Read idege EJE ỌNYỊỊLA 30 Bible Online

EJE ỌNYỊỊLA 30 - idege bible

EJE ỌNYỊỊLA 30

¹Amkpaa ee, m̀ ka gwogbo hang, chajị à gbam kpehe lẹ. Á họ aluji nyam chị ọkẹkẹnị ju akama ọlẹ kam yẹ ka.

²Amkpaa Ohe Oluhye nyam, m̀ be ẹkọ bịlẹ ụbwọ ọdada bwu ẹga nyang, à họm uda.

³À gbam kpehe bwu ejegu, á myị m ju ka iworu ka.

⁴Anụ angịnyị ịkpẹẹkpẹẹ nya Amkkpaa ee, anụ mwu eje gwogbo ha Amkpaa!

⁵Agbama nyamwụ-ụ́ụ̀ tata ka, ọnahị nyamwụ tị juwa gbe oyi myị oyi. Ụka nya odu wuu ka ri ida ojeje myị, ọkẹkẹnị tịị pwụ eji lụtụrụ.

⁶Ụka ká ang há ham, m̀ byi ịlọm yẹkẹẹ, “Ịngịngịhyẹ-ẹ́ ka chịm dee kaka.”

⁷Amkpaa ee, a họm ọnahị dum kam ya ẹta yi eji gidigbaaa lala ọgbọdọ. Ụka ká tị pyị ahị kiroko him, m̀ dapwụ hụ amẹ.

⁸Amkpaa ee, ahụ m̄ chị eko wụrụ lẹ, m̀ bịlẹng ụbwọ ọdada yẹkẹẹ,

⁹“Igu nyam tị́ ju apyobwuna nya ịyẹ hang-ǹg? ḿ ka ẹpwụ nya ejegu, ọọwa kpụ ịngịhyẹ hang-ńg? Egu jẹ-ẹ̀ gwogbo hang-ńg? Ị ka jẹ-ẹ̀ ya ọnahị o-gbu enyi-ka nyang dodehe-é?

¹⁰Amkpaa ee, wo lam, ka yẹm ahyẹẹrwẹrwa, Amkpaa ee, dam ụbwọ mẹ!”

¹¹A yẹ ida ọbaba nyam lewo nya ọkẹkẹnị ọchịchị, a yim apwụ nya owuru ọkpakpa, ya ọkẹkẹnị dagaga jum lẹ.

¹²Lẹẹlẹ, ḿ ka hu ujiji kaka, m̀ ka mwu eje gwogbo hang. Amkpaa ee, ahụ à ri Ohe Oluhye nyam lẹ, m̀ ka jing obe gbe oyi myị oyi! Eje Ọnyịịla nya iDevidi ọlẹ ri nya olegbeju nya angị mwu eje.