Read idege EJE ỌNYỊỊLA 33 Bible Online

EJE ỌNYỊỊLA 33 - idege bible

EJE ỌNYỊỊLA 33

¹Anụ alabwẹla ọnyịịla, anụ mwu eje lọkẹkẹnị ha Amkpaa, anụ angị la kpakpa ẹ-ẹga nyamwụ, ọ chịla nyọka gwogbo họọ.

²Anụ gwogbo ha Amkpaa lẹnwụ, anụ mwu eje họọ logum ọ-la ikeke iwo.

³Anụ mwu eje onyeewe họọ, anụ du ẹnwụ lala ọnggwọ, kanụ da iwuru nya ọkẹkẹnị!

⁴Ẹla ọlọnụ nya Amkpaa ri nya ịlẹhị, ang myị ang ịlẹ kọọ họ wuu ju ọdahịhile.

⁵Ang ọnyịịla ọhọhọ bala ang ọ-la kpakpa a há Amkpaa lẹ, ọháha o-gbu enyi-ka nyamwụ myị̀ odehe pwẹẹpwẹẹ.

⁶Amkpaa kpa ẹla ọlọnụ nyamwụ ọlam-ọlam ọwẹ họ uhye-ọgba, ọ ya lẹ, ẹnụ bala ọya bala ịdịchụ à ji lẹlẹ.

⁷Ọ tụ ihu wuu kaka ji ẹga ookpokpo, ọ wu enyi ịlụjẹ-ẹmwụ wuu kụrụ.

⁸Alodehe wuu ā ju uhi nya Amkpaa, ọng myị ọng wuu ā ju ihi nyamwụ.

⁹Ọ ya ẹla, odehe ji, ọ da ehile, ang wuu rụ kụ gẹgịlẹ.

¹⁰Amkpaa bịrị obyi omeme nya ẹpwụma datị-datị, ọ da obyi ọlẹ kị me gu awụlẹ wuu yi.

¹¹Obyi omeme nya Amkpaa ayịdang tị godayị gir-giri, irya nyamwụ godayị gbe oyi myị oyi.

¹²Ẹpwụma ọlẹ ká Ohe Oluhye nyamwụ ri Amkpaa lẹ aalẹ, ịnyaa há haa lẹ! Angịlẹ ká Amkpaa-á chụ nya angịnyị nya ịlọmwụ lẹ aalẹ, ụrụrụ nyaa há lẹ!

¹³Amkpaa kaa yọyị bwu epwoohe wẹ eji, ọọ yẹ angịnyị ehe gu ọka gu ọka.

¹⁴Ọọ yọyị bwu ẹchị-adịrahụ nyamwụ, kpẹhị họ alodehe wuu uda.

¹⁵Ọwa-à họ ọkịlẹtụ nyaa lẹ, ọ jẹ ang myị ọlẹ kị juwa họ.

¹⁶Ọọngịrị ọ-la lụmẹ nya angịdẹwụ adịrahụ à kaa kpa kụrụ ẹwụ ka, ọngọdẹwụ ọhẹ-lọhẹ-ẹ́ẹ̀ kụrụ chajị nyori ọ la ọngịrị lụmẹ ka.

¹⁷Ụnyịrẹ-ẹ́ ju ọngịnyị ọ-ka dahịhile, chajị nyọka kụrụ bwu ẹwụ ka, ọ́ la ọngịrị abịlaala, ọ́ ka họ ịngịngịhyẹ myị ka.

¹⁸Amkpaa kaa kpẹhị rịrị angịlẹ kị ju uhi nyamwụ, ịwa angịlẹ wuu kị kpụnịrọ ọháhá o-gbu enyi-ka nyamwụ,

¹⁹nyọka chaa da bwu ẹpwụ nya igu bala ọ-ka kpaa be hi uhi ọ-chị angịrị.

²⁰Ahị la ẹhị ọrịrịị-rịrị ẹ-ẹga nya Amkpaa, ọwa-à ri ọngọdụbwọ nyahị bala ọngọ chẹwụ keehi lẹ.

²¹Ahị chị ọkẹkẹnị ọọ-lajị nyamwụ, ahị dahịhile ẹnyị ọlịgọgọ nyamwụ.

²²Ọháha o-gbu enyi-ka nyang ā jam tahị mẹ, chajị ahị ya ẹhị ọrịrịị-rịrị nyahị nịrọng.