Read idege EJE ỌNYỊỊLA 145 Bible Online

EJE ỌNYỊỊLA 145 - idege bible

EJE ỌNYỊỊLA 145

¹Ohe Oluhye nyam ọlẹ ká ri adịrahụ, m̀ ka mịla oja nya ụmụmẹ nyang. M̀ ka gwogbo hang gbe oyi myị.

²M̀ ka gwogbo hang ẹnụ myị ẹnụ, m̀ ka gwogbo hang gbe oyi myị oyi.

³Amkpaa lụmẹ, Ọ chịla kahị ka gwogbo họọ, Ọngọngọhẹ-é ka jẹ-ẹ̀ jẹ ụmụmẹ nyang kpá ka.

⁴Aloyi ọnyọnyọọnyị ā ya je aloyi ọlịlahị nyaa kị kpa ụkụrwọ ịtụka ịlẹ ká họ ya ma ya.

⁵M̀ ka me irya ju ụmụmẹ bala ihi ọtụka ọlẹ ká la, m̀ ka me irya ju ụkụrwọ ẹbyẹbyị nyang.

⁶Angịnyị wuu ka ya ẹla rụ ụkụrwọ iluhi-uhi nyang, m̀ ka ya ụmụmẹ nyang dodehe.

⁷Ị ka kpịtịya nya ọnahị ọtụka nyang. Ị ka mwu eje rụ ọkpẹẹkpẹẹ nyang.

⁸Amkpaa kaa họ ọng myị ọng ọnahị, ọ kaa yẹ ahyẹẹrwẹrwa. Ọọ ju agbama hyaa ka, ọ myị̀ la ọháha.

⁹Amkpaa kaa họ ang ọnyịịla ha ọng myị ọng wuu. Ọọ yẹ ahyẹẹrwẹrwa nya angị ịlẹ wuu kọ họ.

¹⁰Amkpaa ee, ang ịlẹ ká họ wuu ka gwogbo hang. Angị ri ịnyang wuu ka gwogbo hang.

¹¹Ị ka ya ụmụmẹ nya ịpyị adịrahụ nyang dodehe. Ị ka ya ẹla nya ọngịrị nyang dodehe.

¹²Angịnyị wuu ka jẹ ang ịtụka ịlẹ kaa họ, bala ihi ọlala bala ụmụmẹ nyang.

¹³Ịpyị adịrahụ nyang ka juwa pyịyọọ, a ka ri adịrahụ gbe oyi myị oyi. Amkpaa kaa họ ọnụ ọmyịmyị nyamwụ jịra, ọọ la ọháha ẹ-ẹpwụ nya ang ịlẹ wuu kọọ họ.

¹⁴Amkpaa kaa da angị chị mileji ụbwọ, ọọ wule angị ji ẹpwụ nya akama eji.

¹⁵Ang ịhịhị wuu ya ẹhị nọ wẹ ẹga nyang kị ka ye ang oriri, a kaa ya haa-ā ri lụka ọchịla.

¹⁶À pyẹ ụbwọ nyang maaa ya ang ha ang ịdịhụ wuu ri wu ẹpwụ.

¹⁷Amkpaa kaa họ kpẹẹkpẹẹ ẹ-ẹpwụ nya ang myị ang kọ họ. Ọ myị̀ la ọnahị ọhọhọ.

¹⁸Amkpaa kaa ju angịlẹ kịị raabwọ họọ chwẹẹ— angị kaa raabwọ họọ ẹ-ẹpwụ nya ẹla nya ịlẹhị.

¹⁹Angị jwọọ ihi wuu, ọọ ya ang ịlẹ kị tịtọ bwu ẹga nyamwụ haa. Ị chị eko wụrwọọ, ọ chaa da.

²⁰Amkpaa kaa chẹwụ ke angị la ọháha ẹ-ẹga nyamwụ. Ọ tị ka ta angị họ angị onyobyi ayịreji.

²¹M̀ ka gwogbo ha Amkpaa. Alodehe wuu ā gwogbo ha ẹnyị nyamwụ gbe oyi myị oyi.