Read idege EJE ỌNYỊỊLA 25 Bible Online

EJE ỌNYỊỊLA 25 - idege bible

EJE ỌNYỊỊLA 25

¹Amkpaa ee, ahụ m̄ raabwọ ha lẹ.

²Ahụ Ohe Oluhye m̄ ya ahị ọdahịle nyam nịrọ lẹ. Ā myị ká aluji nyam ā kụrụm ká oyoyi ā jum ka. Ā myị kam ri ẹla-ẹlẹhụ nya aluji nyam ka.

³Angị dahịhileng wuu kaa la ọkụrụ-kụrụ, angị ya ẹhị dang bwee wuu ka mileji ẹ-ẹga nya aluji nyaa.

⁴Mẹ ụgbẹyị nyang jẹm, Amkpaa mọ́ọ jẹm kpẹẹkpẹẹ.

⁵Mẹjẹm, ká kpam hịhị ẹ-ẹpwụ nya ẹla nya ịlẹhị nyang, chajị ahụ a ri Ohe Oluhye ọngọchịmda lẹ. M̀ kaa dahịhileng ụka wuu.

⁶Amkpaa ee, kpịtịya nya ọnahị bala ọháha o-gbu enyi-ka nyang ịlẹ ká mẹjẹ orogo-orogo.

⁷Hịnyọhi ịhọbịrị bala ị-họpyị ịlụka nya enjwo nyam. Ẹ-ẹpwụ nya ọháha bala ọnahị nyang, aa kpịtịya nyam, Amkpaa!

⁸Amkpaa hiigu, ọ la kpàkpa. Ọọ mẹjẹ alọhọbịrị ụgbẹyị ọlẹ kị ka dịrẹ.

⁹Ọọ kpa angọ la dụmwọ ụ-ụgbẹyị opwoku. Ọọ mẹ irya nyamwụ jaa.

¹⁰Ẹ-ẹpwụ nya ọnụ ọmyịmyị ọ-họ jịra bala ọháha ọlala nyamwụ, ọ kaa mẹ ụgbẹyị jẹ angị kpa iro ọnwanwa bala ọ-kpa ehile nyamwụ jịra.

¹¹Amkpaa ee, họ ọnụ ọmyịmyị nyang jịra, ká hịnyọhi ịhọbịrị nyam, chajị ị ju iru.

¹²Angị ju Amkpaa ihi kà jẹ bwu ẹga nyamwụ ụgbẹyị ọlẹ kị ka bwu.

¹³Angịịwa ka pyẹ kịlahị-ịlahị. Anyị nyaa ka ye ọpyị ọlẹ la.

¹⁴Amkpaa ri oligu nya angịlẹ kịị jwọọ ihi. Ọ kaa ya iro ọnwanwa nyamwụ yeji haa.

¹⁵M̀ kaa ya ẹhị nọ gbe ụbwọ ọdada bwu ẹga nya Amkpaa ụka wuu. Ọ kaa gbam kpehe hi apịlada.

¹⁶Amkpaa ee, jahị kpáta wẹ ẹga nyam, ká yẹm ahyẹẹrwẹrwa, chajị m̀ dam nweee, jula ọlọlọhẹ ka.

¹⁷Kpụ imahị imeme nyam ba, ká chịm da bwu ẹpwụ nya akama nyam wuu.

¹⁸Kụ ẹhị yẹ ọjụjụ bala akama ọyẹyẹ nyam, ká hịnyọhi ịhọbịrị nyam wuu.

¹⁹Yẹ wẹẹ̀, aluji nyam lụmẹ! Yẹ wẹẹ̀, ị bam ẹtẹ lụmẹ!

²⁰Chẹwụ kem, ká chịm da. Ā myị kị kụrụm ka. M̀ wẹ ẹga nyang kaka kpịbaa lẹ.

²¹Ọngịnyị ọnyịịla oriri nyam bala ọngọ ya ẹla nya ịlẹhị oriri nyam ā kpẹhị rịrịm, chajị m̀ dahịhileng.

²²Chị angịnyị nyang ala Isirẹlụ da bwu ẹpwụ nya akama nyaa wuu. Eje Ọnyịịla nya iDevidi