Read idege EJE ỌNYỊỊLA 35 Bible Online

EJE ỌNYỊỊLA 35 - idege bible

EJE ỌNYỊỊLA 35

¹Amkpaa ee, mwẹla ta angịlẹ kịị mwẹla tam, ma uya ta angịlẹ kịị ma uya tam.

²Hu ọkụmada bala ang-abwọ nya ẹwụ, ká kẹwẹ kaka dam ụbwọ mẹ.

³Hu ụwangga bala ọkpachị nyang, ka jahị da angị wẹẹ chị ụnyẹ jum.

⁴Oyoyi ā ri nya angị wẹẹ tịtọ nya egbeju-igu nyam, ká angị me obyi onyobyi tụm pyịpyị ā rụnyẹ rụ lahị ọ-chaa owu.

⁵Daa igbachịwụ hụrụ lala ewoo nya ang, ká olegu-ẹrụ nyang ā chị ụnyẹ jwaa!

⁶Ụgbẹyị nyaa ā chị owu kpịlẹẹẹ, pyị́ dịyọ-dịyọ, olegu-ẹrụ ā chị ụnyẹ jwaa ọgwọgụ.

⁷Ḿ da ẹlẹlẹhẹ da ka, ị tị da ụnya gbem, ḿ kpaa ụbwọ onyobyi nya ọhẹ ka, ị tị chị ụjẹ yahị kụ kam ka chị abwọ kpọọ.

⁸Akama ā pwaa eji lọmwaa, ụnya ọlẹ kị da ā kụ ụwa waa ịwa ayịdang, kị ta ayịreji ẹ-ẹpwụ nya ụjẹ ọlẹ kị chị.

⁹Ụka ọọwa, m̄ ka chị ọkẹkẹnị chajị nya Amkpaa, m̀ ka chị ọkẹkẹnị chajị ọ chịm da.

¹⁰M̀ ka dakọ bwu ẹpwụ nya ọkịlẹtụ nyam wuu yẹkẹẹ, “Ọngọngọhẹ-ẹ́ lala ahụ Amkpaa kaka! À chẹwụ ke ọngọ jula ọlọlọhẹ-ka hi ogburujwo, a chẹwụ ke ọlẹbyahị bala okpehika hi angị taa pyịpyị.”

¹¹Eguru nya angịnyị họ ibeenu tụm pyịpyị, juwa chị ala ịlẹ kam jẹ ịngịngịhyẹ u-uhye nyaa ka bam.

¹²Ị ya ang onyobyi nwụm uri nya ọnyịịla ọlẹ kam họ, pẹhim dam̀ nwée.

¹³Ụka ká ịwa tị jụ ẹdụrụ, m̀ kpa owuru chajị nyaa, m̀ hụ limyi bala ọ-raabwọ chajị nyaa m̀ raabwọ yahị cheji.

¹⁴M̀ bwọ ayiiji lala aanam ayịdang nyaa ri, m̀ hiri ịlọm kpẹẹ ẹ-ẹpwụ nya ọjụjụ, lala ọngọ juwa bida nya ịnamwụ.

¹⁵Ụka kam ji ẹpwụ nya akama, ọ ri ọkẹkẹnị haa ịwa wuu, ị tụgbiriri kaka dagaga jum juwa kpam họ, ị bịrịm ẹnyị lọmwụ ịnyọ.

¹⁶Ị kpam họ kịlahị-ịlahị la o-jujwo ka, ị hwahwa jahị dam, juwa bam ẹtẹ.

¹⁷Ọngọlahị ee, ịịwẹ ā ka yaa chịng kịlahị lẹ-ẹ́? Chịm da bwu uya ọlẹ kị wẹẹ ma tam mẹ-ẹ̀, chị ọhịhị nyam da bwu ẹga nya egabẹ ịwẹ.

¹⁸Aalẹ, m̀ ka jing obe a-ahị nya uche nya angịnyị nyang, ẹ-ẹpwarịrị nya iru nya angịnyị m ka gwogbo hang lẹ.

¹⁹Ā myị ká angị jum uji tu ododu, alọnọọkịla ịwẹ ā chị ọkẹkẹnị ju akama nyam ka. Ā myị ká angị bam ẹtẹ tu ịmịmẹ ịwẹ ā chị ụmwẹhụ ju ọjụjụ nyam ka.

²⁰Ọnụ nyaa-áà ya ẹla ọ-kpụ umwu ka, ọnọọkịla ị kaa ga me ba angị la ẹla lọngịnyị ka lẹ.

²¹Ị kpa ẹpwụ-ọnụ nyaa wuu juwa chịm ụkwa byim yẹkẹẹ, Ọbẹngkẹnị! Ọbẹngkẹnị! Ahị wung nụwẹ lẹ! Ahị kpa ẹhị nya ịlọhị yẹ ang ọlẹ ká họ myị̀myịịmyị!

²²Amkpaa ee, ahụ ayịdang tị yẹ ẹlẹwẹ wuu, ā hu ujiji kaka, Ọngọlahị, ā godayị hwẹ̀ẹẹ him kaka!

²³Ọngọlahị ee, gu ịlọng achwọ ká wẹ kaka ma uya yẹm dada mẹ. Ohe Oluhye nyam ee, wuleji ká leje ọlẹ ham mẹ.

²⁴Amkpaa ee, a ri ọngọ họ ang ọnyịịla, lẹ, chị oku ham mẹ, ká aluji nyam ā hụlọ ẹhụ jum ẹ-ẹpwụ nya akama nyam ka.

²⁵Ị tịtọ kị ka yẹkẹẹ, “Ẹpyịịnẹẹ! Ọ nụwẹ jaabwọ kahị tọ lẹ! Ahị wọọ ri lahị-lahị lẹ oo!” Ā tị ya ẹga ọọwa da haa koo.

²⁶Oyoyi ā ri nya angịlẹ wuu kị wẹẹ dam ẹpyịị-kẹkẹnị u-uhye nya akama nyam. Oyoyi bala ihi ọ-kpa tudu ịpyị ā ri nya angịlẹ wuu kị byi ịlaa ịwa nya há gụm.

²⁷Anụ angịlẹ kanụ tịtọ nyọka yẹ oku oriri nyam, anụ chị ọkẹkẹnị kanụ hụlọ ẹhụ mẹ. Anụ ya, ma ya yẹkẹẹ, “Amkpaa chakpa lụmẹ! ịlahị ọkaka nya ọnchẹ nyamwụ kpọọ ịpyọ.”

²⁸Aalẹ, m̀ ka ya ang ịnyịịla ọhọhọ nyang dodehe, m̀ ka gwogbo hang lụka nya ahị ọpyẹpyẹ wuu. Eje Ọnyịịla nya iDevid ọnche nya Amkpaa. Ọlẹ ri nya olegbeju nya angị mwu eje