Read idege EJE ỌNYỊỊLA 115 Bible Online

EJE ỌNYỊỊLA 115 - idege bible

EJE ỌNYỊỊLA 115

¹Amkpaa ee, oyina guhi gu, ịịnyahị koo, ịnyang ahụ ụbwọng ịnyị! Ogbo ogwogwo wuu ri nyang, chajị nyọlẹ ká ọháha bala ọkpẹẹkpẹẹ nyang-ńg kaa gbu enyi ka.

²Ịyẹ tị́ du ká ẹpwụma ị-jẹ Ohe-ka kà tọhị wo yẹkẹẹ, “Ohe Oluhye nyanụ tị́ ji alẹ ji-īì?”

³Ohe Oluhye nyahị juwa e-epwoohe, ọọ họ ịngịngịhyẹ kọ tịtọ nyọka họ.

⁴Ijiga nyaa ịwa ri ekpeku ịlẹ kị kpa okpoko onyoowuru bala okpoko ịgọm họ, angịnyị ehe à kpa ụbwọ nya ịlaa haa lẹ.

⁵Ị ju ịnụ ju-ù wẹẹ, ị́ tị jẹ-ẹ̀ kpa ya ẹla ka. Ị ju ahị ju ịnyịnyị, ị́ tị jẹ-ẹ̀ kpa yọyị ka.

⁶Ị ju arụ, ị́ tị jẹ kpaa wo ẹla ka. Ị ju ikwinyi ju ịnyịnyị, ị́ tị jẹ kpa wo oru kpong-kpong ka.

⁷Ị ju abwọ, ị́ tị jẹ-ẹ̀ ya gu ang ka. Ị ju apatẹ, ị́ tị jẹ kpa jẹdịyẹ ka. Ụkpụrọkọ nyaa-áà họ ụnụ kụrẹkẹ ka.

⁸Angị kpa ụbwọ kpa haa-a họ, tụ angị dahị hilaa-hile wẹwẹ, ịwa wuu la ookpọkpo lawụlẹ-awụlẹ bala ekpeku ịlẹ kị họ.

⁹Anụ ala Isirẹlụ ee, anụ dahịhile Amkpaa mẹ! Ọwa-à ri ọngọdụbwọ nyanụ lẹ. Ọwa-à ri ọkụmada nyanụ lẹ.

¹⁰Anụ angịkiliya alugbiyegu nya Erọn ee, anụ dahịhile Amkpaa mẹ! Ọwa-à ri ọngọdụbwọ nyanụ lẹ. Ọwa-à ri ọkụmada nyanụ lẹ.

¹¹Anụ angị kaa gbịgba ha Amkpaa ee, anụ wuu, anụ dahịhile Amkpaa mẹ! Ọwa-à ri ọngọdụbwọ nyanụ lẹ. Ọwa-à ri ọkụmada nyanụ lẹ.

¹²Amkpaa kaa me irya juhi, Ọ ka wahị kụrụụhị. Ọ ka wahị kụrụ ala Isirẹlụ, Ọ ka wahị kụrụ angịkiliya alugbiyegu nya Erọn.

¹³Amkpaa ka wahị kụrụ angịlẹ kịị gbịgba họọ, ó-ri ká angịịwa-à ri angịtụka riri ị́ ri angị ichiche riri, ọ ka wahị kụrwaa.

¹⁴Amkpaa-ā ya anyị hanụ ma, anụ tụ anyị nyanụ.

¹⁵Amkpaa-ā wahị kụrụụnụ, ọwa ọngọ họ uhye-ọgba bala odehe ā wahị kụrụụnụ.

¹⁶Amkpaa họ uhye-ọgba oluhye gụgụ wuu ha ịlọmwụ, ọ tị ya odehe hahị ahị angịnyị ehe.

¹⁷Egu ka jẹ-ẹ̀ gwogbo ha Amkpaa ka, ị rụ ka ẹga nya ujiji olejegu lẹ.

¹⁸Ahị angị ịhịhị tị lẹ, ahị ka gwogbo ha Amkpaa lẹẹlẹẹ bala gbe oyi myị oyi. Anụ gwogbo ha Amkpaa!