Read idege EJE ỌNYỊỊLA 135 Bible Online

EJE ỌNYỊỊLA 135 - idege bible

EJE ỌNYỊỊLA 135

¹Anụ gwogbo ha Amkpaa! Anụ gwogbo ha ẹnyị nyamwụ! Anụ anchẹ nya Amkpaa ee, anụ gwogbo ha Amkpaa!

²Anụ angịlẹ kanụ-ụ̀ myị ẹrụ ẹ-ẹpwa nya Amkpaa, ẹ-ẹpwụ nya Ube Ịgọgọ nya Ohe Oluhye nyahị,

³anụ gwogbo ha Amkpaa, chajị ọ ri ọngọ ọnyịịla, anụ mwu eje gwogbo ha ẹnyị nyamwụ, chajị ọ ri ọlọnahị.

⁴Amkpaa chụ iJekọbụ ha ịlọmwụ, ọ chụ ala Isirẹlụ kị ka ri nyamwụ lụbwọ-lẹta.

⁵M̀ jẹ ká Amkpaa nyahị lụmẹ, ọngọlahị lụmẹ gụ ijiga wuu.

⁶Amkpaa kaa họ ang myị ang ọlẹ kọ ri irya nyamwụ u-uhye-ọgba bala odehe, tụ ihu ịtụka bala ụjẹ-ẹmwụ ịlẹpwụ nyaa.

⁷Ọ họ egbamwụ kaa bwu ọbaba nya odehe, ọ họ apya tụ enyi ododo da, ọ pẹhi igbachịwụ bwu ẹga kọ wọọ kụrụ.

⁸Ọ nwụ anyị nya ọgbanyẹ nya ala Ijipiti, anyị nya angịnyị ehe tụ ịnya iyo ileji wuu.

⁹Ọ họ ang i-ju ẹjẹẹ bala ụkụrwọ ẹbyẹbyị Ijipiti, nyọka yẹ adịrahụ bala alụkụrwọ nyamwụ akama.

¹⁰Ọ ta ẹpwụma lụmẹ-lụmẹ ayịreji, ọ nwụ iru nya ịdịrịhụ ịlọngịrị.

¹¹Ọ nwụ iSihọn adịrahụ nya ala Amọ, bala Ọọgụ adịrahụ nya ala ịBachan, tụ ịdịrịhụ nya ala iKenan wuu.

¹²Ọ ya ịpyị nyaa ha angịnyị nyamwụ, ọ ya ha ala Isirẹlụ la lụbwọ-lẹta.

¹³Amkpaa ee, ẹnyị nyang ka juwa gbe oyi myị oyi, ohi oruru nyang ka wu aloyì ọnyị myị ọnyị ọyị.

¹⁴Amkpaa ka ya eje rụ angịnyị nyamwụ, ọ ka yẹ ahyẹẹrwẹrwa nya anchẹ nyamwụ.

¹⁵Ijiga nya ẹpwụma ịkịla ri ang ịlẹ kị kpa okpoko onyoowuru bala okpoko ịgọm họ, angịnyị ehe à kpa ụbwọ nya ịlaa haa lẹ.

¹⁶Ị ju ịnụ ju-ù wẹẹ, ị́ tị jẹ-ẹ̀ kpa ya ẹla ka. Ị ju ahị ju ịnyịnyị, ị́ tị jẹ-ẹ̀ kpa yọyị ka.

¹⁷Ị ju arụ, ị́ tị jẹ kpaa wo ẹla ka, ị́ dọmwụ jẹ-ẹ̀ da ịhụ pweee ka.

¹⁸Angị kpa ụbwọ kpa haa-a họ, tụ angị dahị hilaa-hile wẹwẹ, ịwa wuu la ookpọkpo lawụlẹ-awụlẹ bala ekpeku ịlẹ kị họ.

¹⁹Anụ ala Isirẹlụ, anụ gwogbo ha Amkpaa! Anụ angịkiliya alugbiyegu nya Erọn, anụ gwogbo ha Amkpaa!

²⁰Anụ ala iLivayị, anụ gwogbo ha Amkpaa, anụ angị ju ihi nya Amkpaa wuu, anụ gwogbo họọ.

²¹Ogbo ā ri nya Amkpaa ị-ịSayọn, ụ-ụwa i-iJerusalẹm ẹpwa nyamwụ. Anụ gwogbo ha Amkpaa!