Read idege EJE ỌNYỊỊLA 132 Bible Online

EJE ỌNYỊỊLA 132 - idege bible

EJE ỌNYỊỊLA 132

¹Amkpaa ee, aa kpịtịya nya iDevidi tụ akama ịlẹ kọ yẹ wuu.

²Ọ la ọnụ ọmyịmyị hang, ọ nwa iro hang ahụ Agụgụ Ohe Oluhye nya iJekọbụ lẹẹ yẹkẹẹ,

³“M̄ ka rụ ka ẹpwa nyam lee ọ-nọnọ mwụ ịnyọ ka,

⁴ḿ ka kpa une ka ẹhị lee ọ-myị une ka rụm ka

⁵gbee kam ka họ ẹgẹhẹ ha Amkpaa, ẹpwa ọlẹ ká Agụgụ Ohe Oluhye nya iJekọbụ ka kụ.”

⁶Ahị wo ẹla nya Akpa nya Iro pwụ ịBẹtịlẹhẹm, ahị yọọ ẹ-ẹrụ nya ala ịJarim.

⁷Ahị ya āhị kele ka ẹpwa nya Amkpaa, kahị gbịgba ẹ-ẹga nya ẹchị-adịrahụ nyamwụ mẹ lẹlẹ.

⁸Amkpaa ee, wuleji, ká jụ ka Ube Ịgọgọ nyang la Akpa nya Iro ọlẹ kọ ri ẹjẹẹ nya ọngịrị nyang mẹ.

⁹Angịkiliya nyang ā họ ang opwoku ụka wuu, ká angị ịkpẹẹkpẹẹ nyang ā mwu eje nya ọkẹkẹnị mẹ.

¹⁰Aa chajị nyọlẹ ká iDevidi ri ọnchẹ nyang mẹ, ā pwa adịrahụ ọlẹ kaahụ ayịdang chụ ka.

¹¹À nwa iro ta iDevidi, iro ọlẹ ká ka myị-ị̀ tụụbwọ hi beji ka. À nwa iro ọọwa tọọ yẹkẹẹ, “Ọnyị-ọnyị nyang ọhẹ m̄ ka hu ri adịrahụ lẹ, ọwa-à ka hụ ẹ-ẹchị nyang ụka ká ụka nyang á myị lẹ.

¹²Ó-ri ká anyị nyang-ńg ju ihi nya iro nyam, kị ba ehile ịlẹ kam daa jẹ aalẹ, anyị nyaa-à tịtị ka hụ ẹ-ẹchị-adịrahụ nyang pyịyọọ lẹlẹ.”

¹³Amkpaa chụ ịSayọn lẹ, ọ tịtọ nyọka hu ụwa nya ẹpwa nya ịlọmwụ.

¹⁴Ọ yẹkẹẹ, “Ẹga kam ka kụ gbe oyi myị oyi à wẹ lẹlẹ. M̀ ka kụ am̀, chajị ẹgẹlẹ à ri ẹga kam tịtọ lẹ.

¹⁵M̀ ka họ ọbaba nya ịSayọn wuu họọ, m̀ ka ya ang oriri ha alẹbyahị ịlụwa wuu ri wu ẹpwụ.

¹⁶M̀ ka họ ka angịkiliya ịlụwa ka kpa ọchịda wẹ angịnyị, ká angị kpẹẹkpẹẹ ịlụwa wuu ka mwu eje nya ọkẹkẹnị.

¹⁷M̀ ka hu ọnyị ọtụma nya iDevidi ọhẹ adịrahụ ọlẹ kọ ka la ọngịrị ọtụka-ọtụka, adịrahụ ọlẹ kam chụ ka ri ahịgboo ha angịnyị nyam.

¹⁸M̀ ka chị oyoyi ju aluji nyamwụ, ọwa tị ka ri adịrahụ ọlụmụmẹ.” Eje nya iDevidi ọ-kpa gbịgba