Read idege EJE ỌNYỊỊLA 119 Bible Online

EJE ỌNYỊỊLA 119 - idege bible

EJE ỌNYỊỊLA 119

¹Angịlẹ ká ọhịhị nyaa-á ju abyị ka, kịị hịhị ba ehile nya Amkpaa jẹ, angịịwa ka pyẹ̀ẹẹ.

²Angịlẹ kị ba ehile nyamwụ jẹ, kị juwa jwọọ ihi lọkịlẹtụ nyaa wuu, angịịwa ka pyẹ̀ẹẹ.

³Angịịwa-á kaa họ ang ọtịpyọ ọhẹ-lọhẹ ka, ịị jẹdịyẹ bwu ụgbẹyị nya Amkpaa.

⁴Amkpaa ee, ahụ a ya ehile nyang hahị, ā byihi ahị nyị kpa họ ụkụrwọ kpẹẹkpẹẹ lẹ.

⁵Ang pyii kam ka la kpẹẹkpẹẹ, ẹ-ẹpwụ nya ehile nyang ọkpakpa.

⁶Ó-ri kam kpahị ju ehile nyang yẹẹyẹẹ, oyoyi-í ka jum ka.

⁷Jaabwọ kam wẹẹ jẹ eje ọlala ọkpẹẹkpẹẹ nyang wẹẹ, m̀ ka gwogbo hang bwu ẹpwụ nya ọkịlẹtụ ocheri-cheri.

⁸M̀ ka kpa ehile nyang wuu, ḿ ka pẹhyaa deeji ka.

⁹Anyị alụjụ à tí ka bwu la ọhịhị ọcharị-charị-ị̀? Bwula ihi nya ehile nyang ojuju ịnyị.

¹⁰Bwu ẹpwụ nya ọkịlẹtụ nyam wuu, m̀ kaa maga kam ka gbịgba hang, ā myị kam pẹhi ehile nyang ọkpakpa deeji ka.

¹¹M̀ ya ehile nyang nọ ẹ-ẹpwụ nya ọkịlẹtụ nyam, chajị kam ka họ ọhọbịrị bang ka.

¹²Amkpaa ee, m̀ gwogbo hang, mẹ ụgbẹyị nyang jẹm mẹ.

¹³M̀ ka kpa ma ya gboo, ehile ịlẹ ká da wuu.

¹⁴Ọ ham kam ka ba ehile nyang jẹ, gụ ọ-ka la ang myị ang wuu.

¹⁵M̀ kaa wụla ehile nyang yẹ, m̀ ka dẹhị wụla ọmẹjẹ yẹ.

¹⁶Ehile nyang kpụm ịpyọ, ḿ ka deeri la ehile nyang ka.

¹⁷Họm am ọnchẹ nyang ọnahị, chajị kam ka hị, kam ka ju ihi nya ọmẹjẹ nyang.

¹⁸Wụrụ ahị nyam, chajị kam ka yẹ ang ẹbyẹbyị ịla ehile nyang.

¹⁹M̀ jam odehe ọlẹ lụka okpii kem ịnyị, á ya ehile nyang kpịbaa him ka.

²⁰Ọkịlẹtụ nyam kaa babọọnya ụka wuu nyọka jẹ ehile nyang.

²¹A kaa gbile alọbọọchẹ ụbwọ ụ-ụrụ, ọlọ nyang juwa ha angị myị ju ihi nya ehile nyang ka.

²²Gbam kpehe bwu ẹpwụ nya ẹhụ bala ido ododo nyaa, chajị m̀ kaa kpa ehile nyang kpẹẹkpẹẹ.

²³Ịdịrịhụ tọ awụlẹ nyọka me obyi jum, m̀ tị ka kịnyaa la ẹla nyang ọjẹjẹ.

²⁴Ọmẹjẹ nyang kaa kpụm ịpyọ, ịwa-à kaa mẹ ẹla jẹm lẹ.

²⁵M̀ nọ e-ekuruwa lọkịlẹtụ o-kpụ enyi, wulem eji jaabwọ ká myị ọnụ ham.

²⁶M̀ ya iwe-ahụrụ nyam jeng, à wo lam, mẹ ụgbẹyị nyang jẹm mẹ.

²⁷Dam ụbwọ kam jẹ ehile nyang, aalẹ, m ka kpa ọmẹjẹ nyang me irya ju.

²⁸Ọjụjụ myịm pwẹẹpwẹẹ, jum ọngịrị jaabwọ ká myị ọnụ ham.

²⁹À họ kam cheji ba ụgbẹyị ọtịpyọ, ẹ-ẹpwụ nya ọháha nyang, a mẹ ehile nyang jẹm.

³⁰M̀ chị eje nyọka ju uhi nya ẹla nyang, m̀ kaa kpẹhị ju eje ọlala nyang.

³¹Amkpaa ee, m̀ kaa ba ọmẹjẹ nyang jẹ, ā myị ká oyoyi ā jum ka!

³²M̀ ka cheri kam ka kpa ehile nyang, chajị a juwa ke ụrụ lam gụ olene.

³³Amkpaa ee, mẹ etu nya ehile nyang jẹm, aalẹ, m ka kpaa ụka wuu.

³⁴Ya ehile nyang jem, chajị kam ka kpaa, m̀ ka kpaa lọkịlẹtụ nyam wuu.

³⁵Họ kam ka kpa ehile nyang, chajị ẹ-ẹpwụ nyaa m kaa ye ọkẹkẹnị lẹ.

³⁶Họ ká ọkịlẹtụ a bem anya nyọka kpa ehile nyang, gụ ọ-ka tịtọ nya ụdụ ọkpụkpụ.

³⁷Kpam cheji ba ang i-ju apyobwuna ka, mẹ ọháha nyang jẹm jaabwọ ká myị ọnụ ham.

³⁸Họ ọnụ ọmyịmyị nyang jịra ẹ-ẹga nyam am ọnchẹ nyang, ọnụ ọlẹ ká myị ha angị myị lang.

³⁹Chim da bwu ẹpwụ nya ido ọlẹ kọ ri uhi nyam, ehile nyang chakpa la ẹbyẹbyị.

⁴⁰M̀ tịtọ kam ka kpa ehile nyang, ya ọhịhị onyeewe ham, chajị a ri ọlabwẹla ọnyịịla.

⁴¹Amkpaa ee, mẹjẹm jaabwọ kam hang kaka ba, ka chịm da jaabwọ ka ọnụ ọmyịmyị nyang ri.

⁴²Ọọwa, m ka jẹ-ẹ̀ wẹ angịlẹ kị wẹẹ dom ido lẹ, chajị m dahịhile ẹla nyang.

⁴³Họ kam ya ẹla nya ịlẹhị ụka wuu, chajị ahị ọdahile nyam juwa ẹ-ẹga nya eje ọlala nyang.

⁴⁴M ka kpa ehile nyang ụka myị ụka, gbe oyi myị oyi.

⁴⁵M̀ ka hị ẹ-ẹpwụ nya ịlọm ọlala nya ịlẹhị, chajị m kaa maga nyọka kpẹhị ju ẹla ọmẹjẹ nyang.

⁴⁶M̀ ka ya ehile nyang dodehe ẹ-ẹga nya ịdịrịhụ, oyoyi-í ka jum ka.

⁴⁷Ọ kpụm ịpyọ nyọka kpa ehile nyang, chajị ehile nyang ham.

⁴⁸M̀ ka ju ihi bala ọ-la ọháha ẹ-ẹga nya ehile nyang, m̀ kpa ọmẹjẹ nyang kpụ ịlọm ịtịya ụka myị ụka.

⁴⁹Aa kpịtịya nya ọnụ ọlẹ ká myị ham am ọnchẹ nyang, ọ kaa ya ahị ọdahile ham.

⁵⁰Ẹ-ẹpwụ nya akama ọyẹyẹ nyam, m̀ ye ẹjẹ ọkụpkpụ, chajị ọnụ ọmyịmyị nyang ya ọhịhị ham.

⁵¹Alọgọm ọchịchị juwa hụlọ ahụ jum, ḿ tị pẹhi ehile nyang ka.

⁵²M̀ kpịtịya nya eje ọlala nyang ọlụka onyogo, Amkpaa ee, ị kaa ya ẹjẹ ọkpụkpụ ham.

⁵³Ụka kam yẹ alọkwọ kị juwa bịrị ehile nyang, agbama kaa jum.

⁵⁴Lụka nya ọhịhị okpii nyam olodehe ọlẹ, ehile nyang a ri egbeju nya eje omwumwu nyam lẹ.

⁵⁵Amkpaa ee, alepwodu, m ka kpịtịya nyang, m ka me irya ju ehile nyang.

⁵⁶M̀ kaa ye ọkẹkẹnị ẹ-ẹpwụ nya ehile nyang ọkpakpa.

⁵⁷Amkpaa ee, ahụ a ri ang ọlẹ wuu kam tịtọ kem lẹ, m̀ myị ọnụ nyọka kpa ehile nyang.

⁵⁸M̀ bịlẹng bwu ẹpwụ nya ọkịlẹtụ nyam wuu ká ka yẹm ahyẹẹrwẹrwa, jaabwọ ká myị ọnụ ham.

⁵⁹M̀ kaa kpahị ju abwẹla nyam, m̀ myị ọnụ nyọka dịrẹ ọmẹjẹ nyang.

⁶⁰La ọ-họ atịmẹ ka, m̀ chị agaga nyọka ju ihi nya ehile nyang.

⁶¹Alọkwọ kaa da ụnya gbem, ḿ tị kaa deeri nya ehile nyang ka.

⁶²Alepwodu m kaa wuleji nyọka gwogbo hang, chajị nya eje ọkpakpa ọlala nyang.

⁶³M̀ ri igu ta angịlẹ wuu kị kaa gbịgba hang, bala angịlẹ wuu kị kpa ehile nyang.

⁶⁴Amkpaa ee, odehe wuu myị la ọháha o-gbu enyi-ka nyang, mẹ ehile nyang jẹm.

⁶⁵Amkpaa ee, à họ ọnụ ọlẹ ka myị jịra, à la ọháha ẹ-ẹga nyam am ọnchẹ nyang.

⁶⁶Ya ẹla ọjẹjẹ bala ang ọjẹjẹ ham, chajị m dahịhile ehile nyang.

⁶⁷M̀ kaa họpyị ene ká ka yẹm akama, ọlẹẹlẹẹ lẹ, m la ẹla nyang lẹ.

⁶⁸À chakpa haá! À chakpa-à họ ang ọnyịịla! Mẹ ehile nyang jẹm.

⁶⁹Alọgọm ọchịchị me ọnọọkịla bam, bwu ẹpwụ ọkịlẹtụ nyam wuu, m̀ tị kaa kpa ehile nyang.

⁷⁰Angịịwa-á la ẹla ọjẹjẹ kpong-kpong ka, ehile nyang ọkpakpa tị kpụm ịpyọ.

⁷¹Akama ọyẹyẹ nyam ham, chajị ọ mẹjẹm jaabwọ kam ka bwu kpa ehile nyang.

⁷²Ehile ọlẹ ká dam baba ham, gụ okpoko olodehe ọlẹ wuu.

⁷³À họm, à chẹwụ kem, ya ẹla ọjẹjẹ ham, chajị kam ka jẹ ehile nyang.

⁷⁴Angịlẹ kị kaa jung ihi kaa chị ọkẹkẹnị ụka kị chẹhị yẹm, chajị m̀ la ahị ọdahile u-uhye nya ọnụ ọmyịmyị nyang.

⁷⁵Amkpaa ee, m̀ jẹ ká eje ọlala nyang la kpakpa, à kaa yẹm akama ẹ-ẹpwụ nya ọkpẹẹkpẹẹ ọlala nyang.

⁷⁶Myị ká ọháha o-gbu enyi-ka nyang a ya ẹjẹ ọkpụkpụ ham, jaabwọ ká myị ọnụ ham am ọnchẹ nyang.

⁷⁷Yẹ ahyẹẹrwẹrwa nyam chajị kam ka hị, ehile nyang kpụm ịpyọ.

⁷⁸Họ ká oyoyi ā ju angị chị ọgọm, chajị nyọlẹ kị me ọnọọkịla bam, am lẹ m̀ ka kpa ehile nyang me irya ju ụka wuu.

⁷⁹Họ ká angịlẹ kị jung ihi ā wẹ ẹga nyam, angịlẹ wuu kị jẹ ehile nyang.

⁸⁰Họ kam kpahị ju ehile nyang kpẹẹkpẹẹ, chajị kam ka ka eji ka.

⁸¹Amkpaa ee, m̀ hi kpèke-kpèke lẹ, m̀ juwa godayị gbeng ká ka chịm da, m̀ la ahị ọdahile u-uhye nya ẹla nyang.

⁸²M̀ ya ẹhị rịrị tata gbe ọ-họ jịra nya ọnụ ọmyịmyị nyang, ọọwa, m̄ towo yẹkẹẹ, “Ụka oyina ā tị́ ka dam ụbwọ mẹ?”

⁸³Ḿ ju apyobwuna nya ịngịngịhyẹ kaka, lala akwọ nya ere oluhwo-luhwo, tị kpọkpọọkpọ, ḿ ka deeri la ehile nyang ka.

⁸⁴Anyị m̄ tị ka godayị tata kaka ba? Ụka oyina a tị ka yẹ angị bam ẹtẹ akama?

⁸⁵Alọgọm ọchịchị ịlẹ kị kaa kpa ehile nyang ka, chị ụjẹ da kam ka chabwọ kpụ.

⁸⁶Ehile nyang ju ọdahịhile, angịnyị kpa ọnọọkịla omeme tụm pyịpyị. Dam ụbwọ me!

⁸⁷Ịnọ ị nwụm nwụ daarụ kpá myị lẹ, ḿ tị tụ hi ehile nyang deeji ka.

⁸⁸Bwula ọháha o-gbu enyi-ka nyang, chị ọhịhị nyam da, chajị kam ka kịnyaa juwa kpa ehile nyang mẹ.

⁸⁹Amkpaa ee, ẹla nyang yeji giri-giri e-epwoohe gbe oyi myị oyi.

⁹⁰Ọkpẹẹkpẹẹ ọlala nyang ka godayị gbe oyi myị oyi, ahụ à ya odehe yeji, ọ godayị-ị̀ wẹ kpọọ lẹ.

⁹¹Ang myị ang wuu godayị kpọọ daalẹ, bwula ehile ọlẹ ọlẹ ká da, chajị ang ịlẹ ká họ wuu ri nya anchẹ nyang.

⁹²Ó-ri ehile nyang kịị ya ọkẹkẹnị ham ka lẹẹ, ịnọ m̀ tị́ ka gbu ta ẹpwụ nya akama nyam lẹ.

⁹³Ḿm̀ tụụbwọ hi ọmẹjẹ nyang beji ka, bwulaa ā kpam lọhịhị lẹẹ lẹ.

⁹⁴M̀ ri ịnyang, chịm da mẹ! M̀ kaa ma ju ịlọm nyọka kpa ehile nyang.

⁹⁵Alọkwọ kụ ịnya gbem nyọka nwụm, m̀ tị ka kpa ehile nyang me irya ju.

⁹⁶M̀ yẹ nyori ang myị ang wuu la ẹga kọọ há ba, ehile nyang kẹnẹ-kẹnẹ à la ọbaba kaka lẹ.

⁹⁷Ehile nyang chakpa hám, ọwa m̄ kaa kpa me irya ju ụka wuu lẹ.

⁹⁸Ehile nyang họ kam jẹ ẹla gụ aluji nyam, ehile ịịwa-à kaa kpam ụgbẹyị ụka wuu lẹ.

⁹⁹M̀ jẹ ang gụ angịị mẹ ang jẹm wuu, chajị m̀ kaa kpa ọmẹjẹ nyang me irya ju.

¹⁰⁰Ẹla ọjẹjẹ nyam kpa gụ ịnya angịgbahị, chajị m̀ kaa ba ehile nyang jẹ.

¹⁰¹M̀ cheji ba ang onyobyi ọhọhọ ọnyị myị ọnyị, chajị kam ka jẹ-ẹ̀ ju ihi nya ẹla nyang.

¹⁰²Ḿ gu ahị gboo hi ọmẹjẹ nyang ka, chajị ahụ lịlọng à ri ọngọmẹjẹ nyam lẹ.

¹⁰³Ẹla ọlọnụ nyang chakpa kpụm ịpyọ, ọ lam gẹnẹ-gẹnẹ gụ inwa.

¹⁰⁴Bwula ehile nyang m̄ kaa jẹ ang lẹ, ịnyị à du ká ụgbẹyị ọtịpyọ ọnyị myị ọnyị wụm ẹjẹ lẹ.

¹⁰⁵Ẹla nyang ri otinika nya ẹta nyam, ọ ri ahịgboo ha ụgbẹyị ọlẹ kam juwa bwu.

¹⁰⁶M̀ nwa iro, ma nwa nyọka kpa ehile ịnyịịla nyang.

¹⁰⁷Amkpaa ee, akama nyam lụmẹ kpụ elego lẹ! Jaabwọ ká myị ọnụ lẹ, ya ọngịrị onyeewe ham kam hị mẹ,

¹⁰⁸Amkpaa ee, ye obe ọlẹ kam wẹẹ jing, ká mẹ ehile nyang jẹm.

¹⁰⁹M̀ kpa igbeene a-abwabwọ ụka wuu, ḿ tị deeri nya ehile nyang ka.

¹¹⁰Alọkwọ gbụrụ ụnya da gbem, ḿ tị pẹhi ehile nyang deeji ka.

¹¹¹Ehile nyang à ri ang ọlala nyam gbe oyi myị oyi lẹ, ịwa-à kaa ya ọkẹkẹnị ha ọkịlẹtụ nyam lẹ.

¹¹²M̀ chị eje nyọka kpa ehile nyang lẹ, nyọka kpaa pwụ ọbaba nya ọhịhị nyam.

¹¹³Angịnyị ị-da ọhụ-ogo, da ọhụ-amwụ kaa wụm ẹjẹ, ehile nyang tị hám.

¹¹⁴Ahụ à ri ẹga ọkpịbaa bala ọkụmada nyam lẹ. Ẹla nyang m̄ dahịhile lẹ.

¹¹⁵Anụ angị họ ang onyobyi, anụ tụ kịnya him pyíiì, chajị kam jẹ ju ihi nya ehile nya Ohe Oluhye nyam!

¹¹⁶Jaabwọ ká myị ọnụ ham lẹ, aa ya ọngịrị ham kam ka jẹ-ẹ̀ hị.

¹¹⁷Yụbwọ chịm, kam ka la okpunyi, chajị kam ka kpahị ju ehile nyang ụka wuu.

¹¹⁸À kaa pwa angị hwahị hi ehile nyang, ihwirihwa nyaa ịwẹ wuu ri ododu.

¹¹⁹Alọkwọ wuu lang lala ajeyi ịlẹ kaa tụ hụrụ, ịnyị à du ká ọmẹjẹ nyang hám lẹ.

¹²⁰M̀ há kpakpaakpa ọọ-lajị nyang, m̀ ju uhi nya eje ọlala nyang.

¹²¹M̀ họ ang ọlẹ kọ la kpakpa bala o-ri ọnyịịla, ā tụ him ga ha aluji nyam koo.

¹²²Godayị ká yubwọ nyam am ọnchẹ nyang nyọka dam ụbwọ, ā myị ká alọbọọchẹ ā tụm pyịpyị ka.

¹²³M̀ ya ẹhị rịrị gbeng gbee ká ka wẹ kaka chịm da lẹhị tọyị lẹ, m̀ ga erunggbo gbeng ká ka gbam kpehe jaabwọ ka myị ọnụ.

¹²⁴Kpam am ọnchẹ nyang jaabwọ ká ọháha ọ-gbu enyi-ka nyang la, ká mẹ ehile nyang jẹm.

¹²⁵Am ọnchẹ nyang ịnyị, họ kam jẹ ang rige-rige, chajị kam ka jẹ ọmẹjẹ nyang.

¹²⁶Amkpaa ee, ọ nwà ká ka họ ácháà lẹ! chajị angị inyibyi wẹẹ bịrị ehile nyang.

¹²⁷Ịnyịlẹhị lẹ, ehile nyang haḿ gụ okpoko ịgọm, ị hám gụ okpoko ịgọm ọlẹ kọ ri ọlahịchịng gụ wuu.

¹²⁸M̀ kaa ba ehile nyang wuu jẹ, ịnyị à du ká ụgbẹyị ọtịpyọ ọnyị myị ọnyị wụm ẹjẹ lẹ.

¹²⁹Ọmẹjẹ nyang la ẹbyẹbyị, ịnyị à dụ kam kaa ju ihi nyaa lọkịlẹtụ nyam wuu lẹ.

¹³⁰Ẹla nyang ọmẹjẹ kaa ya ahịgboo ha ọngịnyị, ọ kaa ya ẹla ọjẹjẹ ha igbodiya.

¹³¹M̀ babọọnya nyọka wo ehile nyang gbee kam chị ịhụ tà, pyọ ọnụ da kpokoo.

¹³²Ji kpata wẹ ẹga nyam, ká yẹm ahyẹẹrwẹrwa, jaabwọ ká kaa họ ẹ-ẹga nya angịlẹ ká há.

¹³³Gbe ẹta-ẹdịyẹ nyam jaabwọ ká myị ọnụ, ā myị ká ang onyobyi ā kụrụm ka.

¹³⁴Gbam kpehe hi ụbwọ nya angị wẹẹ yẹm ụhị, chajị kam ka ju ihi nya ehile nyang.

¹³⁵Yẹm am ọnchẹ nyang lẹhị nya ọnahị, ká mẹ ehile nyang jẹm.

¹³⁶Egbejida da ọ̀bá lala ihu, chajị angịnyị myị kpa ehile nyang ka.

¹³⁷Amkpaa ee, à chakpa ri ọlabwẹla ọnyịịla, ehile nyang wuu la kpakpa.

¹³⁸Ehile ịlẹ ká da wuu la kpakpa, ị pwoku bala o-ju ọdahịhile.

¹³⁹Agbama nyam wuru pwuu lala ila, chajị aluji nyam-ḿ hu ehile nyang nya ịngịngịhyẹ ka.

¹⁴⁰Ọnụ ọmyịmyị nyang dayị rịrị giri-giri lẹ, ịnyị à du kọ hám lụmẹ ịnyị lẹ.

¹⁴¹Ḿ kpụ ẹhị-ka lẹ, ọngọhẹ-ẹ́ hum nya ịngịngịhyẹ ka, tị kpọkpọọkpọ, ḿ ka deeri la ehile nyang ka.

¹⁴²Abwẹla ọnyịịla nyang ka godayị gbe oyi myị oyi, ehile nyang ri nya ịlẹhị.

¹⁴³Akama bala imahị myịm kpá pwẹẹpwẹẹ lẹ, ehile nyang tị kpa ọkẹkẹnị wam.

¹⁴⁴Ehile nyang la kpakpa, họ kam ka jaa chajị kam ka hị.

¹⁴⁵Amkpaa ee, m̀ chị eko wụrụng lọkịlẹtụ nyam wuu, wẹm mẹ aalẹ, m̀ ka ju ihi nya ehile nyang.

¹⁴⁶M̀ chị eko wụrụng lẹ, chịm da mẹ, chajị kam ka kpa ehile nyang.

¹⁴⁷M̀ wuleji lewu-ụtụrụ kwiri-kwiri juwa chị eko bịlẹ ụbwọ ọdada nyang, m̀ da ọkịlẹtụ nyam hile ọnụ ọmyịmyị nyang lẹ.

¹⁴⁸M̀ nọ lahị lodu-odu gbee ká ahị pyẹ, nyọka juwa kpa ọnụ ọmyịmyị nyang me irya ju.

¹⁴⁹Bwula ọháha o-gbu enyi-ka nyang, wo omyi nyam, Amkpaa ee, ẹ-ẹpwụ nya ahyẹẹrwẹrwa nyang, chị ọhịhị nyam da.

¹⁵⁰Angị tụm pyịpyị inyibyi juwa tụ wẹ ọnaabwọ nyọka mwẹla tam, ị́ jẹ ọgụ nya ehile nyang kpong-kpong ka.

¹⁵¹Amkpaa ee, ahụ tị jum chwẹẹ, ehile nyang ri nya ịlẹhị.

¹⁵²M̀ jẹ ang chajị nya ọmẹjẹ nyang gbalẹ-gbalẹ nyori à hwaa nọ kị ka godayị gbe oyi myị oyi.

¹⁵³Chẹhị yẹ akama nyam wẹẹ, ká chịm da chajị ḿ deeri la ehile nyang ka.

¹⁵⁴Ya ẹla chẹkpẹ jum, ká chịm da mẹ, chịm da jaabwọ ká myị ọnụ mẹ.

¹⁵⁵Alọkwọ ka jẹ-ẹ̀ wu ọchịda ọyị myị ka, kị myị ju ihi nya ehile nyang ka.

¹⁵⁶Amkpaa ee, ahyẹẹrwẹrwa nyang chakpa lụmẹ, chịm da bwula ẹla ọ-họ kpakpa nyang.

¹⁵⁷Aluji bala angị tụm pyịpyị chakpa ju iru, tị kpọkpọọkpọ, ḿ tụ hi ehile nyang ọkpakpa ka.

¹⁵⁸Angị la kpẹẹkpẹẹ ka ịwẹ kị myị kpa ehile nyang ka-à wẹẹ, ị wụm ẹjẹ tịpyọ-tịpyọ.

¹⁵⁹Amkpaa ee, me irya jaabwọ ká ọmẹjẹ nyang hám kaka ba wẹẹ, chị ọhịhị nyam da bwula ọháha o-gbu enyi-ka nyang.

¹⁶⁰Ẹla ọlọnụ nyang wuu ri nya ịlẹhị, ehile ịkpẹẹkpẹẹ nyang wuu godayị rịrị gbe oyi myị oyi.

¹⁶¹Alegbeju tụm pyịpyị ịịlẹ timajẹ, am tị kaa ju ihi nya ehile nyang.

¹⁶²M̀ chị ọkẹkẹnị ju ẹla nyang lala ọngịnyị à chị kẹkẹ ju ang-ụdụ ọlẹ kọ kpa bwu ẹwụ.

¹⁶³Ọnọọkịla omeme wụm ẹjẹ, nyim oru pwuuu, ehile nyang tị hám.

¹⁶⁴Ụgbabwọ irwiye gbẹgbịlẹ ẹ-ẹpwụ nya ahyẹẹnụ ọnyị myị ọnyị m̀ kaa jing obe, chajị nya ehile ịkpakpa ịlẹ ká da.

¹⁶⁵Angịlẹ ká ehile nyang há ji ẹpwụ nya okpunyi ọlam-ọlam, ịngịngịhyẹ-ẹ́ ka họ ị ka mileji myị ka.

¹⁶⁶Amkpaa ee, m̀ godayị gbeng ká ka chịm da, m̀ kaa ba ehile nyang jẹ.

¹⁶⁷M̀ kaa ju ihi nya ehile nyang, ị hám ka ọkịlẹtụ nyam wuu.

¹⁶⁸M̀ kaa ju ihi nya ehile bala ọmẹjẹ nyang, à jẹ ang myị ang ịlẹ wuu kam kaa họ.

¹⁶⁹Amkpaa ee, ke ụrụ lida nya ụbwọ ọdada ọlẹ kam wẹẹ je, họ kam jẹ ang rige-rige jaabwọ ká myị ọnụ.

¹⁷⁰Ke ụrụ wo abwọ ọrịrị nyam, chịm da jaabwọ ká myị ọnụ.

¹⁷¹M̀ ka gwogbo hang ọgwọgụ, chajị à mẹ ehile nyang jẹm.

¹⁷²M̀ ka mwu eje rụ ẹla nyang, chajị ehile nyang wuu la kpakpa.

¹⁷³Nwụlanọ nyọka dam ụbwọ ụka wuu, chajị m̀ chị eje nyọka ba ehile nyang jẹ.

¹⁷⁴Amkpaa ee, m̀ jam ya ẹhị nọ gbeng ká ka chịm da, ehile nyang kpụm ịpyọ.

¹⁷⁵Ya ọhịhị ham, chajị kam ka gwogbo hang, ká ọmẹjẹ nyang ā dam ụbwọ.

¹⁷⁶M̀ rụ hwahị lala ọkpịlọ obyibyi, aa teleko nyam am ọnchẹ nyang mẹ, chajị ḿ deeri nya ehile nyang ka. Eje ọ-kpa gbịgba