Read idege EJE ỌNYỊỊLA 17 Bible Online

EJE ỌNYỊỊLA 17 - idege bible

EJE ỌNYỊỊLA 17

¹Amkpaa ee, ke ụrụ wo ọbịlẹ-bịlẹ nyam u-uhye nya ẹla ọkpakpa ọhọhọ. Wo eko nya ụbwọ ọdada ọlẹ kam wẹẹ chị, ká ke ụrụ la abwọ ọrịrị nya ịlẹhị ọlẹ kam wẹẹ rị.

²Chị oku ọkpakpa ham, chajị a jẹ ang ọkpẹẹkpẹẹ.

³À wẹ ẹga nyam lodu, à wụlam yẹ tụ ẹkpẹ tụ ahị, á ye ang onyobyi ọhẹ ẹ-ẹpwụ nyam ka.

⁴Ḿm̀ ya ẹla onyobyi lala angịkịla ka. M̀ ju ihi nya ehile nyang. Ḿ dịrẹ ụgbẹyị nya ang onyobyi ọhọhọ ka.

⁵M̀ kaa dịrẹ ụgbẹyị nyang ụka wuu, ḿ pẹ hyoo ẹnẹnẹhẹ lẹka.

⁶Ohe Oluhye ee, m̀ raabwọ hang chajị à kaa wẹm. Lẹẹlẹ, kpa ụrụ chịng ká wo ẹla oyaya nyam.

⁷Chị ọháha ẹbyẹbyị nyang ehe ká chịm da. M̀ kaa be hi aluji nyam ụka kam ji ịkịka nyang.

⁸Chẹwụ kem lala ẹhị nya ịlọng. Kpụm ịbaa e-ekpeleji nya achwọ nyang.

⁹Kam be hi uya ọ-ma ta nya alabwẹla onyobyi. Aluji ịlụrụ-ụrụ dagaga jum.

¹⁰Í jujwo nya ọngịnyị ka, I ya ẹla ọbọọchẹ-ọbọọchẹ.

¹¹Ḿ jahị kpáta ka ẹgẹlẹ, ḿ jahị kpáta ka ẹga ọlaanyị, ị dagaga jum kpẹhị gọm-gọ̄ kị ka chịm ẹkpa beji.

¹²Ị kụ ịnya gbem lala egabẹ kị ka hụlam hwẹẹhwẹẹ.

¹³Amkpaa ee, kẹwẹ, bá ẹla ta aluji nyam ká kụrwaa. Chịm da la oge nyang bwu ẹpwụtụbwọ nya alabwẹla onyobyi

¹⁴bala angị ya ọhịhị nyaa wuu nịrọ ang nya odehe. Yaa akama ịlẹ ká ya nọ a-ang gbaa. Akama ịwẹ ā hi nwa anyị nyaa, kị hi nọ a-ang gbe anyị ịtụma nyaa.

¹⁵M̀ kaa yẹng chajị ḿ họ ang onyobyi ka. Ụka kam hu ẹhị hwaa, ọ-yẹng yẹ kem ya ọkẹkẹnị ham. Eje Ọnyịịla ọlẹ ká iDevidi ọnchẹ nya Amkpaa mwu ha Amkpaa ẹnụ ká Amkpaa chọọ da bwu ẹpwụtụbwọ nya ịSọlụ bala aluji nyamwụ wuu.