Read idege EJE ỌNYỊỊLA 139 Bible Online

EJE ỌNYỊỊLA 139 - idege bible

EJE ỌNYỊỊLA 139

¹Amkpaa ee, a wụlam yẹ kpete-kpete, à jẹm yẹẹyẹẹ.

²Ḿ hụhụ hụ, à jẹ, ḿ dayị da kọkọ, à jẹ, à jẹ irya ịlẹ kam kaa me ó-riri ká ji lụrụ.

³À jẹ ẹga myị ẹga kam juwa ka bala ẹga kam juwa mwụ ịnyọ. À jẹ ang myị ang ọlẹ kam kaa họ wuu.

⁴Ene kam ka gba ẹla kpehe bwu ọnụ nyam kpá, à jẹ ẹla ọlẹ kam wẹẹ ka ya lẹ.

⁵À ji ẹkpẹ nyam ji, ji ịlahị nyam ji, à yụbwọ nyang chẹwụ kem.

⁶Ẹla ọjẹjẹ ụma ọwẹ la kpori-kpori ka kpoye, ọ lụmẹ kịlam-kịla la ọjẹjẹ.

⁷Ale kpá m̄ tị́ ka jẹ-ẹ̀ rụnyẹ rụ ka nyọka be hi olegu nyang-ǹg? Ale m̄ tị́ kà rụ ka ká juwa ụ-ụwa ka-à?

⁸Ḿ wule ka epwoohe, à juwa ụ-ụwa! Ḿ nọnọ e-ejegu, à tị ka juwa ịnyịnyị!

⁹Ḿ ju achwọ kpụ kam hụ̀ ka ẹga ká ẹnụ-ụ̀ kpehe bwu, lee kam kele kaka kụ ọ-ọbaba nya ihu ọlọmwẹnụ-obyi,

¹⁰ahụ-ahụ à ka kpam ụ-ụwa lẹ, ọngịrị-ọngịrị nyang à ka dam ụbwọ ụ-ụwa lẹ!

¹¹Ó-ri kam ka jẹ-ẹ̀ byi ukpowu kọ ka kpụm ịbaa, ká ahịgbọọ ọdagaga jum ā yẹ ri odu ohihi mẹ,

¹²ukpowu-úù tị chị owu ẹ-ẹga nyang ka, odu ohihi họ hwooo lala ahị ọpyẹpyẹ. Ukpowu bala ahịgboo la ookpokpo ẹ-ẹga nyang.

¹³Ahụ à họ ẹga nya ịnyịrọ nyam wuu lẹ, ahụ à tụm gá awụlẹ nọ ẹ-ẹpwụ nya ịnam lẹ.

¹⁴M̀ gwogbo hang, chajị à la uhi-uhi bala ẹbyẹbyị, ang ịlẹ ká họ wuu la ẹbyẹbyị, m̀ jẹ ọọwa lịlọm yẹẹyẹẹ lẹ.

¹⁵À jẹ ụka ká ịnyịrọ nyam wẹẹ dọmwụ, ụ-ụwa ẹ-ẹpwụ nya ịnam, jaabwọ kam juwa nwa ịnyịnyịịnyị ẹ-ẹpwụ nya ịbaa.

¹⁶À yẹm ene kịị mam. Ị da ẹnụtụrụ nya ọhịhị nyam wuu ju kpẹẹkpẹẹ ẹ-ẹpwụ nya ụpwụ nyang ene ká ọhẹ-lọhẹ nyaa-à dọmwụ.

¹⁷Amkpaa ee, irya ịlọkịlẹtụ nyang wuu chakpa lam nyaanyaa la ọjẹjẹ, ịwa wuu tụ ju lawụlẹ ju iru kịlọnụ!

¹⁸Ḿ ya mam waa họhẹ-heeye mẹ, ị ju iru gụ ugburuja wẹẹ, ụka kam chị ahị une, m̀ meme lang gbẹgbịlẹgbẹ!

¹⁹Ohe Oluhye ee, ang pyíiì ká ka nwụ alọkwọ, ká alabwẹga ka bahim mwụ ịnyọ kem!

²⁰Ịị ya ala inyibyi bang, juwa kpa ẹnyị nyang họ ang ododu.

²¹Amkpaa ee, angịlẹ ká waa ẹjẹ wẹẹ, ị chakpa tịtị wụm ẹjẹ! Angị la egbeju-ọngịrị tang ịwẹ tụm ànyị lụmẹ píiì!

²²Ị wụm ẹjẹ tịpyọ-tịpyọ, m̀ waa nya aluji nyam.

²³Ohe Oluhye ee, wụlam yẹ rige-rige, ká jẹm, mam yẹ, ká jẹ irya ịlọkịlẹtụ nyam.

²⁴Wụlayẹ ó-ri ká ang onyobyi ọhẹ-ẹ́ ji ẹpwụ nyam aalẹ, ká kpam dịrẹ ụgbẹyị nya ọhịhị ọmyịmyị-ka. Eje Ọnyịịla nya iDevidi ọlẹ ri nya olegbeju nya angị mwu eje