Read idege EJE ỌNYỊỊLA 42 Bible Online

EJE ỌNYỊỊLA 42 - idege bible

EJE ỌNYỊỊLA 42

¹Eje Ọnyịịla nya anyị ịtụma nya iKora ọlẹ ri nya olegbeju nya angị mwu eje. Jaabwọ ká apyị kaa nwụ imyi nya enyi, ịnyịnyị-ịnyịnyị imyi nyang ahụ Ohe Oluhye à nwụm lẹ.

²Imyi nyang ahụ Ohe Oluhye ọhịhị nwụm. Ụka oyina m̄ tị́ ka warị kaka gbịgba ị-ịlahị nyang mẹ?

³Lẹnụ bala alodu, m̀ nụwa lida ojeje, egbejida-à ri ang oriri nyam kem lẹ, angịnyị juwa kpa byim yẹkẹẹ, “Ale Ohe Oluhye nyang a tị́ ji mẹ?”

⁴Ụka kam kpịtịya nya ang inyogo, ọkịlẹtụ nyam myị̀ lọjụjụ, ene-ene, m̀ kaa ji ogu ta aliru, kaa kpaa kụ ịlahị ka ube nya Ohe Oluhye, leje nya ọkẹkẹnị bala obe ojiji, lụya ọyaya ọtụka.

⁵Ịyẹ tị du kam bwọ ayiiji ịnyị mẹ? Ịyẹ tị du kam wụ ẹjẹ ịnyị? M̀ ka ya ẹhị ọrịrịị-rịrị nyam nịrọ Ohe Oluhye, kam ka juwa myịmyị-ị̀ gwogbo họọ ọwa ọngọchịmda bala.

⁶Ohe Oluhye nyam! Ọkịlẹtụ kpụm enyi lụmẹ am̀ ẹgẹlẹ, m̀ tị kpịtịya nyang ẹ-ẹga ká Ihu ịJọdan dọmwụ ọ-ọnụ nya ịgbọdọ nya ịHẹẹmọn bala iMisaa.

⁷Akama wẹ, ma wẹ tụ iru lala enyi o-bwu ọgbọdọ. Enyi i-gu ágbụ nyang du ọnụ dagaga jum.

⁸Amkpaa mẹ ọháha o-gbu enyi-ka nyamwụ je ẹnụ myị ẹnụ, lodu, m̀ mwu eje nyamwụ, m̀ raabwọ ha Ohe Oluhye nyam ọlẹ kọ ya ọhịhị ham.

⁹M̀ chị eko wụrụ Ohe Oluhye, Ẹjwọ nyam yẹkẹẹ, “Ịyẹ tị du ka deeri nyam-m̀? Ịyẹ tị du kam kịnyaa juwa yalakpa ẹ-ẹpwụ nya akama, ẹ-ẹpwụ nya uhila nya ọkwọ bwu ẹga nya aluji nyam?”

¹⁰Ido nya aluji nyam dum abwọ kpá yịgẹ-yịgẹ, ị juwa kpa byim “Ale Ohe Oluhye nyang a tị́ ji mẹ?”

¹¹Ịyẹ tị du kam bwọ ayiiji ịnyị mẹ? Ịyẹ tị du kam wụ ẹjẹ ịnyị? M̀ ka ya ẹhị ọrịrịị-rịrị nyam nịrọ Ohe Oluhye, kam ka juwa myịmyị-ị̀ gwogbo họọ ọwa ọngọchịmda bala Ohe Oluhye nyam.