Read idege EJE ỌNYỊỊLA 109 Bible Online

EJE ỌNYỊỊLA 109 - idege bible

EJE ỌNYỊỊLA 109

¹Ohe Oluhye ọlẹ kam kaa gwogbo ha ee, ā yẹ chịng-ng kaka!

²Alọkwọ bala alọnọọkịla bịrịm kpá lẹ! Ị me ịnịịkịla bam.

³Ị yẹm dada lọnụ ọwọọwọọ nyaa, juwa bam ẹtẹ tu ododụ.

⁴Am ayịdang waa igu, raabwọ chajị nyaa, ị tị jahị mịlanya dam.

⁵Ị ya ang onyobyi nwụm uri nya ang ọnyịịla ọlẹ kam họ haa. M̀ la ọháha ẹ-ẹga nyaa, ị tị nwụm uri bwula ọ-bam ẹtẹ.

⁶Chụ ọngọ kaa leje kịrọrọ ọhẹ kọ la oluji nyam ọwẹ eje, du oluguru-ẹla ọhẹ kaka chị ẹla bọọ.

⁷Ụka kị lọọ eje, myị ká eje ā wọọ, ká abwọ ọlẹ kọ rị ā kpa inyiribyi wọọ.

⁸Chị ọhịhị nyamwụ eku kọ la kpii ká ọngọkịla ā ye iwe nyamwụ hụ!

⁹Họ ká anyị nyamwụ ā ri anyị-egu, ká ahụ nyamwụ ā ri ahụ-ogu.

¹⁰Họ ká anyị nyamwụ ā ju edawụ ka, kị ga bịlẹ ang-ang. Họ kị kwaa kpehe hi egu nya ebe ịlẹ kị kụ.

¹¹Họ ká angịlẹ kọ kpa uri ā gyọọ ang ịlẹ kọ la wuu kpa rụ, ká angga ā ye ang myị ang ịlẹ kọ la hyọọ.

¹²Ā myị ká ọngọngọhẹ ā họọ ọnahị lee ọkpẹhị rịrị anyị ịlẹ kọ ka gbu hi ka.

¹³Họ ká anyị nyamwụ wuu ā gbu, ká ọngọngọhẹ ā kpịtịya nyaa loyi ọ-ba ịnyaa ba kaka.

¹⁴Amkpaa-ā kpịtịya nya ang onyobyi ịlẹ ká adamwụ igogo anyị họ. Ang onyobyi ọlẹ ká ịnamwụ họ ā tụ biri kpong-kpong ka.

¹⁵Amkpaa-ā kpịtịya nya ịhọbịrị nyaa ụka wuu, ká angịnyị wuu ā tị deeri nyaa ịwa ayịdang gbanggbang!

¹⁶Ọwa ayịdang-ńg họ ọngọhẹ ọnahị ẹnẹhẹ lẹka. Ọ jahị da ikpehika bala alẹbyahị, nwaa tụ angị da ịlaa ụbwọ myị ka.

¹⁷Ọlọ-ọ̀ họọ la ọgaga— Ị tị̀tị̀ gọlọ jwọọ ịnyịnyị mẹ! Ọ́ọ wahị ọnyịịla ha ọngọngọhẹ ka— Ọngọngọhẹ ā tị̀tị̀ wahị kụrwọọ ka ịnyịnyị!

¹⁸Ọ́ọ gọlọ chị ụka deeji ka lala ọngịnyị à kụrụ awụrụ ụka wuu. Ọlọ ịlẹ kọọ ga ā myọọ ị-ịnyịrọ chwẹẹchwẹẹ lala ịnyaa kpụ ẹpwụ nya enyi, kị dụrwọọ ka ekpinegu lala ida nya olivu.

¹⁹Họ kị daba rọọ mẹnẹ-mẹnẹ lala apwụ, kị chọọ tingting ụka wuu lala ugba ọchọhị.

²⁰Myị ká ang ịwẹ ā ri uri oyeye nya aluji nyam, ịwa angị ya ẹla inyibyi bam.

²¹Ọngọlahị Amkpaa ee, dam ụbwọ jaabwọ ká myị ọnụ, ká chịm da bwula ọháha ọnahị ọtụka nyang mẹ.

²²M̀ ri okpehika ọlẹbyahị, ọjụjụ ọlọkịlẹtụ nyam wum ọyị a-alegu.

²³M̀ hi gewu-gewu lala ụrụrụ nya obyi. M̀ wo hụrụ gbada-gbada lala ụga-à wo eke-ata lẹ.

²⁴Arụụ nyam jam tụkpịla awụlẹ chajị nya o-ye ang ri ka. M̀ kpụ̀ egba-egba, hi ekpinegu-ekpinegu kwanchaaa lẹ.

²⁵Am à ri ẹla-ẹlẹhụ nya angịnyị wuu lẹ. Ị́ yẹm, ị nyí egbeju kile-kile juwa kpam họ.

²⁶Amkpaa Ohe Oluhye nyam ee, dam ụbwọ, chịm da bwula ọháha o-gbu enyi-ka nyang.

²⁷Họ ká aluji nyam ā jẹ kaahụ ayịdang lịlọng à wẹ ka chịm da.

²⁸Ị gọlọ jum odu mẹ, à tị́ wẹẹ wahị kụrụm lẹ. Chị oyi-oyi ju angị tụm pyịpyị, tị họ kam ọnchẹ nyang ā chị ọkẹkẹnị.

²⁹Họ ká oyi-oyi nya aluji nyam ā la gede-gede, kị ya kụrụ cheji-cheji lala awụrụ.

³⁰M̀ ka ji Amkpaa obe gboo, m̀ ka gwogbo họọ ẹ-ẹpwarịrị nya alụma,

³¹chajị ọọ tụkụ yi ikpehika, nyọka chaa da bwu ẹpwụtụbwọ nya angị ya eje nya igu waa. Eje Ọnyịịla nya IDevidi