Read idege EJE ỌNYỊỊLA 147 Bible Online

EJE ỌNYỊỊLA 147 - idege bible

EJE ỌNYỊỊLA 147

¹Anụ gwogbo ha Amkpaa![12] Ọ hiigu nyọka mwu eje gwogbo ha Ohe Oluhye nyahị. Ọ kpụ ịpyọ, ọ hiigu nyọka gwogbo họọ!

²Amkpaa juwa ma iJerusalẹm nwụ́, ọ juwa kpa ala Isrẹlụ alagba nyà.

³Ọọ họ angị la ọkịlẹtụ okpenyi uda, ọọ ya abacha rị abẹ nyaa.

⁴Ọwa-à chị eje jaabwọ ká ịdịchụ ka ju iru kaka ba bala ọ-ya ẹnyị ju ọnyọnyọọnyị nyaa wuu lẹ.

⁵Ọngọlahị lụmẹ-ụmẹ, ọ lọngịrị lụmẹ. Ang ọjẹjẹ nyamwụ-ụ́ la ọbaba ka.

⁶Amkpaa kaa da ọngọ la dụmwọ ụbwọ, ọ tị kaa kpụ ọngọ onyobyi nọnọ ị-ịpyị.

⁷Anụ mwu eje ọ-kpa ji Amkpaa obe, anụ gwogbo ha Ohe Oluhye nyahị la ogum̀.

⁸Ọọ pyẹ egbamwụ maaa yịrị uhye-ọgba, ọọ do enyi ha odehe du ká amẹ-ẹ̀ bwu i-ikiti.

⁹Ọọ ya ang ha iyo ileji ri, ọọ ya ang ha ịchịnụ idu ri ụka kị be ẹkọ nya ang oriri.

¹⁰Ọngịrị ọlẹ ká ụnyịrẹ la-á ri ẹlẹhẹ nyamwụ ka, ogogo ọlala nya ọngịnyị ehe lọọ lala ụbwọ nya ọjị.

¹¹Ẹla nya angị jwọọ ihi kaa kpọọ ịpyọ, ẹla nya angị dahịhile ọháha ọlẹ kọ la kaa kpọọ ugbodu nyii.

¹²Anụ ala iJerusalẹm ee, anụ gwogbo ha Amkpaa! Ee, anụ ala ịSayọn ịnyị! Anụ gwogbo ha Ohe Oluhye nyanụ!

¹³Ọ họ ká ogirigba nya epweji nyanụ la giri-giri, ọọ wahị kụrụ angịnyị nyanụ.

¹⁴Ọọ kpa okpunyi wẹ ọpyị nyanụ, bala ọ-ya ang oriri ịlahịcịng-ịlahịchịng hanụ.

¹⁵Ọ́ da odehe ehile, ịị họ ẹla ọọwa jịra la ọ-bịrị ụka ka.

¹⁶Ọọ kpụ̀ amwụ ke ịpyị lala ịnyaa ya apwụ da kụrụ ịpyị, ọọ nyi ekpawẹ epepe lala agbụ.

¹⁷Ọ do ekpawẹ lala egbangkaajwọ, oowo tị́ ka godayị gbe ohu onyirii-nyiri nyamwụ myị?

¹⁸Ọ́ da ehile, ị wulo, ọ́ da igbachịwụ, enyi mwụ.

¹⁹Ọ chị ẹla nyamwụ ehe mẹjẹ anyị nya iJekọbụ, ọ ya ehile bala ọmẹjẹ nyamwụ ha ala Isirẹlụ.

²⁰Ọ́ họ ang ọlịnyị ha alụma ọkịla ọhẹ-lọhẹ ka, ị́ jẹ ehile nyamwụ ka. Anụ gwogbo ha Amkpaa!