Read idege EJE ỌNYỊỊLA 116 Bible Online

EJE ỌNYỊỊLA 116 - idege bible

EJE ỌNYỊỊLA 116

¹Amkpaa hám chajị ọ kaa ke ụrụ lam, ọ kaa wo abwọ ọrịrị nyam.

²Ọ kaa ke ụrụ lam, ụka myị ụka kam be ẹkọ wụrwọọ.

³Uhi nya igu ogbugbu yẹm dada, uhi nya ejegu tụ jum chwẹẹ, ọkịlẹtụ nyam myị luhi ojuju bala uko ọchịchị.

⁴Ọọwa, m be ẹkọ wụrụ Amkpaa yẹkẹẹ, “Amkpaa ee, chuchuu, chịm da mẹ!”

⁵Amkpaa la ahyẹẹrwẹrwa bala ọháha, Ohe Oluhye nyahị ri ọlọnahị.

⁶Amkpaa kaa chẹwụ ke angị la ụbwọ ọdada ka, ụka kam ji ẹga oluhi-uhi, ọ chịm da.

⁷Ọkịlẹtụ nyam ee, la ahị ọdahile mẹ, chajị Amkpaa la ọháha u-uhye nyam.

⁸Amkpaa chịm da bwu ẹpwụ nya igu, ọ chị egbejida nyam ju. Ọọwa, ọ họ kam la ọkụrụ-kụrụ lẹlẹ.

⁹Ọọwa du kam jẹ jẹdịyẹ ịlahị nya Amkpaa am̀ odehe nya angị ịhịhị lẹ.

¹⁰M̀ juwa ẹ-ẹpwụ nya ọmyịmyị gbee da ka ụka kam yẹkẹẹ, “M̀ gbu hụrụ lẹ!”

¹¹Ụka kam ju uhi, m yẹkẹẹ, “Ọngọngọhẹ-ẹ́ ju ahị ọdahile ka.”

¹²Ịyẹ m tị́ ka hu ha Amkpaa, chajị nya ọháha nyamwụ ọlẹga nyam?

¹³M̀ ka ya ere kịla iya ha Amkpaa, nyọka jọọ obe nyọlẹ kọ chịm da.

¹⁴Ẹ-ẹpwarịrị nya angịnyị nyamwụ, m̀ ka họ ọnụ ọmyịmyị nyam jịra.

¹⁵Ọ ri ẹla o-wu Amkpaa hyụụ ụka ká ọngọhẹ nya angịnyị ịkpẹẹkpẹẹ nyamwụ-ụ́ gbu.

¹⁶Amkpaa ee, m̀ ri ọnchẹ nyang, m̀ gbịgba hang jaabwọ ká ịnam kaa họ, ahụ à chịm da bwu ẹpwụ nya igu lẹ.

¹⁷M̀ ka kịla iya hang lobe ojiji, ahụ ụbwọng m ka raabwọ ha lẹ.

¹⁸M̀ ka họ ọnụ ọmyịmyị nyam jịra ị-ịlahị nya angịnyị nya Amkpaa.

¹⁹M̀ ka họ ọnụ ọmyịmyị nyam jịra ẹ-ẹpwa nya Amkpaa ụ-ụwa i-iJerusalẹm kpangga. Anụ gwogbo ha Amkpaa!