Read idege EJE ỌNYỊỊLA 14 Bible Online

EJE ỌNYỊỊLA 14 - idege bible

EJE ỌNYỊỊLA 14

¹Eje Ọnyịịla nya iDevidi ọlẹ kọ da ha olegbeju nya aleje. Oboogo byi ịlọmwụ yẹkẹẹ, “Ohe Oluhye-é ji ka.” Angị ịlịnyị wuu byịbyị, ịị họ ang onyobyi. Ọngọngọhẹ nyaa aa họ ang ọnyịịla ka.

²Amkpaa kaa chẹhị bwu epwoohe wẹ eji kaka yẹ angịnyị ehe, kọ ka yẹ ó-ri ká ọngọhẹ ọ-jẹ ẹla-á ji, ọlẹ kọ kaa gbịgba họọ.

³Ma, ịwa wuu tị hwahị lẹ. Ị byịbyị lawụlẹ-awụlẹ. Ọngọngọhẹ lẹpwụ nyaa aa họ ang ọnyịịla ka. Á ka ye ọngọ ookpokpo ụpẹnị-ụpẹnị ka.

⁴Amkpaa tịtọ wo yẹkẹẹ, “Ọọwa ri alabwẹla onyobyi ịwẹ wuu-ú jẹ ẹlẹlẹhẹ pyịnyẹng kaka-á? Ị juwa họ angịnyị nyam ri ịnyịnyịịnyị. Ị́ myị raabwọ ham ka.”

⁵Uhi ọtụka-ọtụka ka jwaa, chajị Ohe Oluhye hụ ta alabwẹla ọnyịịla.

⁶Alabwẹla onyobyi ka du obyi omeme nya alẹbyahị óchi myị, Amkpaa tị ka chẹwụ ke alẹbyahị.

⁷M̀ bịlẹ ká Ohe Oluhye ka kpa ọkụrụ-kụrụ bwu Ọgbọdọ nya ịSayọn wẹ ala Isirẹlụ. Ụka ká Amkpaa-á wahị kụrụ angịnyị nyamwụ myịmyị, ịwa ala Isirẹlụ, anyị ịtụma nya iJekọbụ wuu ka chị ọkẹkẹnị.