Read idege EJE ỌNYỊỊLA 18 Bible Online

EJE ỌNYỊỊLA 18 - idege bible

EJE ỌNYỊỊLA 18

¹Amkpaa ee, à hám nya ịlẹhị. Ahụ à ri ọngọ ma uya yẹm dada lẹ.

²Amkpaa a ri ọngọ chẹwụ kem lẹ. Ọ ri ẹga ọkpịbaa ogiri-giri nyam. Ohe Oluhye a ri ẹwụ ọ-chị ke nyam lẹ, Ẹ-ẹga nyamwụ lẹ, m̀ kụ lokpunyi. Ọ chẹwụ kem lala ọkụmada. Ọ ma uya yẹm dada, kpam lokpunyi.

³M̀ wụrụ Amkpaa, ọ chịm da bwu ẹga nya aluji nyam wuu. Anụ gwogbo ha Amkpaa.

⁴Uko nya igu ogbugbu myị jum wuu. Ejiri nya ayịreji ọtata wum.

⁵Uko nya igu ogbugbu myị jum wuu, iworu da ụnya nyamwụ gbem.

⁶M̀ wụrụ Amkpaa ẹ-ẹpwụ nya akama nyam, M̀ wụrụ Ohe Oluhye nyam bịlẹ ụbwọ ọdada. Ọ wo omyi nyam pwụ ube ịgọgọ nyamwụ. Ọ ke ụrụ la eko nya ụbwọ ọdada ọlẹ kam chị.

⁷Odehe hụ́ kpákpaakpa, hụ́ jigi-jigi, itiwe nya ịgbọdọ hụ́ kpụka-kpuka, ị hụ́ jigi-jigi chajị Ohe Oluhye wụ ẹjẹ.

⁸Ịmwụ chị juuu bwu okwinyi nyamwụ, ẹlẹlẹ-ila bala awụrụ-ila ichila beee kpehe bwu ọnụ nyamwụ.

⁹Ọ wụrụ uhye-ọgba da gbodooo. Ọ hireji legbamwụ ochowu kpịlẹẹẹ e-ekpeleji nya ẹta nyamwụ.

¹⁰Ọ wẹ lagaga u-uhye nya icherubim nyamwụ, ọ je tụ ọhụ da.

¹¹Ọ ya ukpowu ke ịlọmwụ, egbamwụ ịchụka kpọrị-kpọri la enyi ọtụka-ọtụka dagaga jwọọ.

¹²Ekpawẹ bala ila ị-chị kpowu-kpowu kpehe bwu ẹga nya apya ọchịchị nyamwụ, há hwoo bwu ẹpwụ nya egbamwụ ochowu kpịlẹẹẹ.

¹³Ọwa Amkpaa a kpụ ịkpala bwu uhye-ọgba lẹ. I wo omyi nya Agụgụ.

¹⁴Ọ da ịcha nyí aluji nyamwụ epepe, ọ kpa apya ọchịchị kwaa rụnyẹ rụ.

¹⁵Ọmwụ nya Ihu ọtụka dụwa chochoocho, itiwe nya odehe wụrụ da dodo ụka kaahụ Amkpaa yalibyi la aluji nyang ká kpaa ịkata ẹ-ẹpwụ nya agbama.

¹⁶Amkpaa nịra ụbwọ kpaaa bwu uhye wẹ eji kaka hum. Ọ gbilem kpehe bwu ụjẹ-ẹmwụ.

¹⁷Ọ chịm da bwu ụbwọ nya aluji ịnyịịngịrị bala angịlẹ wuu kam waa ẹjẹ— ịwa ayịdang lọngịrị kịlam-kịla.

¹⁸Ụka kam ji ẹpwụ nya akama, ị mwẹla tam. Amkpaa tị chẹwụ kem.

¹⁹Ọ gbam kpehe hi ẹpwụ nya ápịlada. Ọ chịm da chajị ẹla nyam họ́ọ.

²⁰Amkpaa kaa nwụm uri chajị m kaa họ ang ọnyịịla. Ọ wahị kụrụm chajị m̀ la charị-charị.

²¹M̀ ju ihi nya ehile nya Amkpaa, Ḿ ji kpáta rụ hi Ohe Oluhye nyam ka.

²²M̀ kpa ehile nyamwụ wuu, ḿ bịraa ka.

²³Ọ jẹ kam la abyị ọhẹ ka, ọ jẹ kam wu ịlọm kpa hi ang onyobyi ọhọhọ.

²⁴Lẹ, ọọ nwụm uri chajị m̀ họ kpẹẹkpẹẹ, chajị ọ jẹ kam la charị-charị.

²⁵Amkpaa, à kaa họ kpẹẹkpẹẹ ẹ-ẹga nya angị la kpẹẹkpẹẹ ẹ-ẹga nyang. À hiigu ẹ-ẹga nya angị la kpàkpa.

²⁶À la charị-charị ẹ-ẹga nya angị charị-charị, à kaa kpẹhị onyobyi yẹ alabwẹla onyobyi.

²⁷À chị angị la dụmwọ da, à kaa kpa alabwẹla onyobyi weji.

²⁸Amkpaa, ya ahịgboo ham mẹ ká ku ukpowu nyam rụ mẹ.

²⁹Ya ọngịrị ham kam mwẹla ta aluji nyam bala ọngịrị ọ-kpa kụrụ ọngịrị nyaa.

³⁰Ohe Oluhye, ụkụrwọ nyang la kpàkpa. Ẹla nyang ju ọdahịhile. Ọ lala ọkụmada ha angị tịtọ nya ẹwụ ọ-chị ke.

³¹Amkpaa ụbwọọmwụ a ri Ohe Oluhye lẹ. Ohe Oluhye ụbwọọmwụ a rị ọngịrị nyahị lẹ.

³²Ọwa-à ri Ohe Oluhye ọlẹ kọọ jum ọngịrị, bala ọ-họ ká ụgbẹyị nyam kpunyi lẹ.

³³Ọ họ kam ya ẹta rịrị e-eji giri-giri lala apyị. Ọ kpam lokpunyi ị-ịgbọdọ.

³⁴Ọ mẹ ẹwụ ọdada jẹm kam ka jẹ-ẹ̀ kpa uda ọkpụrụ-kpụrụ.

³⁵Amkpaa, ahụ à chẹwụ kem bala ọ-chịm da lẹ. Ẹhị ọ-kpa rịrị nyang họ kam kpẹ̀hị, ọngịrị nyang kpam lokpunyi.

³⁶Ahụ a gbem du kam weri ka lẹ. Ḿ mileji ẹnẹhẹ lẹka.

³⁷M̀ ku aluji nyam kaka wu, ḿ hịnyọ la o-kwaa ku ka gbee kam taa ayịreji.

³⁸M̀ kpaa ẹkpa beji, ị́ ka wuleji myị kaka. M̀ kụrwaa, kpaa nọnọ lẹ.

³⁹À ya ọngịrị nya ẹwụ ọdada ham bala ọkụrụ-kụrụ u-uhye nya aluji nyam.

⁴⁰À họ ká aluji nyam rụnyẹ rụ him. M̀ ta angị bam ẹtẹ ayịreji.

⁴¹Ị chị eko bịlẹ ụbwọ ọdada, ọngọngọhẹ-ẹ́ tị chaa da ka. Ị be ẹkọ wụrụ Amkpaa, ọ́ tị myị wo laa ka.

⁴²M̀ gyaa-gyo hịlẹ-hịlẹ lala ekuruwa ịlẹ ká igbachịwụ kaa da hụrụ. M̀ kpa ata báa mọọ-mọọ-mọọ lala ịwa ọlụgbẹyị.

⁴³À chịm da bwu ẹga nya angị mwẹla tam, à hum ri Adịrahụ nya epwụma lụmẹ-lụmẹ. Angịlẹ kam jẹjẹ ene-ene ka, yẹ ka ri alekpeleji nyam lẹẹlẹẹ lẹ.

⁴⁴Alija ịkịla kaa hirikpẹẹ jum ihi. Ụka kị wo ẹla nyam, ị kaa jum ihi.

⁴⁵Ị kpa igbeene a-abwabwọ, kpehe bwu ẹga ị-kpụ ịbaa ịnyịịgịrị nyaa juwa hụ́ kpákpaakpa lala ụrụrụ.

⁴⁶Amkpaa juwa hịhị, anụ gwogbo ha ọngọ ma uya yẹm dada. Anụ ya ụmụmẹ nya Ohe Oluhye ọngọchịmda.

⁴⁷Ọ ya ọkụrụ-kụrụ ham u-uhye nya aluji nyam. Ọ kụrụ ẹpwụma ịlẹ kị ji ekpeleji nyam.

⁴⁸Ọ chịm da bwu ẹga nya aluji nyam. Ahụ Amkpaa a họ kam kụrụ aluji nyam lẹ. Ahụ a gbam kpehe bwu ẹpwụtụbwọ nya alọkwọ lẹ.

⁴⁹Lẹẹlẹ, m̀ ka gwogbo hang ị-ịlahị nya alẹpwụma datị-datị, kam ka mwu eje gwogbo hang.

⁵⁰À ya ọkụrụ-kụrụ ịtụka ha adịrahụ ọlẹ ká chụ. À mẹ ọháha ọpyịyọọ nyang jẹ ẹ-ẹga nya ọngọlẹ ká ya ida hụ, iDevidi kpangga tụ anyị ịtụma nyamwụ gbe oyi myị oyi. Eje Ọnyịịla nya iDevidi ọlẹ kọ da ha olegbeju nya aleje