Read idege EJE ỌNYỊỊLA 40 Bible Online

EJE ỌNYỊỊLA 40 - idege bible

EJE ỌNYỊỊLA 40

¹Eje Ọnyịịla nya iDevidi ọlẹ ri ịnya ole beju nya angị mwu eje. M̀godayị kpọọọ gbe Amkpaa, ọ jahị kpata dam, ọ wo ida nyam

²ọ gbam kpehe bwu ụjẹ nya ayịreji, bwu ẹpwụ nya ịwa. Ọ yam godayị u-uhye nya ẹjwọ, du ka ata nyam dayị giri-giri.

³Ọ ya eje onyeewe jum ọ-ọnụ, eje nya ogbo ha Ohe Oluhye nyahị. Iru nya angịnyị ka yẹ ẹlẹwẹ, ị ka ju uhi nya Amkpaa bala ọ-ka dahịhiloo.

⁴Ọngọlẹ kọ dahịhile Amkpaa, kọ yẹ jula alọbọọchẹ lee angị kpụ eteji ha ijiga ka aalẹ, ịnya ọngọọwa há họọ lẹ!

⁵Amkpaa Ohe Oluhye nyam ee, a họ iru nya ụkụrwọ ẹbyẹbyị, a kụ irya nya ang ịnyịịla chajị nyahị, ḿ maga nyọka waa ọnyọnyọọnyị, ị ka ju iru kịlọnụ. Ọngọngọhẹ-ẹ́ lala ahụ ka!

⁶Ọ́ọhaha bala iya ịkịlaakịla ā tịtọ ka. A ya ụrụ ham nyọka kpa wo wọ ẹla nyang. Lẹ, m̀ jẹ ká iya ọ-rụ ila lee iya ọ-hụ́ ọhọbịrị ā tịtọ ka.

⁷Ọọwa, m̄ yẹkẹẹ, “M̀ lẹẹ lẹ, nyọka họ ọmẹjẹ nyang ịlẹ kị da ụ-ụpwụ chajị nyam.

⁸Ohe Oluluye nyam ee, m tịtọ kam ka họ irya nyang. M kpa ọmẹjẹ nyang wuu jam ọ-ọkịlẹtụ nyam.”

⁹M̀ ya dodehe ọ-ọjịra-jịra nya angịnyị nyang wuu nyọlẹ ká chịhị da. Amkpaa ee, a jẹ kam ka jẹ-ẹ̀ hịnyọ loyaya ka.

¹⁰Ḿ ya oja ọnyịịla nya ọchịda nyang tu ịlọm ka, m̀ kaa ya ẹla nya ahyẹẹrwẹrwa bala ọchịda nyang dodehe. Ḿ ya ẹla nya ọháha o-gbu enyi-ka nyang bala ẹla nya ọkpẹẹkpẹẹ nyang kpịbaa ka. M̀ yaa pyẹ ọ-ọjịra-jịra ọtụka nya angịnyị nyang.

¹¹Amkpaa ee, a wu ahyẹẹrwẹrwa nyang kpa him ka, ká ọháha o-gbu enyi-ka bala ọkpẹẹkpẹẹ nyang a chẹwụ kem ụka wuu.

¹²Akama i-ju ọwawa ka dagaga jum, ịhọbịrị nyam wum eri lẹ, ḿ yọyị kpụ m̄ ka be kaka, ịhọbịrị nyam ju iru gụ eke-inyi ilegbeju nyam, ọhụ-ụ́ bam e-eji kaka.

¹³Amkpaa ee, chuchuu chịm da mẹ! Amkpaa ee, chị agaga kaka dam ụbwọ mẹ!

¹⁴Oyoyi ā ju angịlẹ kị wẹẹ maga nyọka ka nwụm nwụ, kụrwaa chẹẹchẹẹ, ká chị oyoyi ju angịlẹ wuu ká akama ọyẹyẹ nyam ri ang ọ-kpaa ịpyọ. Jwaa ịwa wuu ẹpẹ.

¹⁵Angịlẹ wuu kịị byim yẹkẹẹ, “Ọbẹngkẹnị! À gbu dụwẹ lẹ!” wẹẹ, Oyi ọlẹ ká ka chị jwaa-ā kwaa ọnụ.

¹⁶Angị myị wẹ ẹga nyang wuu ā chị ọkẹkẹnị, kị yụya. Angịlẹ wuu ká ọchịda nyang háa ā ya ụka wuu yẹkẹẹ, “Amkpaa chakpa lụmẹ!”

¹⁷Am lẹ, m̀ ri ọngọ jula ọlọlọhẹ-ka bala ọlẹbyahị, Amkpaa, à tịị kpịtịya nyam. Ahụ à ri ọngọdam ụbwọ bala ọngọchịmda lẹ. Ohe Oluhye nyam, a họ atịmẹ ka.