Read idege EJE ỌNYỊỊLA 37 Bible Online

EJE ỌNYỊỊLA 37 - idege bible

EJE ỌNYỊỊLA 37

¹Eje Ọnyịịla nya iDevidi. Ā kụ limahị ọọ-lajị nya alabwẹla onyobyi koo, lee ọ-yẹ ijiiji nya angị kaa họ ang onyobyi ka.

²Ị juwa ka gbu wombooo lala amẹ, ị juwa ka gbu pilooo lala apwụ ilekpo.

³Dahịhile Amkpaa, ká juwa họ ang ọnyịịla, aalẹ, a ka kụ ọ-ọpyị ọlẹ, a tị ka la okpunyi.

⁴Ẹla nya Amkpaa ā kpụng ịpyọ la ọhọhọ, aalẹ, ọ ka họ ang ọlẹ kọ bang ba ọ-ọkịlẹtụ hang.

⁵Hu ịlọng wuu ju Amkpaa ụ-ụbwọ, dahịhiloo mẹ, aalẹ, ọ ka dang ụbwọ.

⁶Ọ ka họ ká ang ọnyịịla ọlẹ ká kaa họ ka hụ́ jajaaja lala ẹnụ o-kpehe u-ube, ọkpẹẹkpẹẹ ọlala nyang ka hụ́ jogo-jogo lala ẹnụ ọrịrị ẹ-ẹtẹ.

⁷Godayị kpọọ ẹ-ẹga nya Amkpaa, ká dayị pịlẹẹẹ họọ. Ā kụ limahị ọọ-lajị nya angị inyibyi ịwẹ kị wẹẹ há pwụụpwụụ koo, ā mẹ imahị chajị nya ang onyobyi ọhọhọ nyaa ka.

⁸Ā ju agbama ka, tụụbwọ hi ikẹjẹ-awụrụ ọgbụrụ-gbụrụ, ọọ kpa ọngịnyị ka ju ka ẹpwụ nya ang ọtịpyọ.

⁹Angịlẹ kị dahịhile Amkpaa-à ka ya ọpyị ọlẹ la lẹ, anụ tị́ jẹ lẹ, alabwẹla onyobyi tị ka ta ayịreji.

¹⁰Ọ́ nọ pyịnyẹng kịlahị, alabwẹla onyobyi-í ka ji kaka. Á pịlahị nyaa la ọpịlẹẹ̀-pịlẹ, á ka yaa kaka.

¹¹Angị la dụmwọ tị ka ya ọpyị ọlẹ la, ị ka hụ lokpunyi bala ọ-nwa kịlahị-ịlahị.

¹²Alabwẹla onyobyi me obyi ju alabwẹla ọnyịịla, ị hwahwa jahị daa lẹtẹ ọbaba.

¹³Ọngọlahị tị hụlọ ẹhụ ju alabwẹla onyobyi ịwẹ, ọ jẹ ká ẹnụ kị ka ta ayịreji ju chwẹẹ lẹ.

¹⁴Alabwẹla onyobyi gba oge bwu apịlẹ, ya ịcha kụ uda nyaa nyọka nwụ okpehika bala ọlẹbyahị, nyọka kpa angị họ ang opwoku nọnọ,

¹⁵ugbẹma nya Obyi à tị ka nwụ Obyi lẹ, eda nyaa ka mwụ eku bwụjẹ-bwụjẹ.

¹⁶Ang ọpyịnyẹng ọlẹ ká ọngịnyị ọnyịịla la hagụ ụdụ ọkpụkpụ nya alabwẹla onyobyi wuu tụchawụlẹ,

¹⁷chajị Amkpaa ka nu ọngịrị nya alabwẹla onyobyi, ọ tị ka chẹwụ ke angị ịnyịịla.

¹⁸Amkpaa kaa kpẹhị rịrị angị ju ihi nyamwụ, ọpyị ọlẹ kị la ka ri nyaa gbe oyi myị oyi.

¹⁹Ụka ká iwe-ahụrụ-ụ́ tụpyịpyị, ị́ ka yẹ akama ka, ūhī-í jiji, ị ka ye ang ri wu ẹpwụ.

²⁰Alabwẹla onyobyi tị ka ta ayịreji, aluji nya Amkpaa ka wo hụrụ lala àpwụ̀ nya ekeji ịlẹpwamẹ, ị ka myị yịra-yịra lala ịmwụ-ila.

²¹Alabwẹla onyobyi-í kpịla ang, ịị tịrị ang ọọwa ẹkpẹ ka, alabwẹla ọnyịịla tị kaa hu ha bwọbwọọbwọ.

²²Angịlẹ ká Amkpaa wahị kụrụ à ka la ọpyị ọlẹ lẹ, angịlẹ kọ gọlọ ju tị ka ta ayịreji.

²³Amkpaa-à kaa kpa angịnyị ụgbẹyị jaabwọ kị ka bwu lẹ, angịlẹ họ ẹla kpọọ nyii, ọ kaa ya angịịwa ẹta rịrị e-eji giri-giri.

²⁴Ị́ keji ka, ị́ ka yẹtẹ gu eji ka, chajị Amkpaa ka yụbwọ chaa wuleji.

²⁵Bwu ụka-ụka kam ri onjwo gbee kam ri ọngọgbahị lẹẹlẹẹ, ḿ yẹ ẹnẹnẹhẹ ká Amkpaa nyẹẹkpẹ da alabwẹla ọnyịịla lẹka, ḿ yẹ ká ọnyị nyaa juwa kpa ogo bịlẹ ang oriri lẹka.

²⁶Ị ri alọnahị, juwa hu ha angịkịla ụka wuu, anyị nyaa ayịdang ri ahị ọwawa.

²⁷Anụ nyẹẹkpẹ da ang onyobyi ọhọhọ, kanụ wẹ kaka họ ang ọnyịịla mẹ, aalẹ, anyị nyanụ ka kụ ọpyị ọlẹ pyịyọọ.

²⁸Anụ tị́ jẹ lẹ, ang ọlẹ kọ la kpakpa-à há Amkpaa lẹ, ọ́ ka nyẹẹkpẹ da angịnyị ịkpẹẹkpẹẹ nyamwụ ka. Ọ ka chẹwụ kaa gbe oyi myị oyi, anyị ịtụma nya alabwẹla onyobyi tị ka ta ayịreji.

²⁹Alabwẹla ọnyịịla à ka la ọpyị ọlẹ lẹ, ị ka kụ am̀ gbe oyi myị oyi.

³⁰Ẹla ọjẹjẹ à kaa bwu ọnụ nya angịnyị ịnyịịla lẹ, ị kaa ya ẹla ọlẹ kọ la kpakpa ụka wuu.

³¹Ị ya ehile nya Ohe Oluhye nyaa nọ ọ-ọkịlẹtụ nyaa, ịị pẹhi ụgbẹyị ọọwa deeji ka.

³²Alọkwọ kpa ẹhị da urwe nya angịnyị ịnyịịla kekeeke, nyọka taa ẹhị pịrị,

³³Amkpaa-á tị ka tụụbwọ hyaa ga ha ọngịrị nya aluji nyaa ka, lee ọ-ka myị eje-è waa ụka kị wụrwaa eje ka.

³⁴Anụ dahịhile Amkpaa, kanụ kpa ehile nyamwụ, ọ ka chị ihi junu, hu ọpyị ọlẹ hanụ la. Anụ ka yẹ ká alabwẹla onyobyi ka ta ayịreji.

³⁵M̀ jẹ ọlọkwọ ọlụrụ-ụrụ ọhẹ ẹnẹhẹ lẹ. Ọ nwa gbọnọ-gbọnọ nyi ọng myị ọng wuu egbeju lala okoji nya isida ịla iLibanọn.

³⁶Ọ tị nọ chẹẹ kam chịpwụrụ bwu ẹga ọọwa lẹ, ọ́ juwa kaka, m kpẹhị pịleji nyamwụ, ḿ tị yọọ kaka.

³⁷Hu ẹma chị okoji, ká wụla alabwẹla ọnyịịla yẹ wuu mẹ, kụ ẹhị yẹ angị ri angịnyị ịnyịịla wẹẹ, angịnyị nya okpunyi ịlịịwẹ kaa la anyị ịtụma ịlẹ kị ri ijuju nyaa.

³⁸Alọhọbịrị wuu tị ka ta ayịreji gbanggbang, anyị ịtụma nyaa ka myị kpá kụrwa-kụrwa wuu.

³⁹Amkpaa kaa chị alabwẹla ọnyịịla da, ọwa-à ri ẹga ọkpịbaa nyaa lụka nya akama lẹ.

⁴⁰Ọ kaa daa ụbwọ, chaa da, ọọ gbaa kpehe bwu ẹpwụtụbwọ nya alọkwọ, ọọ chaa da, chajị ị ka ẹga nyamwụ kaka kpịbaa. Abwọ Ọrịrị nya Ọngọ Ji Ẹpwụ nya Akama