Read idege EJE ỌNYỊỊLA 144 Bible Online

EJE ỌNYỊỊLA 144 - idege bible

EJE ỌNYỊỊLA 144

¹M̀ gwogbo ha Amkpaa ọngọ chẹwụ kem, ọngọ mẹ ẹwụ ọdada jẹm, ọngọ jum agidi nya ẹwụ.

²Ọ ri ọngọ chẹwụ kem, epweji ọnyọọngịrị nyam ọlẹ kị me ugulọ dagaga ju. Ọ ri ọngọ ma uya yẹm dada bala ọngọchịmda, ọkụmada bala ẹwụ ọ-chị ke nyam, ọ dam ụbwọ wu angịnyị nyam kpa.

³Amkpaa ee, ịyẹ tị́ ká angịnyị jung apyobwuna-à? Ịyẹ tị́ du kaa me irya jwaa ee-è?

⁴Angịnyị-ị̀ chịpwụrụ lala ọhụ ọ-da pwèèè, ọhịhị nyaa la kpii lala ụrụrụ ọlẹ kọọ myị yịra-yịra.

⁵Amkpaa ee, myẹ uhye-ọgba hwẹẹẹ, ká hireji warị wẹẹ. Ya ịnyịrọ gu ịgbọdọ chajị kị nyí ịmwụ kpúrúkpúrú wẹẹ.

⁶Chị apya kpowu ká nyí aluji nyang epepe mẹ! Da ịcha ịcha nyang chajị kị mwụ ata bịmwụ.

⁷Nịra ụbwọ nyang kpàaa bwu uhye, ká gbam kpehe bala ọ-chịm da bwu ẹpwụ nya enyi okpori-kpori. Chịm da bwu ẹpwụtụbwọ nya angga.

⁸Angị ịlẹ kị angị kaa ya ẹla nya ịlẹhị ụka ọhẹ-lọhẹ kpong-kpong ka. Ịị nwa iro ẹla nya ịlẹhị ịwa nyaaa ka ya lẹ, ọnọọkịla ị tị kaa me lẹ.

⁹Ohe Oluhye ee, m̀ ka mwu eje onyeewe hang. M̀ ka kpa ogum̀ mwu eje hang.

¹⁰À họ ịdịrịhụ kaa kụrụ aluji nyaa! À chị iDevidi ọnchẹ nyang da.

¹¹Chịm da bwu ẹga nya aluji inyibyi, ká gbam kpehe bwu ẹpwụtụbwọ nya angga, angị ịlẹ kị ya ẹla nya ịlẹhị ụka ọhẹ-lọhẹ kpong-kpong ka. Ịị nwa iro ẹla nya ịlẹhị ịwa nyaaa ka ya lẹ, ọnọọkịla ị tị kaa me lẹ.

¹²Ohe ā myị ká anyị alẹng nyahị ā la gogo lụka nya okolobya nyaa lala ekeji i-bwu ọ-ọpyị ọnyịịla. Ohe ā myị ká anyị anyang nyahị ā lala ịtachị ị-há ụ́hị nwurwo-nwurwo ịlẹ kị họ chajị ká ẹpwa nya adịrahụ ka há ụ́hị.

¹³Ohe ā myị kahị ye ang-ẹrụ ụma datị-datị myị ukuna nyahị pwẹẹpwẹẹ mẹ. Ohe ā myị ká ịkpịlọ ịlẹrụ nyahị ā ma ụnụnụụnọ nya anyị mẹ.

¹⁴Ohe ā myị ká ịna nyahị ā gu anyị ju ịla ọgwọgụ, ká ọhẹ-lọhẹ nyaa-ā chị ọnyị ma lee obyibyi ka. Ohe ā myị ká eko onyobyi ọhẹ ā kpeji o-opeje nyahị ka.

¹⁵Ẹpwụma ọlẹ ká iwe-ahụrụ nyamwụ-ụ́ hiigu ịịwẹ aalẹ, alụwa ka pyẹẹẹ! Angịlẹ wuu ká Ohe Oluhye nyaa-á ri Amkpaa aalẹ, angịịwa ka pyẹ̀ẹẹ! Eje nya ogbo ogwogwo ọlẹ ri nya IDevidi