Read idege EJE ỌNYỊỊLA 111 Bible Online

EJE ỌNYỊỊLA 111 - idege bible

EJE ỌNYỊỊLA 111

¹Anụ gwogbo ha Amkpaa! M̀ ka kpa ọkịlẹtụ nyam wuu ji Amkpaa obe ẹ-ẹpwarịrị nya angịnyị nyamwụ.

²Ahyu! Ụkụrwọ ịlẹ ká Amkpaa họ chakpa la ẹbyẹbyị lụmẹ! Angịlẹ ká ụkụrwọ ịwẹ wuu kpaa ịpyọ kaa kụ irya ju etu nyaa.

³Ang ịlẹ wuu ká Amkpaa-á họ, Ịị la ihi-ihi bala ọ-kpụ ẹhị, ang ọnyịịla ọhọhọ nyamwụ kaa juwa pyịyọọ.

⁴Ọngọngọhẹ-ẹ́ ka jẹ-ẹ̀ deeri nya ụkụrwọ ịlẹbyẹbyị nyamwụ myị ka. Amkpaa ri ọlọnahị, ọ ri ọngọ yẹ ahyẹẹrwẹrwa.

⁵Ọọ ya ang oriri ha angịlẹ kị jwọọ ihi, ọọ kpịtịya nya iro ọlẹ kọ nwa ụka wuu.

⁶Ọ mẹ ọngịrị ọtụka nyamwụ jẹ angịnyị nyamwụ bwula ọ-ya ịpyị nya alụma ịkịla haa.

⁷Ohe Oluhye họ kpẹẹkpẹẹ, ọ họ kpakpa ẹ-ẹpwụ nya ang myị ang ịlẹ kọọ họ. Ehile nyamwụ wuu ju ọdahịhile.

⁸Ị ka godayị rịrị gbe oyi myị oyi, ị ya yeji bwula ẹla nya ịlẹhị bala ọkpẹẹkpẹẹ.

⁹Ọ chị angịnyị nyamwụ da, ọ nwa irọ o-gbe oyi myị oyi taa. Ọ lịgọgọ la, ọ lihi la!

¹⁰Ihi nya Ohe Oluhye ọ-ka juju à ri ụgbẹyị o-bwu jẹ ẹla lẹ. Ọọ ya ẹla ọjẹjẹ rige-rige ha angịlẹ wuu kị ba ọmẹjẹ nyamwụ jẹ. Anụ gwogbo họọ gbe oyi myị oyi!