Read idege EJE ỌNYỊỊLA 38 Bible Online

EJE ỌNYỊỊLA 38 - idege bible

EJE ỌNYỊỊLA 38

¹Eje Ọnyịịla nya iDevidi Amkpaa ee, ā yalibyi lam lagbama ka, ā nwụm rịrị ẹ-ẹpwụ nya ikẹjẹ-awụrụ nyang ka.

²À họm ang lịcha nyang lẹ, à kpam nọnọ lụbwọ nyang lẹ.

³Ajị nya agbama ọlẹ ká ju lẹ, ẹgẹgẹhẹ nya ịnyịrọ-ọ́ ri ịnyam kaka, ịhọbịrị nyam du ká ịnyịrọ nyam wuu jụ ẹdụrụ lẹ.

⁴Ịhọbịrị nyam myị̀ birim hịkẹ-hịkẹ lala enyi, olo nyaa la tẹ̀mẹjẹ kịlam-kịla lọkpakpa.

⁵Abẹ nyam mama, nyí oru pwuu, ọọ-lajị nya ịhọbịrị nya uchi nyam ịịwa.

⁶Ọ kpam nọnọ, ḿ hu ẹngkịlẹ myị kaka, lụka nya ahị ọpyẹpyẹ wuu, m̀ juwa bida.

⁷Ịnyịrọ wurum ila gbuuu, ẹgẹgẹhẹ nya ịnyịrọ-ọ́ ri ịnyam kaka.

⁸Ịnyịrọ rum lẹtẹ-lẹtẹ, dum abwọ yịgẹ-yịgẹ, ọjụjụ myị̀ ọkịlẹtụ nyam, m̀ juwa mwu eru nya ọjụjụ.

⁹Ọngọlahị ee, à jẹ ọnyọnyọọnyị nya ang ịlẹ kam wẹẹ bábọọnya nyaa, à wo ịhụ ọ-chị byị̀ịị nyam ọnyị myị ọnyị.

¹⁰Ugbodu nyam juwa du kpuukpuukpuu, ḿ la ukuru kaka, ẹhị-ị́ rịrịm ẹ-ẹpwụ ẹhị ịnyị kaka.

¹¹Aligu bala aliko nyam godayị hwẹẹẹ him ọọ-lajị nya abẹ nyam, angị ri aanam ri wuu chị ebwo-otiro him.

¹²Angị tịtọ nya egbeju nyam da ụnya gbem lẹ, angị tịtọ nyọka họm ang hwahwa nyọka họm bịrị, lụka nya ahị ọpyẹpyẹ wuu, ị juwa kpụnụ kụ ine nya ang onyobyi jahị dam.

¹³M̀ tị ya arụ kpụ ịla, ḿ wowo ka, lala ọngọ ku ọnụ ẹ-ẹga nyaa, ḿ họ pyịm ka.

¹⁴M̀ lala ọngọ ya ụrụ kọ ala nyaa kpong-kpong ka, du ká ọnụ nyam-ḿ wẹ ẹlẹlẹhẹ ka.

¹⁵Ahụ m̄ tị dahịhile lẹ, Amkpaa, Ọngọlahị Ohe Oluhye nyam ee, ahụ à ka wẹ ẹlẹwẹ ham lẹ.

¹⁶Abwọ ọrịrị nyam ri, ā myị ká aluji nyam ā chị ọkẹkẹnị ju akama ọyẹyẹ nyam ka, kị chị ọgọm yahị dam ụka ká ẹta nyam-ḿ pyị kpịra ka.

¹⁷Eji ọkaka nyam hi dẹdẹ, hi kpẹẹ, ọjụjụ tị pwuru him kaka.

¹⁸M̀ ya ịhọbịrị nyam dodehe lẹ, ang inyibyi ịlẹ kam họ tọm olujwo lẹ.

¹⁹Angị ri aluji nyam ụjụjwọ ju iru, angị bam ẹtẹ tu ododu la wọmbọọ.

²⁰Angị ya ang onyobyi nwụm uri nya ọnyịịla ọlẹ kam họ à wẹẹ myị ham ka lẹ, chajị m̀ kaa họ ang ọlẹ kọ pwoku.

²¹Amkpaa ee, ā nyẹẹkpẹ dam koo, ā ji hwẹẹẹ him koo Ohe Oluhye nyam!

²²Chị agaga warị kaka dam ụbwọ mẹ, Ọngọlahị ọngọchịmda!