Read idege EJE ỌNYỊỊLA 118 Bible Online

EJE ỌNYỊỊLA 118 - idege bible

EJE ỌNYỊỊLA 118

¹Anụ ji Amkpaa obe, chajị ọ ri ọngọ ọnyịịla! Ọháha o-gbu enyi-ka nyamwụ juwa gbe oyi myị oyi.

²Ala Isirẹlụ wuu ā yẹkẹẹ, “Ọháha o-gbu enyi-ka nyamwụ juwa gbe oyi myị oyi.”

³Angịkiliya anyị ịtụma nya Erọn ā yẹkẹẹ, “Ọháha o-gbu enyi-ka nyamwụ juwa gbe oyi myị oyi.”

⁴Angịlẹ wuu kị kaa gbịgba ha Amkpaa ā yẹkẹẹ, “Ọháha o-gbu enyi-ka nyamwụ juwa gbe oyi myị oyi.”

⁵Ẹ-ẹpwụ nya ọjụjụ, m be ẹkọ wụrụ Amkpaa, ọ wẹ abwọ ọrịrị nyam bwula ọ-gbam kpehe.

⁶Amkpaa juwa tam lẹ, ḿ ka chị uko nya ịngịngịhyẹ kaka, oowo tị́ ka họm ịngịngịhyẹ họ myị-ị̀?

⁷Amkpaa à ri ọngọdam ụbwọ lẹ, ọọwa, m̄ ka yẹ eji ọkaka nya aluji nyam lẹ.

⁸Ọ hagụ nyọka dahịhile Amkpaa ọkọkọ nyọka ya irya nịrọ ongịnyị ehe.

⁹Ọ hagụ nyọka dahịhile Amkpaa ọkọkọ nyọka ya irya nịrọ alegbeju.

¹⁰Iru nya aluji dagaga jum, m̀ tị taa ayịreji bwula ọngịrị nya Amkpaa.

¹¹Ị dagaga jum ịkịka ọnyị myị ọnyị, m̀ tị taa ayịreji bwula ọngịrị nya Amkpaa.

¹²Ị wẹ tuuu lala iru nya inwa, ị tị rụ ila hụrụ hyàhyaahya ahyaahị lala ejwo, bwula ọngịrị nya Amkpaa, m̀ taa ayịreji.

¹³Ị ma uya tam juwa ka kụrụm kụrụ kpá myị ịnọ lẹ, Amkpaa tị dam ụbwọ.

¹⁴Amkpaa họ kam la gogo bala ọ-la ọngịrị, ọwa-à chịm da lẹ.

¹⁵Anụ ke ụrụ wo ụkwa ọchịchị nya ọkụrụ-kụrụ ẹ-ẹpwa nya angịnyị nya Ohe Oluhye, ọngịrị ọtụka nya Amkpaa-à họ ụkụrwọ ọwẹ lẹ.

¹⁶Ọngịrị nyamwụ kpa ọkụrụ-kụrụ wahị, ọngịrị ọtụka nyamwụ ọ-ọgbẹwụ.

¹⁷Ḿ ka gbu ka, m̀ ka hịhị kam ka ya ụkụrwọ ẹbyẹbyị nya Amkpaa dodehe.

¹⁸Ọ yẹm akama onyobyi-obyi, ọ́ tị tụ him gbu ka.

¹⁹Anụ wụrụ ọnang nya Ube Ịgọgọ da ham, m̀ ka jụ kele kaka ji Amkpaa obe.

²⁰Ogirigba nya Amkpaa a lẹẹ lẹ, alabwẹla ọnyịịla kem à ka jụ ka ụwa lẹ.

²¹Amkpaa ee, m̀ gwogbo hang, chajị a ke ụrụ ham, a ya ọkụrụ-kụrụ ham.

²²Ẹjwọ ọlẹ ká angị nwụ ịnawụ pwa, nyị́ ju apyobwuna ka, ọwa-à yẹ ka ri ẹjwọ ọlẹ kọ baba gụ wuu lẹ.

²³Ang ọlẹ ká Amkpaa họ a wẹ lẹ, ọ chakpa la ẹbyẹbyị ẹ-ẹhị nyahị!

²⁴Alẹ ri ahyẹẹnụ ọlẹ ká Amkpaa họ, āhị chị ọkẹkẹnị bala ọ-ya ụya jwọọ!

²⁵Chịhị da mẹ, Amkpaa ee, chịhị da, Ya ịlahị ọkaka hahị.

²⁶Ohe Oluhye ā juwa ta ọngọlẹ kọ wẹẹ warị lẹnyị nya Amkpaa! Ahị wahị hang bwu Ube Ịgọgọ nya Amkpaa.

²⁷Amkpaa-à ri Ohe Oluhye lẹ, ọ la ọháha u-uhye nyahị, anụ kpa ábwọ nya ekeji a-abwọ, kanụ dọmwụ nya ẹwụ ọchịchị dọgịlẹ ju ogidi.

²⁸Ahụ a ri Ohe Oluhye nyam lẹ, m̀ ka jing obe, m̀ ka ya ụmụmẹ nyang dodehe.

²⁹Anụ ji Amkpaa obe, chajị ọ hiigu, ọháha o-gbu enyi-ka nyamwụ juwa gbe oyi myị oyi.