Read idege EJE ỌNYỊỊLA 22 Bible Online

EJE ỌNYỊỊLA 22 - idege bible

EJE ỌNYỊỊLA 22

¹Ohe Oluhye nyam, Ohe Oluhye nyam ee, ịyẹ tị́ du ká nyẹẹkpẹ dam ịnyị-ị̄ị̀? M̀ mwu eru jung ká ka dam ụbwọ, ḿ tị ye ụbwọ ọdada bwu ẹga nyang ka.

²Ohe Oluhye nyam ee, m̀ be ẹkọ wụrụng lẹnụ, á wẹm ka, m̀ bebe lodu, ḿ ye ịnyọ ọmwụmwụ ka.

³Ahụ à tị ri Ọngọ Ịgọgọ adịrahụ ọlẹ ká ala Isirẹlụ kaa gwogbo ha lẹ.

⁴Adahị igogo anyị dahịhileng, ị dahịhileng, à chaa da.

⁵Ị wụrụng du kị be hi akama, ị dahịhileng, oyi-í jwaa ka.

⁶Ḿ ri ọngịnyị ehe alẹ kaka, ukpunjuju m̄ ri lẹlẹ. Angịnyị ehe wuu gbam ugu, hum nya ugugungkwọ.

⁷Angị yẹm wuu kpam hu ẹjị, gba alalẹ nyaa jum bala o-nyí egbeju kile-kile.

⁸Ị juwa kpam họ ya “À tị́-ị̀ dahịhile Amkpaa lẹ, ọ chịng da kahị yẹ-ẹ̀ wẹ mẹ. Á há Amkpaa ịnọ, ọ ka dang ụbwọ.”

⁹Ahụ a họ kị mam lokpunnyi lẹ, a kpam lokpunyi lụka nya enjwo nyam.

¹⁰M̀ dahịhileng bwu ẹnụ-ẹnụ kị mam. Ahụ a ri Ohe Oluhye nyam, mwiiji ká ịnam mam lẹ.

¹¹Ā ji hwẹẹ him ka, chajị akama ju chwẹẹ, ọngọ ka dụbwọ ọhẹ-ẹ́ tị ji ka.

¹²Aluji lụmẹ-lụmẹ dagaga jum yịrịtị̀tịịtị lala ịna. Ị yẹm dada wuu lala ekpongka nya ịna i-bwu ọpyị nya ịBachan.

¹³Ị pyẹ ịnụ nyaa da lala egabẹ, juwa warụ kìro-kìro yahị dam.

¹⁴Ọngịrị gụm myị, lala enyi à myị ta ịpyị. ekpinegu nyam wuu pyị iloo hi awụlẹ, ọkịlẹtụ nyam wulo hụrụ.

¹⁵Ụkpụrọkọ chịm ọhụ lala ekuruwa, ẹlẹlẹ nyam chịja wu ichina, à pẹhim da ha igu e-ekuruwa.

¹⁶Alogu onyobyi dagaga jum, alabwẹla onyobyi da ọya jum lala ibwu, jum ori a-abwọ bala ata.

¹⁷M̀ hi ekpinegu-ekpinegu kwancha, aluji nyam yẹm, gbẹhị dam teee.

¹⁸Ị da iwo ju ịwụrụ nyam gaa gịla awụlẹ.

¹⁹Amkpaa ee, ā hụ hwẹẹẹ him ka. Kẹwẹ lagaga ká chịm da mẹ.

²⁰Kpam be hi ẹma nya ẹwụ, chịm da hi ibwu ịwẹ.

²¹Chịm da bwu ẹga nya egabẹ ịwẹ, kpam be hi àchụ nya ẹ̄nụ ịwẹ.

²²M̀ ka ya ụmụmẹ nyang jẹ aanam, m̀ ka gwogbo hang ẹ-ẹpwụ nya aluche.

²³Gwogbo ha Amkpaa, anụ anchẹ nyamwụ. Ya ogbo họọ, anụ anyị ịtụma nya iJekọbụ, kanụ ju ihi nyamwụ, anụ-anụ anyị nya Isirẹlụ.

²⁴Ọ́ọ nyẹẹkpẹ da alẹbyahị lee o-gwahị gboo hi akama ọyẹyẹ nyaa ka. Ọ́ọ jahị kpáta hyaa ka. Ọọ myị ẹkọ ụka kị wụrwọọ kọ ka daa ụbwọ.

²⁵M̀ ka gwogbo hang ẹ-ẹpwụ nya aluche, chajị nya ang ịlẹ ká họ ham. M̀ ka họ ọnụ ọmyịmyị nyam jịra i-ijata nya angị kaa gbịgba hang.

²⁶Alẹbyahị ka ye ang ri wu ẹpwụ. Angị wẹ ẹga nya Amkpaa ka gwogbo họọ. Ị ka kịlahị gbe oyi myị oyi.

²⁷Alẹpwụma nya odehe wuu ka kpịtịya kị ka ji kpáta wẹ ẹga nya Amkpaa. Alụma ọnyị myị ọnyị ka gbịgba họọ.

²⁸Amkpaa ri adịrahụ, ọ ri Adịrahụ nya ẹpwụma ilodehe wuu.

²⁹Alọbọọche nya odehe wuu ka hirikpẹẹ họọ. Angịnyị ehe wuu, ị-jẹẹ wu ọhịhị nya ịlaa kpa myị ka ka hirikpẹẹ họọ.

³⁰Aloyi ịlịlahị ka myị ẹrụ họọ. Ị ka ya ẹla chajị nya Ọngọlahị jẹ aloyi ịlịlahị nyaa.

³¹Angịlẹ kị ka ma ị-ịlahị ka wo yẹkẹẹ, “Ọngọlahị chị angịnyị nyamwụ da.”