Read idege EJE ỌNYỊỊLA 2 Bible Online

EJE ỌNYỊỊLA 2 - idege bible

EJE ỌNYỊỊLA 2

¹Ịịyẹ tị́ du ka alẹpwụma ị-jẹ Ohe-ka juwa yẹkpẹ chị awụlẹ-ẹ̀[1]? Ịịyẹ tị́ du ká angịnyị juwa bịrị ịlaa ụka juwa me obyi ihideeji ododu-ù?

²Ịdịrịhụ ilodehe ọlẹ dụgba wule awụlẹ alegbeju wuu wo lawụlẹ, me obyi onyobyi jahị da Amkpaa bala adịrahụ ọlẹ kọ chụ lẹ.

³Ị juwa byi awụlẹ yẹkẹẹ, “Anụ kẹwẹ kahị chị kpuru bwu ụbwọ nyaa, kahị lịlọhị bwu ẹpwụ nya ọnyọhị nyaa oriri pyíiì.”

⁴Ma, Ọngọlahị ọlẹ kọ hụ ẹ-ẹchị adịrahụ nyamwụ e-epwoohe juwa hụlọ ẹhụ jwaa, kpaa hu utungguru.

⁵Ọọ yalibyi laa ẹ-ẹpwụ nya agbama. Ọọ chị uhi jwa la ikẹjẹ-awụrụ nyamwụ.

⁶Ọọ ya ẹla dodohe yẹkẹẹ, “M̀ ya adịrahụ ọlẹ kam hu hụhụ ẹ-ẹchị nyamwụ lẹ, ị-ịSayọn ọlẹ kọ ri Ọgbọdọ nyam m yọọ hụ lẹ.”

⁷Adịrahụ ayịdang ya ẹla ọlẹ ká Amkpaa ya rwọọ dodehe yẹkẹẹ, “Amkpaa byim yẹkẹẹ, ‘Ahụ à ri ọnyị ọlẹng nyam lẹ. Alẹ oleeri ọlẹ m̄ ri adang lẹ.

⁸Bịlẹm mẹ, m̀ ka kpa ẹpwụma wuu kaka ji ekpeleji nyang, odehe wuu gu onwu gu ọba ka ri nyang.

⁹A ka kpa otuma oloje-oje kụrụ chẹẹchẹẹ. A ka be aluji nyang ene yịgẹ-yịgẹ lala ọta.’ ”

¹⁰Lẹẹlẹ, anụ ịdịrịhụ, anụ kpa ẹla ọjẹjẹ hu ịlọnụ ẹkpẹ mẹ. Anụ alegbeju nya alodehe, anụ chị ịlọnụ ega-à wẹ mẹ.

¹¹Anụ kpa uhi ojuju myị ẹrụ ha Amkpaa.

¹²Anụ hiri ịlọnụ kpẹẹ há ọnyị-adịrahụ nya Ohe Oluhye, ó-ri ịnyị ka agbama nyamwụ ka wuru jahị danụ. Ọ ka tanụ ayịreji lụka ọmwaaa. Ikẹjẹ-awụrụ nyamwụ ka wuleji lụka ọkpahị ju ka myị. Angị kpa ịlaa kaka kpịbaa ẹ-ẹga nyamwụ aalẹ, angịịwa pyẹ̀ẹẹ lẹ!