Read idege EJE ỌNYỊỊLA 141 Bible Online

EJE ỌNYỊỊLA 141 - idege bible

EJE ỌNYỊỊLA 141

¹Amkpaa ee, M̀ jam be ẹkọ wụrụng, chị agaga páaa mẹ! Aa wo lam ụka kam chị eko wụrụng.

²Ye abwọ ọrịrị nyam lala iya nya ịtangare ọlẹ kam kịla hang, ká abwọ ọ-kpa ka uhye nyam ā lala iya nya alobyi ọlẹ kam kịla hang.

³Amkpaa ee, hu ọngọgbeji gbe ọnụ nyam, ká gbe ukpileku nya egbinụ nyam.

⁴Ā myị ká ang onyobyi ọhọhọ ā mam ma kam ka yẹjula aluguru-ẹla ẹ-ẹpwụ nya ang onyobyi ọhọhọ nyaa ka. Ā myị kam ju abwọ-ang ri taa ọ-ọhụhụ nyaa ka.

⁵Angịnyị ịnyịịla-á yẹm akama lee o-yalibyi lam, ọọwa ri ọnahị kị họm, ḿ tị ka myị angị inyibyi ka ya ida hụm e-egbeju ka, chajị m̀ kaa raabwọ tụ ọhọhọ inyibyi nyaa pyịpyị ụka wuu.

⁶Ụka kị chị alegbeju nyaa abwọ bwu ụka onwúu lẹ, alọkwọ ịwẹ à ka jẹ ká ẹla nyam ri nya ịlẹhị lẹlẹ.

⁷Jaabwọ ká ọlẹrụ kaa be egburu-ịpyị ene kpa ẹrụ wu, ịnyịnyị-ịnyịnyị ekpinegu nyaa à ka bene wo pịla-pịla hi awụlẹ ọ-ọnụ nya iworu lẹ.

⁸Amkpaa Ohe Oluhye ee, ẹhị nyam nọ wẹ ẹga nyang, ahụ à ri ẹga ọkpịbaa nyam lẹ, ā pẹhim kị nwụm koo.

⁹Kpam cheji ba anya ịlẹ kị ya da gbem, bala o-kem hi iri ịlẹ ka angị họ ang inyibyi da.

¹⁰Myị ká alọkwọ ịwẹ ā kụ ụwa ya ẹta wu anya ịlẹ kịịwa ayịdang da, kam ā rụ gịlala lokpunyi.