Read idege EJE ỌNYỊỊLA 39 Bible Online

EJE ỌNYỊỊLA 39 - idege bible

EJE ỌNYỊỊLA 39

¹Eje Ọnyịịla nya iDevidi ọlẹ ri nya iJedutun olegbeju nya angị mwu eje. M̀ byi ịlọm byi ya ma àm ka kpa ịlọm kemkem ẹ-ẹpwụ nya ang myị ang kam ka họ, bala ọ-ka gbe ẹlẹlẹ nyam kọ ka ya ẹla onyobyi kaka lẹ.

²M̀ hụ lọnụ ujiji, la ọ-họ pyịm ka, ọ́ dọmwụ ri ẹla nya ọnyịịla wẹwẹ, ḿ dọnụ wẹ ẹlẹlẹhẹ kaka! Ọọwa, ila ọlẹpwụ à rụm-m̀ rụ gụ olene wẹẹ lẹ.

³Ọkịlẹtụ chịm pwuu. Jaabwọ kam juwa me imahị kaka ba, ịnyịnyị-ịnyịnyị ila-à juwa rụm kịlahị-ịlahị lẹ, du kam hu kám la ẹla oyaya yẹkẹẹ,

⁴“Amkpaa ee, chuchuu ya jem wẹẹ, m̀ tị́ ka hụ am̀ tata ka ba anyị-ị̀? Ẹnụtụrụ nya ọhịhị nyam tị́ hi ịmanyị? Ya jem jaabwọ ká ẹnụtụrụ nya igu nyam hi kpii kaka ba.”

⁵À họ ẹnụtụrụ nya ọhịhị nyam-ḿ ju ẹpwụ gụ ẹpwụtụbwọ kaka, ụka nya ọhịhị nyam wuu-ú ri ịngịhyẹ a-ahị nyang ka, ọhịhị nya ọngịnyị ehe ọnyị myị ọnyị lala ịhụ ọ-da pwee ịịwẹ kem,

⁶angịnyị ehe lala ụrụrụ ọlẹ kọọ chịpwụrụ, aga ọmama nyaa wuu ri nya ang ododu. Ị ya ụdụ nyaa ju ụjị, la ọ-jẹ ọngọ ka laa-a la ụka ohyẹẹkpẹ ka.

⁷Ọngọlahị ee, ịịyẹ ọkịla m̄ tịị dahịhile wẹẹ? Ahụ m̄ dahịhile lẹ.

⁸Chịm da bwu ẹpwụ nya ịhọbịrị nyam wuu, kám ri ẹla-ẹlẹhụ nya aluchi ka.

⁹M̀ hu ujiji, ya ọnụ ba awụlẹ lẹ, chajị ahụ à du akama ọlẹ kpụm lẹ.

¹⁰Hu abwọ la akama ọ-yẹm-m yẹ mẹ, enyiri ọlụbwọ nyang wum ọyị hi igu-igu lẹ.

¹¹À kaa yalibyi la angịnyị ehe, nwaa rịrị chajị nya ang inyibyi ịlẹ kị họ, ọhịhị nya ọngịnyị ehe-é la ukuru ka lala ịhụ ọ-da pwee ịịwẹ kem.

¹²Amkpaa ee, wo abwọ ọrịrị nyam, ká ke ụrụ lida ọlẹ kam wẹẹ je bịlẹ ụbwọ ọdada, ā ya ụrụ nyí ida ojeje nyam ajị ka, chajị ọngga nyang m̄ ri wẹ lụka okpii lẹ, m̀ ri ọlẹdịyẹ ọchịpwụrụ chị kem lala adam igogo anyị.

¹³Mwụ ẹhị biri him, kam dọhụ rwẹẹ lọkẹkẹnị chẹẹ ene ká odehe nyam ka myị, kam ka jam kaka mẹ.