Read idege EJE ỌNYỊỊLA 31 Bible Online

EJE ỌNYỊỊLA 31 - idege bible

EJE ỌNYỊỊLA 31

¹Amkpaa ee, ẹga nyang m̄ wẹ nyọka kpịbaa lẹ, ā myị kị chị oyoyi jum koo. À ri Ohe Oluhye ọ-họ ang opwoku ụka wuu, chuchuu, gbam kpehe mẹ!

²Ya ụrụ nyang da ha eko nyam, kẹwẹ pápapaapa ka chịm da, ahụ ā ri ẹjwọ ọkpịbaa nyam mẹ, ká ri ube ọnyọọngịrị ọ-chẹwụ kem hi aluji.

³Ahụ à ri ẹjwọ ọkpịbaa bala ube ọnyọọngịrị nyam lẹ, ji ịlahị nyam, kpam ụgbẹyị jaabwọ ká myị ọnụ.

⁴Kpam chị eji ba hi ụnya ọlẹ kị gbụrụ nụwẹ gbem, kpụm ịbaa hi ang iluhi-uhi.

⁵M̀ hu olegu nyam jung ẹ-ẹpwụtụbwọ lẹ. Amkpaa ee, chịm da mẹ, chajị à ri Ohe Oluhye ọ-họ ẹla ọnụ-ọnụ.

⁶Angị kpụ eteji ha ijiga kaa wụng ẹjẹ, am lẹ, ahụ Amkpaa m̄ dahịhile lẹ.

⁷M̀ ka chị ọkẹkẹnị juwa ya ụya, ọọ-lajị nya ọháha o-gbu enyi-ka nyang. A yẹ akama ịlẹ kam wẹẹ yẹ, a jẹ ila ọlẹ kọ wẹẹ rụm ẹ-ẹpwụ.

⁸Á pẹhim ju aluji nyam ụ-ụbwọ ka, a ya ẹga da ham pwọọọ.

⁹Amkpaa ee, yẹ ahyẹẹrwẹrwa nyam mẹ, chajị m ji ẹpwụ nya akama. m̀ jida lahị kpụ ịkpala pwuuu, m̀ hi kpeke-kpeke wuu lẹ.

¹⁰Ọjụjụ ọlẹpwụ pyịm enyi hị ụchị-ụchị lẹ, eru omwumwu mwụ ọhịhị nyam kpikpiri lẹ. akama nyam lụmẹ gbee ḿ la ukuru kaka, ekpineku nyam wuu hụ́ chwẹkẹ-chwẹkẹ.

¹¹Aluji nyam wuu hum lala ụbwọ nya ọjị, aanam m̄ jẹ la ẹpẹpẹ la wẹẹ lẹ, aligu nyam tụtụm ju uhi nya ọ-jẹ ọgụ nyam, ị́ yẹm ụ-ụgbẹyị, ị mwụ ata bịmwụ.

¹²Angịnyị wuu deeri nyam lala am nyaa gbu lẹ, m̀ laa lala ang ọlọtẹwụụ.

¹³M̀ wo ká iru nya aluji juwa ya ẹla nwini-nwini, ẹga myị ẹga lam uhi-uhi, ị yẹkpẹ chị awụlẹ jahị dam, juwa me obyi nya igu jum.

¹⁴Amkpaa ee, m̀ tị dahịhileng, ahụ a ri Ohe Oluhye nyam lẹ.

¹⁵A juwa kpẹhị rịrịm ụka wuu, gbam kpehe bwu ẹpwụtụbwọ nya aluji nyam, chịm da bwu ẹga nya angị wẹẹ bam ẹtẹ.

¹⁶Yẹ ọnchẹ nyang lẹhị nya ọnahị, chịm da la ọháha o-gbu enyi-ka nyang.

¹⁷Amkpaa ee, ā myị kị chị oyoyi jum ka, chajị m̀ be ẹkọ nya ụbwọ ọdada wẹ ẹga nyang. Oyoyi ā ri nya alọkwọ, họ kị rụ ka ejegu la ọ-họ pyịm myị ka.

¹⁸Họ ká ọnụ nyaa-ā chide lọnọọkịla omeme— ịwa angị hi ahị bala alọbọọchẹ ịlẹ kịị ya ịtara-ịtara ba alabwẹla ọnyịịla.

¹⁹Ọnahị nyang chakpa lụmẹ! A ya nọ gbe angịlẹ kịị jung ihi! A họ ịnyị a-ahị nya angịnyị wuu gede-gede, a chẹwụ ke angị wẹ ẹga nyang nyọka lahị ọdahile.

²⁰A yaa kpịbaa lokpunyi i-ijata nya ịlọng, hi obyi onyobyi nya angịkịla, ẹ-ẹga ká kụ a yaa kpịbaa lẹ, kpịbaa hi ido ododo nya aluji nyaa.

²¹Anụ gwogbo ha Amkpaa! Ọháha o-gbu enyi-ka nyamwụ chakpa la ẹbyẹbyị ẹ-ẹga nyam! Ọ chịm da ụka ká aluji bá urwe yẹ epweji nyam dada juwa mwẹla tam.

²²Ugbodu gum ene kpịra, m̀ ya eko kpọnụ ya ma ị bem deeji bwu ẹga nya Amkpaa lẹ. A tị wo ida nyam ọọwa, a myị ẹkọ nya ụbwọ ọdada ọlẹ kam be.

²³Anụ angịnyị ịkpẹẹkpẹẹ nya Amkpaa ee, anụ la ọháha ẹ-ẹga nya Amkpaa mẹ. Amkpaa kaa chẹwụ ke angị dịrọọ kpẹẹkpẹẹ, ọ tịị yẹ alọbọọchẹ akama ọlẹ kọ pwokwaa.

²⁴Anụ ju ugbodu, kanụ godayị giri-giri mẹ, anụ angịlẹ wuu kanụ la ẹhị ọrịrịị-rịrị ẹ-ẹga nya Amkpaa! Eje Ọnyịịla nya iDevidi