Read idege EJE ỌNYỊỊLA 27 Bible Online

EJE ỌNYỊỊLA 27 - idege bible

EJE ỌNYỊỊLA 27

¹Amkpaa-à ri ahịgboo bala ọchịda nyam lẹ, ḿ ka ju uhi nya ọngọngọhẹ ka, Amkpaa kaa chịm da bwu ẹpwụ nya apịlada, ḿ ka chị uko ka.

²Ụka ká alabwẹla onyobyi-í gba mịlam juwa maga kị ka nwụm, ịwa angị tụm pyịpyị bala aluji nyam, ịị chị ụchụụ mileji.

³Ó-riri ká ogu nya alẹwụ-ụ́ yẹm dada, ḿ ka chị uko ka. Ó-riri ká aluji-í wuleji mwẹla tam, ọkịlẹtụ-ụ́ ka kpụm enyi ka.

⁴Ịngịhyẹ ookpokpo m̄ bịlẹ bwu ẹga nya Amkpaa lẹ. Ang ookpokpo m̄ tịtọ lẹ: ọ-ka kụ ẹ-ẹpwa nya Amkpaa lọhịhị nyam wuu kám ka gbẹhị da ụ́hị nyamwụ teee bala ọ-ka bịlọọ kọ ka kpam ụgbẹyị ịnyị.

⁵Ụka nya akama, ọ ka pyẹ achwọ kem. U-ube ịgọgọ nyamwụ, ọ ka kpam lokpunyi ọ ka yam godayị rịrị ẹ-ẹjwọ ogede.

⁶M̀ ka kụrụ aluji nyam ịlẹ kị dagaga jum. M̀ ka kịla iya u-ube ịgọgọ nyamwụ lomyi nya ọkẹkẹnị. M̀ ka mwu eje, juwa gwogbo ha Amkpaa.

⁷Amkpaa ee, wo ẹkọ nyam ụka kam wụrụng! Yẹm ahyẹẹrwẹrwa, ká wẹm!

⁸Ụka ká byim yẹkẹẹ, “Kẹwẹ ká gbịgba ham,” m̀ wẹ yẹkẹẹ, “M̀ juwa warị, Amkpaa.”

⁹Ā nyẹẹkpẹ dam ka! Ā ju agbama tam ka, ā gu ọnchẹ nyang ahị gbooo hi ịlọng ka. Ahụ a ri ụbwọ ọdada nyam lẹ, ā pẹhim ka, ā tụụbwọ him ka, Ohe Oluhye ọngọchịda nyam.

¹⁰Adam bala ịnam ka pẹhim myị, ma Amkpaa tị ka kpẹhị rịrịm.

¹¹Amkpaa ee, mẹjẹm ang ọlẹ ká tịtọ kam ka họ, ká kpam bwu ụgbẹyị okpunyi chajị aluji nyam lụmẹ.

¹²Ā pẹhim ju aluji nyam ụ-ụbwọ ka. Ị kaa me ịnịịkịla bam bala ọ-hwàhwa nyam.

¹³M̀ jẹ myị̀myị ya m̀ ka hị gbee kam ka yẹ ụbwọ-ọnahị nya Amkpaa ẹ-ẹpwụ nya ọhịhị nyam ọlẹ.

¹⁴Dahịhile Amkpaa. La ọmyịmyị. Ā chị uko ka. Dahịhile Amkpaa mẹ. Eje Ọnyịịla nya iDevidi