 108

¹Ohe Oluhye ee, m̀ da ọkịlẹtụ hileng giri-giri lẹ, m̀ ka mwu eje bala o-gwogbọ hang! Ugbodu okpukpuru nyam ee, wuleji mẹ!

²Ẹnwụ bala ogum̀ nyam ee, anụ wuleji mẹ! M̀ ka chị ẹnụ ahị kpehe bwu ube leje omwumwu.

³Amkpaa ee, m̀ ka jing obe a-ahị nya alẹpwụma datị-datị wuu. M̀ ka mwu eje nya ogbo nyang ẹ-ẹga nya alepwoja datị-datị wuu.

⁴Ọháha o-gbu enyi-ka nyang nwà gbọnọ-gbọnọ pwụ uhye-ọgba, ọkpẹẹkpẹẹ ọlala nyang wu egbamwụ ọyị.

⁵Ohe Oluhye ee, mẹ ihi ọlala gidogboo nyang jẹ u-uhye-ọgba, ká ụmụmẹ nyang ā pyẹ yịrị odehe wuu yịrị.

⁶Chịhị da lọngịrị nya ụbwọ upwuriri nyang, ká gba angịnyị ị-hán̄g há nyang kpehe mẹ.

⁷Ohe Oluhye ya bwu ube ịgọgọ nyamwụ yẹkẹẹ, “Bwula ọkụrụ-kụrụ, m̀ ka gà ọpyị nya iChekem, m̀ ka chị Ọkpọọ nya iSukotu ebwo gịla angịnyị nyam.

⁸IGiliyadị ri ịnyam ri, ịManasẹ ri ịnyam ri, Ifurem angịdẹwụ nyam à ka bwu lẹ, iJuda ịdịrịhụ ịlẹ kam ka chụ à tị ka bwu lẹ.

⁹IMowabụ ka ri ẹja ọtabwọ nyam, m̀ ka pwọ egbatẹ nyam chị kele ka Ẹdọm ọnyọhị nyam, m̀ ka da iwuru gboo chajị nya ọ-kụrụ ala iFilisitiya kụrụ.”

¹⁰Ohe Oluhye ee, oowo à tị́ ka kpam ka epweji ọlẹ kị me egwalọ ju-ù wẹ kpá lẹẹ mẹ? Oowo tị́ ka kpam ụgbẹyị ka Ẹdọm lẹẹ mẹ?

¹¹Ohe Oluhye ee, à pwahị ịnyịlẹhị lẹ-ẹ́? Á ka kpa angịdẹwụ nyahị chị ka ẹwụ kaka-á?

¹²Dahị ụbwọ kahị kụrụ aluji nyahị me, ụbwọ ọdada o-bwu ẹga nya angịnyị ehe-é kpụ ịngịhyẹ ka.

¹³Ohe Oluhye-é ji oye nyahị lẹ, aalẹ, ahị ka la okụrụ-kụrụ, ọ ka kụrụ aluji nyahị chẹẹchẹẹ. Eje Ọnyịịla nya iDevidi ọlẹ ri nya olegbeju nya angị mwu eje