Read idege EJE ỌNYỊỊLA 44 Bible Online

EJE ỌNYỊỊLA 44 - idege bible

EJE ỌNYỊỊLA 44

¹Ohe Oluhye ee, ahị wo oja nyang lụrụ nya ịlọhị, adahị igogo anyị à jahị oja ọọwa lẹ. Oja nya ang ịtụka ịlẹ ká họ loyi nyaa, lụka nya alene.

²Bwula ọngịrị nyang à ku alẹpwụma ịkịla rụ hi ọpyị ọlẹ, à tị ya adahị anyị kụ am̀, à ta alụma ịkịla ịịwa ayịreji, a tị họ ka adahị igogo anyị la ịlaa.

³Ooge nya adahị anyị ị kpa ye ọpyị ọlẹ ka, ọọngịrị nya ịlaa a ya ọkụrụ-kụrụ haa ka. Ọngịrị ọtụka bala ụmụmẹ nyang ịnyị, a juwa taa chajị ị háng.

⁴Ahụ à ri Ohe Oluhye bala adịrahụ nyam lẹ. Ehile nyang ya ọkụrụ-kụrụ ha anyị nya iJekọbụ.

⁵Bwula ụbwọ ọdada nyang ahị chị aluji nyahị hụlẹẹ. Bwula ẹnyị nyang ahị ga angị tụụhị pyịpyị beji kpalị-kpalị.

⁶Ḿ dahịhile uda nyam ka, oge nyam-ḿ ka chịm da myị ka.

⁷A chịhị da bwu ẹga nya aluji nyahị, a chị oyoyi ju aluji nyahị.

⁸Ohe Oluhye ee, ahụ ahị kaa gwogbo ha ẹnụ myị ẹnụ ẹnụ lẹ, ahị ka gwogbo hang gbe oyi myị oyi.

⁹A tị pwahị, chị oyoyi juhi ugbẹnyị, aa kpa angịdẹwụ nyahị chị kaka.

¹⁰A họ ahị mwụ ata bịmwụ hi aluji nyahị, angị baahị ẹtẹ nuhi ụdụ nyahị wuu.

¹¹A pẹhiihi chị lala ịkpịlọ ịlẹ kị juwa ka nwụ, a nyiihi epepe tụ ẹpwụma-ẹpwụma da.

¹²A ya angịnyị ra chịịrụ la o-ye ideri-ịchangkpa bwu ẹpwụ nya ọhị ọọwa ka.

¹³A họ ahị ri ang-ayịlọ nya aloye ẹpwa nyahị, ahị ri ẹla-ẹlẹhụ nya angị kụ dagaga juhi.

¹⁴A họ ahị ri ịhwẹ nya alẹpwụma ịkịla, angịnyị wuu kpahị hu utungguru.

¹⁵Oyi jum ụka wuu, M̀ yahị cheji loyi mọmbọọ,

¹⁶ụka kam wo ido bala ọ-kpa họ nya aluji nyam, ịlẹ kị wẹẹ tịtọ nya ọ-họ kwiwa.

¹⁷Ang ịlẹ wuu họ tahị, ịnọ, áhị tị deeri hing lee ọ-pẹhi iro ọlẹ ká nwa tahị deeji ka.

¹⁸Ọkịlẹtụ nyahị gwahị gboo hing ka, ahị hịnyọ la ọ-bang jẹ ka.

¹⁹A tị kpụ baahị u-ugbileji am̀ ẹgẹlẹ ka iyo ịnyẹẹgẹga ji, a nyẹẹkpẹ dahị ẹ-ẹpwụ nya ukpowu okpẹm-kpẹm.

²⁰Áhị hịnyọ la ọ-gbịgba ha Ohe Oluhye nyahị lee ọrụ kaka kpụ eteji ha ijiga nya alụma ịkịla ịnọ,

²¹ahụ Ohe Oluhye ka jẹ, chajị a jẹ ẹla ọkpịbaa ọlọkịlẹtụ nya ọng myị ọng wuu.

²²Ajị nyang ị lẹẹ kpahị nwụ ẹnụ myị ẹnụ lẹ, angịnyị wahị nya angị lala ọkpịlọ ọlẹ kị juwa kpa ka nwụ.

²³Amkpaa ee, gu ịlọng achwọ! Ịyẹ tị́ ka juwa nune-è? Wuleji mẹ! Ā pwahị pyịyọọ ka.

²⁴Ịyẹ tị du ká juwa nyẹẹkpẹ dahị-ị̀? A deeri nya ọjụjụ bala akama nyahị lẹ-ẹ́?

²⁵Ị chịhị ata dụrụ ịwa. Ahị chị am ị-ịpyị bẹlẹ-bẹlẹ.

²⁶Wuleji, ká wẹ kaka dahị ụbwọ, ajị nya ọháha o-gbu enyi-ka ọlẹ ká la lẹ, chịhị da. Eje Ọnyịịla nya anyị ịtụma nya iKora