Read idege EJE ỌNYỊỊLA 41 Bible Online

EJE ỌNYỊỊLA 41 - idege bible

EJE ỌNYỊỊLA 41

¹Eje Ọnyịịla nya iDevidi ọlẹ ri nya olegbeju nya angị mwu eje. Ọngọlẹ kọ kaa me irya ju alẹbyahị wẹẹ, ọngọọwa ka pyẹ̀ẹẹ. Akama-á kpeji, Amkpaa ka chọọ da.

²Amkpaa ka chẹwụ kọọ, bala ọ-chị ọhịhị nyamwụ da, ọ ka wahị kụrwọọ ọ-ọpyị ọlẹ. Ọ́ ka pẹ hyọọ ju ka ẹpwụ nya ọngịrị nya aluji nyamwụ ka.

³Amkpaa ka dọọ ụbwọ lụka nya ẹdụrụ, ọ ka họọ uda kọ ka la kpịra-kpịra.

⁴M ya, “Amkpaa ee, M̀ họ ang onyobyi bang. Chuchuu, yẹm ahyẹẹrwẹrwa, ká họm uda.”

⁵Aluji nyam ya ala inyibyi bam juwa yẹkẹẹ, “Ụka oyina ọ tị ka gbu kị ka deeri nyamwụ ká lẹẹ me?”

⁶Angịhyẹ wẹ kaka wụlam yẹ nya ihwirihwa, ị wẹ nyọka dụrụ arụ nya ịnụ meemè, ị́ yegiri lẹ, ị kpa hyoma pẹpẹẹpẹ tụ ẹga da lẹlẹ.

⁷Aluji nyam wuu juwa chayị nya ẹla nyam nwini-nwini, ọ háa i-irya kpá ká ang onyobyi à jahị dam.

⁸Ị juwa yẹkẹẹ, “Ẹdụrụ nya igu à jwọọ lẹ, Ọ́ ka jẹ-ẹ̀ hị myị koo.”

⁹Angị ri aligu nyam ịlahịchịng ri, kịị ju abwọ-ang ri tam dachichi jahị dam.

¹⁰Amkpaa ee, yẹm ahyẹẹrwẹrwa mẹ. Họ kam la kpịra-kpịra mẹ, aalẹ, m̀ ka nwụ̀ aluji nyam ịwẹ uri tịrẹkpẹ.

¹¹Aluji nyam-ḿ kụrụm myị ka lẹ, m̀ jẹ ka ẹla nyam hang.

¹²M̀ kaa họ ang ọlẹ kọ la kpakpa, lẹẹ lẹ, a kaa kem. A ka họ kam ka hụ ẹ-ẹga nyang gbe oyi myị oyi.

¹³Anụ gwogbo ha Amkpaa Ohe Oluhye nya ala Isirẹlụ! Anụ gwogbo họọ gbe oyi myị oyi, Amẹn! Amẹn.