Read idege EJE ỌNYỊỊLA 36 Bible Online

EJE ỌNYỊỊLA 36 - idege bible

EJE ỌNYỊỊLA 36

¹Eje Ọnyịịla nya iDevidi. Ọhọbịrị chayị nya ẹla je angịnyị inyibyi kwiii ẹ-ẹpwụ nya ọkịlẹtụ nyaa. Ị́ ju uhi nya Ohe Oluhye ẹ-ẹpwụ nya ọhịhị nyaa ka.

²Ị pịrị ịlaa ju nwa ịlaa gẹdẹẹ, ị mẹ ká ang onyobyi nyaa-á ka jẹ-ẹ̀ dodehe kpụ ị ka yẹ akama ka.

³Ẹla ọlọnụ nyaa ri ọkwọ ọlala bala ọnọọkịla omeme, ịị họ ang bwula ẹla ọjẹjẹ kaka, ịị họ ang ọnyịịla kaka.

⁴Ị́ nọnọ nọ lodu, ị juwa me obyi onyobyi. Ụgbẹyị ọlẹ kịị kpa họ ang wuu-ú ri ọnyịịla ka, ịị myị ọnụ nyọka yẹda hi ang onyobyi ọhọhọ ka.

⁵Amkpaa ee, ọháha o-gbu enyi-ka nyang la gbọnọ-gbọnọ pwụ uhye-ọgba, ọkpẹẹkpẹẹ ọlala nyang wu egbamwụ ọyị.

⁶Abwẹla ọnyịịla nyang la uhye lala ịgbọdọ, eje ọlala nyang la kpori-kpori lala ụjẹ-ẹmwụ nya ihu. Amkpaa ee, à kaa kpẹhị rịrị angịnyị ehe tụ iyo ileji lọhẹ-ọhẹ.

⁷Ohe Oluhye ee, ọháha o-gbu enyi-ka nyang chakpa kpụ ịnya! Angịnyị ehe wuu ye ẹga ọkpịbaa e-ekpeleji nya ụrụrụ nya achwọ nyang.

⁸A ya ang oriri haa-ā ri nwà ụga bwu ẹpwa nya ịlọng, a ya enyi haa-ā nwa bwu ogo nya ang ịnyịịla nyang.

⁹Ahụ a ri ẹmwụ-enyi nya ọhịhị lẹ, ahịgboo nyang à ya ahịgboo hahị lẹ.

¹⁰Ọháhá o-gbu enyi-ka nyang ā kịnyaa juwa mwụ chị angịlẹ kị jẹng ọgụ, ká họ ang ọnyịịla ha alabwẹla ọnyịịla.

¹¹Ā myị ká angị hi ahị ā bam ẹta ka, a myị ká angịnyị inyibyi ā họ kam chị ịparịịpa ka.

¹²Ọbẹngkẹnị! Alabwẹla ọnyobyi chị lalẹẹ bẹlẹ-bẹlẹ lẹ! ị kpaa nọnọ, ị́ ka du géè myị kaka.