Read idege EJE ỌNYỊỊLA 34 Bible Online

EJE ỌNYỊỊLA 34 - idege bible

EJE ỌNYỊỊLA 34

¹Eje Ọnyịịla nya iDevidi ọlẹ kọ da lụka kọ họ ihwirihwa kpa ịlọmwụ nya ọlụlụ-ọlụla ị-ịlahị nya Abimẹlẹkị du ká Abimẹlẹkị kwọọ rụ, kọ rụ gịlala. M̀ ka gwogbo ha Amkpaa ụka wuu, ogbo o-gwo họọ-ọ́ ka chị hi ọnụ nyam ka.

²M̀ ka gwogbo họ chajị nya ang ịlẹ kọ họ, angị ji ẹpwụ nya ọtụpyịpyị ā wo kị chị ọkẹkẹnị!

³Anụ ya ụmụmẹ nya Amkpaa dodehe tam, kahị hu ẹnyị nyamwụ hwaaa lawụlẹ!

⁴M̀ raabwọ ha Amkpaa, ọ wẹm, ọ họ kam la ịlọm bwu ẹpwụ nya uhi ọlẹ kam ju wuu.

⁵Angị la akama gbẹhị dọọ teee, lẹ, ị chị ọkẹkẹnị, oyoyi-í ka jwaa ẹnẹnẹhẹ ka.

⁶Ọlẹbyahị ọlẹ be ẹkọ, Amkpa wo lọọ, ọ chọọ da bwu ẹpwụ nya akama nyamwụ wuu.

⁷Olegu-ẹrụ nya Amkpaa kụ juwa gbe angịlẹ kị ju ihi nya Amkpaa, ọ kaa chaa da bwu ẹga nya ang iluhi-uhi.

⁸Wụlayẹ lịlọng ká yẹ jaabwọ ká Amkpaa há ka ba. Ịnya ọngọlẹ kọ kele ka kpịbaa ẹ-ẹga nyamwụ há ha ọngọọwa lẹ!

⁹Anụ angịnyị ịkpẹẹkpẹẹ nya Amkpaa, anụ ju uhi nyamwụ, ekuru nya ịngịngịhyẹ-ẹ́ẹ̀ ku angị ju ihi nyamwụ ka.

¹⁰Egabẹ ka ye ang ri ka, họ kpeke-kpeke myị, angịlẹ kị dahịhile Amkpaa tị lẹ, ịngịngịhyẹ ọnyịịla-aa kwaa amwụ ka.

¹¹Anụ anyị nyam ee, anụ kẹwẹ kanụ ke ụrụ lam wẹẹ, m̀ ka mẹjẹẹnụ kanụ ka ju uhi nya Amkpaa.

¹²Ọhịhị tị́ kpụnụ ịpyọ— nyọka ka hị tata ẹ-ẹpwụ nya ọkẹkẹnị pyíì?

¹³Aalẹ, anụ ya ọnu ju ẹla onyobyi oyaya kokoo, ānụ tị me ọnọọkịla kaka.

¹⁴Anụ nyẹẹkpẹ da ang onyobyi ọhọhọ, kanụ wẹ kaka họ ang ọnyịịla mẹ.

¹⁵Amkpaa kaa kpẹhị nyamwụ gbe alabwẹla ọnyịịla, ọọ ke ụrụ pịlẹẹ wo ida nyaa.

¹⁶Amkpaa kaa tụ angị họ ang onyobyi pyịpyị, nyọka họ ká ọngọngọhẹ-ẹ́ ka kpịtịya nyaa ụka kị gbu kpá ka.

¹⁷Alabwẹla ọnyịịla-á wụrụ Amkpaa, ọ kaa ke ụrụ laa, ọọ gbaa kpehe bwu ẹpwụ nya akama nyaa wuu.

¹⁸Amkpaa ju angị la ọkịlẹtụ o-kpụ enyi chwẹẹ, ọọ chị angịlẹ ká ahị ọdahile gwaa myị da.

¹⁹Ọlabwẹla ọnyịịla ka la iru nya akama myị, Amkpaa tịị gbọọ kpehe bwu ẹpwụ nyaa wuu.

²⁰Amkpaa kaa chẹwụ kọọ hi ang ọtịpyọ, ukpunogu nyamwụ ọhẹ-lọhẹ-ẹ́ ka bene ka.

²¹Ang onyobyi ka tụ ọlabwẹla onyobyi ata ju ẹbyị, angị ba alabwẹla ọnyịịla ẹtẹ ka yẹ akama.

²²Amkpaa ka chị angịnyị nyamwụ da, akama-á ka yẹ ọngọ ka ẹga nyamwụ kaka kpịbaa ka.