Read idege EJE ỌNYỊỊLA 19 Bible Online

EJE ỌNYỊỊLA 19 - idege bible

EJE ỌNYỊỊLA 19

¹Uhye-ọgba chị ụmụmẹ nya Ohe Oluhye ehe! Uhye-ọgba mẹ ụkụrwọ ọlẹ kọ họ jẹ gede-gede.

²Ahị ọpyẹpyẹ ọhẹ ya je ọkịla, odu ọhẹ mọ́ọ ya je odu ọkịla.

³Ị́ hụ́ ọnụ mẹẹ ka, ị́ ya ẹla ọlọnụ ya ka.

⁴Ẹrụ ọnyịịla nyaa tị wu odehe wuu ọyị, ẹla nyaa pyebile pwụ ọbaba nya odehe. Ohe Oluhye nwụ ẹpwa ha ẹnụ u-uhye-ọgba.

⁵Ẹnụ-ụ̀ kpehe bwu ube nyamwụ lụtụrụ lala ọrwahụ onyeewe, lala ọlụnyẹ, jwo ata iri nya ụnyẹ ọrụrụ.

⁶Ọ kpehe bwu ọbaba ọhẹ nya odehe kpoye ka ọkịla. Ịngịngịhyẹ-ẹ́ ka jẹ-ẹ̀ kpịbaa hi ọchịpwuu nyamwụ myị ka.

⁷Ehile nya Amkpaa la kpẹẹkpẹẹ, ọọ ya ọngịrị onyeewe ha ọngịnyị. Ehile nya Amkpaa ju ọdahịhile, ọọ ya ẹla ọjẹjẹ ha angị la ka.

⁸Ehile nya Amkpaa hiigu, angị kpọọ kpa kaa chị ọkẹkẹnị. Ehile nya Amkpaa la kpàkpa, ọọ ya ang ọjẹjẹ ha ọngịnyị.

⁹Ihi o-ju Amkpaa ju hiigu, ọ ka juwa gbe oyi myị oyi. Eje ọchịchị nya Amkpaa la kpàkpa, ọọ la kpàkpa ụka wuu.

¹⁰Eje ọchịchị ọlịnyị há ọtịtọ gụ okpoko ịgọm ọ-hágụ wuu. Ọ la gẹnẹ-gẹnẹ gụ inwa ọlịpyọ gụ wuu.

¹¹Ọ ya ẹla ọjẹjẹ ham am ọnchẹ nyang. M̀ la apyobwuna bwula ehile nyang ọkpakpa.

¹²Ọpyata-á kaa jẹ ịlọmwụ ka. Amkpaa ee, gbam kpehe hi abyị ịlịbaa nyam.

¹³Kpam cheji ba ịhọbịrị ọmamachịng họ, ā myị kị kụrụm ka. Ọọwa, m̄ ka la kpẹẹkpẹẹ bala ọ-la ịlọm bwu ẹpwụ nya ang onyobyi ọhọhọ lẹ.

¹⁴Myị ká ẹla ọlọnụ bala irya ọlọkịlẹtụ nyam ā chịla ẹ-ẹga nyang ahụ Amkpaa ẹga ọkpịbaa nyam bala ọngọgbam kpehe. Eje Ọnyịịla nya iDevidi ọlẹ kọ da ha olegbeju nya angị mwu eje