Read idege EJE ỌNYỊỊLA 32 Bible Online

EJE ỌNYỊỊLA 32 - idege bible

EJE ỌNYỊỊLA 32

¹Ọngọlẹ kị hịnyọhi ịhọbịrị nyamwụ ga họọ, kị hu abwọ hị ị-họpyị nyamwụ họọ, ịnya ọngọ lịnyị pyẹ̀ẹẹ họọ lẹ!

²Ọngọlẹ ká Amkpaa-á yịlẹ abyị ọlala nyamwụ, kọ tị la ọhịhị ọ-kpa pịrị angịnyị ju ka, ịnya ọngọ lịnyị pyẹ̀ẹẹ họọ lẹ!

³Ụka kam ya ang ịnyibyi nyam dodehe lẹka lẹ, m̀ myị hi kirere ọọ-lajị nya eru ọlẹ kam kaa mwu gbee ka obyi ka hi.

⁴Lẹnụ bala alodu, akama ọlẹ ká yẹm lam tẹ̀mẹjẹẹ, ọ pyị ọngịrị nyam enyi kwẹẹẹ, jaabwọ ka eji kaa chị ọhụ lụka nya ụrwẹnụ.

⁵Ụka ohyẹẹkpẹ, m̄ bwuru ịhọbịrị nyam dodehe jeng, ḿ ya ang ke abyị nyam ka. M̀ chị eje nyọka yaa dodehe jeng, ọọwa, a hịnyọ hi ang inyibyi ịlẹ kam họ wuu lẹlẹ.

⁶Lẹẹlẹ, angịnyị ịkpẹẹkpẹẹ nyang ā raabwọ hang ụka nya ọbaba nyaa mẹ, ụka ká akama-á wẹ tutuutu lala ukpenyi ọtaka, ọ ka waa ọyị myị ka.

⁷Ahụ a ri ẹga ọkpịbaa nyam lẹ, a ka chẹwụ kem hi akama. M̀ mwu eje gboo rụ ọchịda nyang, chajị a gbam kpehe.

⁸Amkpaa lịlọmwụ yẹkẹẹ, “M̀ ka mẹjẹng ụgbẹyị ọlẹ ká ka bwu, m̀ ka jung irya bala ọ-kpẹhị rịrịng.

⁹Anụ chị ẹjị lala ụnyịrẹ koo, ị́ ya ang jwọọ ọ-ọnụ lala ori kpá ka ọọ kpa ịlọmwụ keji ha ayịdang ka.”

¹⁰Akama nya angịnyị inyibyi ju iru lụmẹ, angịlẹ kị tị dahịhile Amkpaa lẹ, ọ kaa chẹwụ kaa lọháha o-gbu enyi-ka nyamwụ.

¹¹Anụ alabwẹla ọnyịịla, anụ chị ọkẹkẹnị kanụ ya ụya, anụ angị la kpakpa ọ-ọkịlẹtụ, anụ da iwuru nya ọkẹkẹnị!