Read idege EJE ỌNYỊỊLA 140 Bible Online

EJE ỌNYỊỊLA 140 - idege bible

EJE ỌNYỊỊLA 140

¹Amkpaa ee, chịm da bwu ẹpwụtụbwọ nya angị inyibyi, chẹwụ kem hi alabwẹga.

²Ịị me obyi nya ang onyobyi, juwa gu ẹla rịrị e-eji ụka wuu.

³Ẹlẹlẹ nyaa ru ẹhị lala ịnya ilo, ẹla ọlọnụ nyaa ju ẹhwa lala ịgbịjị.

⁴Amkpaa ee, gbem bwu ẹpwụtụbwọ nya alọkwọ, chẹwụ kem hi alabwẹga ịlẹ kị me obyi nyọka dam ẹta mila eji.

⁵Alọbọọchẹ ya ụnya da gbem lẹ-ẹ̄, ị gbụrụ ori nyaa ịnyịnyị, ị da anya tụ ụgbẹyị-ụgbẹyị da kị ka wum.

⁶M̀ byi Amkpaa yẹkẹẹ, “Ahụ à ri Ohe Oluhye nyam lẹ.” Amkpaa ee, wo eko ọlẹ kam wẹẹ chị bịlẹ ụbwọ ọdada mẹ!

⁷Ọngọlahị Amkpaa ọngọchịmda ọtụka, à chẹwụ kem lụka nya ẹwụ ọdada.

⁸Amkpaa ee, ā họ ọbaba nya alọkwọ haa ka, ā myị ká obyi onyobyi nyaa ā chịkpẹẹ haa ka.

⁹Ā myị ká aluji nyam ā kụrụ ka. Myị ká obyi onyobyi ịlẹ kị wẹẹ me jahị dam ā yẹ ri nyaa.

¹⁰Go awụrụ-ila kụrwaa e-egbeju, chaa abwọ kpụ ụjẹ ọlẹ kị ka jẹ-ẹ̀ kpehe bwu myị ẹnẹnẹhẹ kaka.

¹¹Ā myị ká angị bịrị angịkịla ẹnyị ā ya ẹta gu eji ọ-ọpyị ọlẹ ka, akama ā tụ alabwẹga ata ju ẹbyị.

¹²Amkpaa ee, m̀ jẹ ká kaa chẹkpẹ ju ọlẹbyahị bala ọ-kaa ya ẹga da ha angị jula ọlọlọhẹ-ka.

¹³Alabwẹla ọnyịịla ka gwogbo hang ịnyịlẹhị pyii lẹ, ị ka kụ i-ijata nyang. Eje Ọnyịịla nya iDevidi