Read idege EJE ỌNYỊỊLA 143 Bible Online

EJE ỌNYỊỊLA 143 - idege bible

EJE ỌNYỊỊLA 143

¹Amkpaa ee, ke ụrụ wo abwọ ọrịrị nyam, wo ọbịlẹ-bịlẹ nyam! Aa wẹm ẹ-ẹpwụ nya abwẹla ọnyịịla bala ọkpẹẹkpẹẹ ọlala nyang!

²Ā lam am ọnchẹ nyang eje koo, ọngọngọhẹ-ẹ́ ri oroohu-charị a-ahị nyang ka.

³Aluji nyam durwe nyam nwẹhị lẹ, ị dum abwọ kpá yịgẹ-yịgẹ, hum ju ka ẹpwụ nya ukpowu lala angịlẹ kị gbu juwa o-odolowu tataata lẹ.

⁴Lẹẹlẹ, m̀ jam chị ẹpẹtẹkẹẹ lẹ, m̀ ji ẹpwụ nya imahị ọtụka.

⁵M̀ kpịtịya nya igbalẹ, juwa me irya nya ang ịlẹ ká họ wuu, m̀ kụ irya ju ụkụrwọ ịlẹ ká kpa ụbwọ nyang họ.

⁶M̀ hu abwọ nyam hwaa juwa raabwọ hang, imyi nyang nwụm jaabwọ ká imyi-enyi kaa nwụ ọpyị ọchọrụ.

⁷Amkpaa ee, wẹm páaa mẹ, ọlẹgu nyam kpụ ịbwọ lẹ. Ā yahị chị ọka him ka, ó-ri ịnyị ka aalẹ, m̀ ka lala angị gbugbu lẹ-ẹ.

⁸Kpụm ịtịya nya ọháha o-gbu enyi-ka nyang ẹnụ myị ẹnụ lụtụụrụ, chajị ahụ m̄ dahịhile lẹ. Mẹ ụgbẹyị ọlẹ kam ka bwu jẹm, chajị ahụ m̄ wẹẹ raabwọ ha lẹ.

⁹Amkpaa ee, m̀ rụnyẹ wẹ ẹga nyang kaka kpịbaa lẹ, chịm da bwu ẹpwụtụbwọ nya aluji nyam mẹ.

¹⁰Mẹjẹm kam ka họ irya nyang, chajị ahụ à ri Ohe Oluhye nyam lẹ. Myị ká olegu ọdụmwọ nyang ā kpam bwu ụgbẹyị ọpẹẹpẹẹ.

¹¹Amkpaa ee, aa chịm da chajị nya ẹnyị nyang, gbam kpehe hi akama ẹ-ẹpwụ nya abwẹla ọnyịịla nyang.

¹²Ajị nya ọháha o-gbu enyi-ka nyang ọlẹga nyam, aa tụ aluji nyam ẹhị pịrị, ta angị tụm pyịpyị wuu ayịreji, chajị m̀ ri ọnchẹ nyang. Eje Ọnyịịla nya iDevidi